ԱՅՍ ՉՀԱՅԵՐԻ ՀԱՄԱՐ ԺՈՂՈՎՈՒՐԴԸ Ե°Վ ՏՈՒԳԱՆԵԼՈՒ, Ե°Վ... ՊԵՏԱԿԱՆԱԶՐԿԵԼՈՒ «ՄԱՏԵՐԻԱԼ» Է

Արխիվ 16-20 10 Հուլիս, 2020 18:30

Փառք մեր պարետին, ոտքերը լվացեք, ջուրը խմեք: Մի քանի ամիս էլ չանցած` նա մեծահոգաբար որոշեց, որ թոքային եւ սրտանոթային հիվանդներին կարելի է ազատել բաց տարածքում բերանը դիմակ-դնչկալով ծեփելու պարտավորությունից: Որպեսզի հանկարծ հենց փողոցում շնչահեղձությունից չմեռնեն ու չդառնան աղմկալի դատական գործերի «ջառմա»:

ՈՉ ԹԵ ՊԱՇՏՊԱՆՈՒԹՅՈՒՆ, ԱՅԼ ԶԱՆԳՎԱԾԱՅԻՆ ՊԱՏԻԺ

Պարետի այդ որոշման առնչությամբ, հետեւելով սիլլոգիզմներ ստեղծելու թրենդին, տեղում առաջարկեց պարետա-կորոնային սիլլոգիզմ:

«1. Կորոնավիրուսը հատկապես վտանգավոր է ծանր քրոնիկական հիվանդություններ ունեցող մարդկանց առողջությանն ու կյանքին:

2. Պարետատունը որոշել է, որ քրոնիկ շնչառական հիվանդություններ` ասթմա, թոքերի քրոնիկ օբստրուկտիվ հիվանդություն, էմֆիզեմա կամ բրոնխիտ` ծանր շնչառական անբավարարության առկայության դեպքում, ինչպես նաեւ 3-րդ, 4-րդ ֆունկցիոնալ դասի քրոնիկ սրտային անբավարարություն ունեցող անձինք հանրային բաց տարածքներում կարող են չկրել դիմակ:

3. Եթե խոցելի խմբերը, լինելով վտանգի առաջնագծում, ազատվում են բաց տարածքներում դիմակ կրելու պարտավորությունից, պակաս խոցելիներին ինչու՞ եք փռում ասֆալտին եւ անվերջ ակտավորում»:

Ուրեմն ինչ, դիմակը պաշտպանի՞չ գործիք է, թե՞ պատժիչ, հատկապես այս շոգերին: Օրինակ` Արարատ Միրզոյանը, շռայլելով գովք մեծ դիմակատուգանքներին, հանդգնում է «ոչ գիտակից» անվանել այն մարդկանց, ովքեր, ողջամտությունից ելնելով, համոզված են, որ դիմակով վիրուսներից պաշտպանվելը նույնն է, ինչ հողամասը ցանկապատով մոծակներից պաշտպանվելը: Այսինքն` կարող ենք պնդել, որ բացօթյա տարածքներում դիմակների պարտադրանքը խոշտանգման տարրեր պարունակող զանգվածային պատիժ է: Պատիժ ամբողջ ժողովրդի նկատմամբ: Եվ պարետը որոշել է այդ պատժից ազատել քրոնիկ ծանր հիվանդներին` ճիշտ այն տրամաբանությամբ, որով հիվանդ կալանավորներն ազատվում են պատժախուց տարվելուց: Իսկ «գլխանց» այդ պատժից պարետն ազատել էր մինչև 6 տարեկան երեխաներին: Իսկ դնչկալային տեռորը «հիմնավորելու» նպատակով Նիկոլ Փաշինյանը հինգշաբթի հայտարարել է. «Ես ուզում եմ ընդգծել, որ երեկ ԱՀԿ-ն հայտարարեց, որ հաստատված է համարում` օդի միջոցով վարակը կարող է տարածվել, սա այն է, ինչի վերաբերյալ մենք նախորդ շաբաթ, հիմնվելով գիտական նոր տվյալների վրա, հայտարարել էինք, ու այս առումով կարեւորվում է դիմակների կրումը, այդ թվում, բաց տարածքներում»: Բռնապետիկն իհարկե հերթական անգամ ստեց, քանզի իրականում հայտարարվել է այլ բան: «Չի կարելի բացառել COVID-19-ի օդային ճանապարհով փոխանցման հնարավորությունը հատկապես շատ կոնկրետ պայմաններում` մարդաշատ, փակ, վատ օդափոխվող տարածքներում: Սակայն ապացույցներն անհրաժեշտ է հավաքել եւ ուսումնասիրել, եւ մենք շարունակում ենք այդ գործը»,- հայտարարել է ԱՀԿ-ի տեխնիկական հարցերով փորձագետ Բենեդեթա Ալեգրանցին: Իսկ հիմա տեսնենք, թե ինչ սիլլոգիզմ է ստեղծել քաղաքագետ Աղասի Ենոքյանը.

