«ԿԱՆ ՏԵՍԱԿԵՏՆԵՐ, ՈՐ ԱՆԳԱՄ ՄԱՐՏԻ 1-Ի ԺԱՄԱՆԱԿ ՆԻԿՈԼ ՓԱՇԻՆՅԱՆԸ ԹՈՂԵՑ ՓԱԽԱՎ»

Հայաստանում քաղաքական անցուդարձի, Նիկոլ Փաշինյանի կորոնավիրուսով վարակված լինել-չլինելու, իշխանությունների վարկանիշի անկման եւ այլ հարցերի մասին զրուցեցինք քաղտեխնոլոգ ԱՐՄԵՆ ԲԱԴԱԼՅԱՆԻ հետ:

– Պարոն Բադալյան, առավոտ կանուխ վարչապետ Նիկոլ Փաշինյանը հայտարարեց, որ վարակվել է կորոնավիրուսով: Թերեւս շատերն այս ամենին թերահավատորեն են մոտենում, ինչո՞ւ: Ի՞նչ կասեք այս մասին:

– Հարցը եկեք բաժանենք երկու մասին: Նախ առողջություն եմ մաղթում բոլոր նրանց, ովքեր վարակված են կորոնավիրուսով, անգամ եթե վարչապետի մասին է խոսքը: Իսկ ահա ինչ վերաբերում է կասկածներին, որ այսօր շատերը չեն հավատում, որ Փաշինյանը վարակվել է կորոնավիրուսով, ապա պետք է ասեմ, որ բնականաբար դրա տեղիքը տվել է հենց Նիկոլ Փաշինյանը: Կան տեսակետներ, որ անգամ մարտի 1-ի ժամանակ Նիկոլ Փաշինյանը թողեց փախավ, ու ահա այս մասով եւս զուգահեռներ են անցկացնում: Բոլոր նրանք, ովքեր թերահավատորեն են մոտենում վարչապետի խոսքերին եւ գործողություններին, հիմնականում հիմնվում են Փաշինյանի վերջին երկու տարվա, հատկապես` երկու ամսվա հակասական հայտարարությունների վրա: Վարչապետ Փաշինյանը նախ հայտարարեց, որ կորոնավիրուսն ում շունն է, ապա խոսեց վիրուսը պինցետով ոչնչացնելու մասին, իսկ ահա հիմա Փաշինյանն այնքան վտանգավոր է համարում կորոնավիրուսը, որ պարտադրում է մարդկանց դիմակ կրել: Այս ամենին էլ գումարած Միքայել Մինասյանի կողմից արված փաստացի հայտարարություններն էին` կապված մաքսանենգ սիգարետների հետ եւ այլն: Այնքան հակասական տեսակետներ հնչեցին, որ իսկապես կասկածներ են առաջանում: Որեւէ մեկը հստակ ասել չի կարող, թե Փաշինյանը վարակված է կորոնավիրուսով, թե` ոչ, սակայն նմանատիպ կասկածների տեղիք տվողը հենց ինքը` Նիկոլ Փաշինյանն է:

– Ակնառու է, որ վերջին շրջանում Նիկոլ Փաշինյանի վարկանիշն առավել նվազել է: Արդյո՞ք այդ ամենը կապված է սահմանադրական հանրաքվեն չեղարկելու եւ հարցը Ազգային ժողով տեղափոխելու ճիգերի հետ:

– Միանշանակ, որովհետեւ անգամ եթե հանրաքվեն լիներ ապրիլի 5-ին, ապա նրա վարկանիշը եւս էական անկում էր ապրելու, սակայն համեմատած այս պահի հետ, մի քիչ բարձր էր: Անգամ ամիսներ առաջ շատ դժվար էր 850.000 քաղաքացու ուղարկել տեղամաս, որից 650.000 կասեին` այո: Կորոնավիրուսն արագացրեց Նիկոլ Փաշինյանի կառավարչական ունակությունների բացակայության գործընթացը, որի արդյունքում շատերը հասկացան, որ Փաշինյանն ուղղակի չի կարողանում իրականացնել հակաճգնաժամային կառավարում: Եթե հանրաքվեն տեղի ունենար, իշխանությունները միանշանակ կպարտվեին: Այստեղ առաջ է գալիս մեկ հարց, թե ո՞վ է փոխարինելու Նիկոլ Փաշինյանին, եւ արդյո՞ք կան քաղաքական գործիչներ, որոնց վարկանիշն էապես մեծանում է: Գաղտնիք չէ, որ ինչ-որ չափով վարչապետի չափանիշներին համապատասխանում է ԱԱԾ նախկին տնօրեն Արթուր Վանեցյանը: Վերջին շրջանում հայաստանյան կուսակցություններն այնքան են լղոզվել, որ չես հասկանում` որ կուսակցությունը կա, եւ որը չկա: Նիկոլ Փաշինյանն ընդամենը քաղաքական անհատ է: Նա բացարձակ գաղափարախոսություն չունի: Նա հայտարարել էր, որ իրենք իզմեր չեն ընդունում: Իսկ ահա Փաշինյանի վարկանիշի մասին խոսելն արդեն նույնիսկ անիմաստ է: Վարչապետն այլեւս ոչինչ անել չի կարող իր վարկանիշը պահելու համար:

– Պարոն Բադալյան, Հայատանն այսօր ո՞ւր է գնում: Ի՞նչ կասեք Լանզարոտեի հայտնի կոնվենցիայի մասին: Այն ե՞ւս կջախջախի Փաշինյանի վարկանիշը:

– Հայաստանն այս երկու տարվա ընթացքում այդպես էլ հստակ ցույց չի տալիս, թե որ ուղղությամբ է գնում: Հայաստանն ուղղակի օվկիանոսում մի նավ է, որը մի օր հյուսիս է գնում, մի օր` հարավ: Հայատանը դեգերում է, չկա Հայաստանի զարգացման տեսլականը: Անկախ նրանից, թե իշխանություններն ինչ օրենք կընդունեն, մեկ է` վարչապետի վարկանիշն անկում է ունենալու: Ստամբուլյան կոնվենցիան ընդունելուն պես, եւս նրա վարկանիշն անկում կապրի, Ամուլսարի հարցը եւս նրա վարկանիշի վրա ազդելու է ու այդպես շարունակ:

ՀԱՅԿ ԳԵՎՈՐԳՅԱՆ

Այս թեմայով Լուրջ կասկածներ ունեմ, որ ողջ այդ բառակույտի կնքահայրն անձամբ Նիկոլն է. Արմեն Հովասափյան ՇՏԱՊ. Հակակոռուպցիոն կոմիտեն մտավ Աբովյանի համայնքապետարան. Բաբայան Էդոյի գործը «բուրդ է» Մեղադրական եզրակացությունը, որը ես եմ ստացել, համապատասխան չէ օրենքի պահանջներին. Արմեն Աշոտյան Ձախողվեց մեր պետության զավթման ծրագիրը. Փաշինյանի ելույթը ՄԱԿ-ում Համբերեք ձմեռը դուրս գանք. Ինչ է հրահանգել Փաշինյանը թիմակիցներին