ԱՆՆԱՅԻ ԸՆԿԵՐՈՒՀՈՒ ԵԼԱ՞ԿՆ Է ՀԱՍՆՈՒՄ ՀԱՅԿԱԿԱՆ ԲԱՆԱԿ

Դեռ ապրիլի 8-ին Նիկոլը ֆեյսբուքյան իր էջում տեղեկացրել էր, թե՝ «Ելակը մտավ զորամաս»: Նախնական տպավորությունն այն էր, թե դա հերթական PR ակցիան է, թե՝ «Տեսեք, ինչքան լավ վիճակ է, որ զինվորները ելակ էլ են ստանում»: Սակայն դրան հաջորդեցին այն լուրերը, որ որոշ զորամասեր իսկապես ելակ ստացել են: Իսկ այդ դեպքում միանգամայն այլ հարցեր են առաջ գալիս: Ապրիլի սկզբներին, երբ Նիկոլն այդ մասին գրեց, նոր-նոր էր սկսվել, այսպես ասած, ելակի սեզոնը, եւ կիլոգրամի արժեքը 2 հազար դրամից ավել էր: Նաեւ չմոռանանք՝ բանակի բյուջեն,մեղմ ասած, համեստ է եւ սահմանափակ: Այսինքն, առկա թույլ միջոցները ինչպե՞ս են թույլ տալիս՝ գնալ գերթանկարժեք սննդատեսակների մատակարարման ուղղությամբ, որի էֆեկտիվությունը չնչին է: Վերջապես, եթե սահմանափակ միջոցներից նման ծախսեր են արվում, ապա չի՞ նշանակում, որ ստիպված են խնայողություն անել այլ սննդատեսակների մեջ:

Այս բոլոր հարցերի պատասխանը կարելի էր կռահել նախօրեին «Հրապարակ» թերթի ներկայացրած տվյալներից, թե ինչ կարգով եւ ում կողմից է հայկական բանակին  տրամադրվում ելակ: Տրամադրող ընկերությունը «Գրին ֆուդն» է: Մինչ կներկայացնենք, թե ասվածի իմաստը որն է, նախ նկատենք հետեւյալը: Ընկերությունը պնդում է, որ ելակը  շատ  լավ բան է: Ըստ այդ կազմակերպության ներկայացուցչի` այն քաղցր է, «կալորիկանություն էլ չունի, շատ լավ է, չեն չաղանա»: Այս խելքո՞վ են բանակին կերակրում: Աշխարհի բոլոր բանակներում  լավ կերակուրը համարվում է բարձր կալորիականություն համարվողը, քանի որ զինվորների  ֆիզիկական ծանրաբեռնվածությունը  բարձր է, հետեւապես  նրանց տրամադրում են համապատասխան կալորիականությամբ սնունդ: Ինչպես մեզ ասաց զինվորական սննդակարգի  մասնագետը՝ «Ծիծաղելի է բանակին  ելակ մատակարարելը: Այն որեւէ առումով չի տեղավորվում այն պահանջների մեջ, որոնք սահմանված են բանակի սննդակարգի համար: Բանակը  ո՛չ սրճարան է, ո՛չ էլ՝ բար, մնում է կոկտեյլներ մատակարարեն բանակին»:

Տարօրինակ է նաեւ, որ միրգ մատակարարելու հարցում այդքան մեծ ուշադրություն է տրվել ելակին, որը, կրկնենք, բավականին թանկարժեք հատապտուղ է: Դրա փոխարեն կարելի էր նույն ժամանակահատվածում 4-5 անգամ ավելի շատ խնձոր, բանան կամ նարինջ մատակարարել, որոնք իրենց սննդային նշանակությամբ բազմապատիկ անգամ գերազանցում են ելակին: Էլ չասած, որ ելակի տեղափոխումը եւ պահպանումը  շատ բարդ է, այն դասվում է շուտ փչացող ապրանքների շարքին, այսինքն` ի՞նչ վիճակում այն կհասնի զինվորին. առողջական լուրջ խնդիրներ առաջացնելու ռիսկն առավել քան մեծ է: Այսքանից հետո պարզ հարց է ծագում, թե ինչո՞ւ հատկապես ելակ: Պատասխանը, ինչպես միշտ, կոռուպցիոն դաշտում է: Պարզվում է, որ «Գրին ֆուդ» ընկերությունը պատկանում է Նիկոլի կնոջ՝  Աննայի ընկերուհուն, որի հետ ընկերությունը ունի շուրջ 10 տարվա պատմություն: Ընդ որում, ելակի վերաբերյալ ո՛չ հստակ պայմանգիր կա, ո՛չ էլ անց է կացվել մրցույթ, ինչը պարտադիր պայման է` «Գնումների մասին» օրենքից ելնելով: Թերթը ներկայացնում է նաեւ, որ մատակարարը, այսինքն՝ «Գրին ֆուդը», հակասող պարզաբանումներ է տալիս  իրենց եւ ՊՆ-ի փոխհարաբերությունների մասին: Մեկ նա ասում է, թե ՊՆ-ի հետ աշխատում են անմիջապես առանց միջնորդների, հետո էլ, թե որպես միջնորդ հանդիսանում է «Մեդիտեք» ընկերությունը: Այս պահից իրավիճակը ավելի է խճճվում, քանի որ «Մեդիտեքը» զբաղվում է բժշկական սարքավորումների ներմուծումով եւ ոչ մի կապ չունի բանակի սննդակարգի հետ: Դրա պատասխանը կրկին  կոռուպցիոն դաշտում է: Ընկերությունը անմիջական կապ ունի ՊՆ նախարար Դավիթ Տոնոյանի մտերիմների հետ: Ուրեմն՝ ինչո՞ւ որոշեցին բանակին ելակ մատակարարել, երբ այն ունի ցածր էներգետիկ արժեք եւ բարդ տեղափոխման-պահպանման հնարավորություններ: Պատասխանը փորձեցինք ստանալ նաեւ ՊՆ-ից, սակայն նախարարության համապատասխան աշխատակիցը ենթադրեց, թե հարցերն «անհեթեթ են, որոնք չենք մեկնաբանում»: Իհարկե, կարելի է հիշեցնել հարկատուներիս հաշվին աշխատավարձ ստացող սույն աշխատակցին, որ նա չի որոշողը, թե որ հարցն ինչ է, որին կարող է պատասխանել, որին՝ ոչ. օրենք կա, պարտավոր է պատասխանել, ուստիեւ կդիմենք գրավոր հարցմամբ: Բայց նա  հարցը կհամարե՞ր «անհեթեթ», եթե խնդրի հետ կապված չշրջանառվեր նաեւ սեփական ղեկավարի անունը...

Ահա եւ հեղափոխական իշխանությունների ողջ պերճանքն ու թշվառությունը: Նշենք, որ ելակի սկանդալը հետեւեց սիգարետի սկանդալին, որը նույնպես կապ ունի Նիկոլի ընտանիքի հետ:

Ա. ՀՈՎՀԱՆՆԻՍՅԱՆ

Հ.Գ. - Որոշ մանրամասներ Աննա Հակոբյանի ընկերուհի՝ Վարդուհի Ֆեսչյանի մասին: Վերջինս նախկին վարչապետ Կարեն Կարապետյանի օգնական  Կարապետ Վարդանյանի կինն է: Կարապետն էլ 2009-14թթ. եղել է տրանսպորտի եւ կապի փոխնախարար: Հիմա հարց է ծագում՝ ի՞նչն էր միավորում  Սերժ Սարգսյանի իշխանության օրոք  փոխնախարար եւ վարչապետի օգնական աշխատած մարդուն  այդ նույն իշխանությանը  անխնա քննադատող  եւ շատ անգամ անձնական վիրավորանքներ հասցնող  Նիկոլ Փաշինյանի հետ: Ստացվում է, կամ Նիկոլ Փաշինյանն էր կեղծ ընդդիմություն, կամ Կարապետ Վարդանյանը`  կեղծ իշխանություն:

Այս թեմայով Պայթյունի հետևանքով պայմանագրային զինծառայող է մահացել Առաջարկվում է բանակից ազատել փրկարար ծառայությունում և ոստիկանությունում ծառայություն ընտրողներին․ նախագիծ Զինծառայող Էդգար Գևորգյանի մահվան դեպքով նախաձեռնվել է քրվարույթ. սպանություն կատարած անձը ձերբակալվել է Բանակում ոչ մարտական պայմաններում կրկին զինվոր է մահացել Հայտնաբերվել է զինծառայող Գրիգոր Զաքարյանի դին՝ հրազենային վնասվածքով