«1. Հայաստանում կորոնավիրուսը տարածվում է, որովհետեւ համաճարակի դեմ պայքարի փոխարեն պայքարում են դիմակ դնելու համար:

2. Հայաստանի առողջապահության նախարարը պատրաստվում է չփորձարկված պատվաստանյութը պատվաստել Հայաստանի քաղաքացիներին:

3. Հայաստանում միտումնավոր չի կանխվել համաճարակի տարածումը, որպեսզի առատ նյութ մատակարարվի պատվաստանյութ փորձարկողներին»:

Այսինքն` քաղաքագետն ուղղակիորեն մեղադրում է ե՛ւ Արսեն Թորոսյանին, ե՛ւ ամբողջ խունտային ծանրագույն ոճրագործության մեջ` որ ժողովրդին դարձրել են ոչ միայն, տուգանքի, այլեւ հրեշավոր բժշկական գիտափորձի «մատերիալ»: Այդպիսի արարքների համար Նյուրնբերգում հիտլերականներին կախաղանի էին դատապարտում...

ԻՇԽԱՆԱԶԱՎԹՆԵՐԸ ՇՏԱՊԵՑԻՆ «ՏՈՆԵԼ» ՍԴ-Ի ԳՐԱՎՈՒՄԸ

Իսկ սրանք պատրաստվում են արտակարգ դրությունն ու դնչկալային տեռորը այնքան ձգել, մինչեւ ամբողջովին կոտրեն ժողովրդի կամքը, բոլորին վերածեն անասունների: Ե՛վ տոտալ դիկտատուրայի խնդիր ունեն, ե՛ւ պետք է մինչեւ վերջ կատարեն տերերի առաջադրանքները: Երեւի այդ պատճառով, ցանկալին իրականի տեղ դնելով, քայլասերվածները ցնծությամբ հայտարարեցին, որ Եվրադատարանը մերժել է Հրայր Թովմասյանի եւ ՍԴ դատավորների հայցը, բայց... Տեսնենք ինչ է ասում իրավապաշտպան Արփինե Հովհաննիսյանը. «Առանձնակի զվարճալի են «ապտակ», «շառաչուն ապտակ ՄԻԵԴ-ից» եւ այլ նման մտքեր շաղ տվող, չարությունից, բայց նաեւ ապագա ՍԴ կազմից երջանկացած տղաներն ու կանայք: Մինչ դուք «հաղթանակի» խրախճանք կազմակերպած ու դրանով արբեցած տարածում եք լուրեր, որ ՄԻԵԴ-ը մերժել է Հրայր Թովմասյանին եւ այլ դատավորներին, զուգահեռ իրականությունում Եվրոպական դատարանն ԸՆԴԱՄԵՆԸ արձանագրել է, որ այս գործով չի կիրառում միջանկյալ միջոց, սակայն պատրաստ է քննարկել դատավորների գանգատը, ընդ որում, դատարանն ընդգծել է գործի քննությունը ԱՌԱՋՆԱՀԵՐԹՈՒԹՅԱՆ ԿԱՐԳՈՎ կատարելու պատրաստակամությունը: Սա, քանզի խախտումների բնույթն է ակնհայտ: Ու քանզի բովանդակային հարցերի վերաբերյալ պատասխանները, մեղմ ասած, բավարար չեն: Սա նշանակում է` սովորաբար երկար տեւող գործ չի լինելու»:

Այսինքն` Ստրասբուրգից կարող է գալ խունտայի ծրագրերը գերեզմանող վճիռ: Իսկ Եվրոպական դատարանում դիմումատուների ներկայացուցիչ Սիրանուշ Սահակյանի հաղորդածը է՛լ ավելի աննպաստ է քայլասերված պետականաքանդների համար. «Հանրությանը տեղեկացնում ենք, որ Սահմանադրական դատարանի նախագահի և դատավորների գործը ներկայումս գտնվում է քննության փուլում: Ավելին, Եվրոպական դատարանը, հաշվի առնելով խախտումների բնույթը և բարձրացված հարցերի կարեւորությունը, հանձնառել է գործի անհապաղ քննություն: Սույն թվականի հունիսի 26-ին ներկայացված տեղեկատվության հիման վրա արդեն իսկ հուլիսի 2-ին Կառավարությանն ուղղվել են մի շարք հարցեր: Դատարանը, սահմանված ընթացակարգերին համապատասխան, շարունակում է կողմերին տրամադրել դիրքորոշումներ ներկայացնելու ժամկետներ: Այդ նպատակով Եվրոպական դատարանն արդեն իսկ սահմանել է նոր ժամկետ` սույն թվականի օգոստոսի 28-ը, ինչը հավելյալ վկայում է գործի կարեւորության նկատմամբ առկա ուշադրության մասին»:

Օգոստոսի 28` ահա «իքս» օրը, որը ոչ մի լավ բան չի խոստանում խունտային: Եթե իհարկե դեռ մինչ այդ ըմբոստացած Ազգը սրանց չվռնդի գրողի ծոցը: Ի դեպ, նաեւ հետաքրքիր նախանշան` Ռոբերտ Քոչարյանին ազատած դատավոր Ալեքսանդր Ազարյանի հարցում ԲԴԽ-ն չհնազանդվեց դիկտատորիկի կամքին: Մինչդեռ Նիկոլին թվում էր, որ այդ կառույցն իր գրպանում է...