Ինչու է Ավինյանը թաքցնում Սորոսի հիմնադրամի հաշվետվությունը

2019թ.  մարտի 1-ին ՀՀ փոխվարչապետ, այժմ նաեւ պարետ ՏԻԳՐԱՆ ԱՎԻՆՅԱՆԸ ստորագրել էր որոշում՝ Բաց հասարակության ինստիտուտի օժանդակության հիմնադրամի հայկական մասնաճյուղի (ԲՀԻՕՀՀՄ) կողմից 2019-2020 թվականներին իրականացվող ծրագրի մասին: Ըստ այդմ՝ Բաց հասարակության ինստիտուտի օժանդակության հիմնադրամի հայկական մասնաճյուղին` մինչեւ յուրաքանչյուր եռամսյակին հաջորդող ամսվա 25-ը՝ ՀՀ կառավարության 2003 թվականի հունվարի 16-ի N 66-Ն որոշմամբ հաստատված՝ բարեգործական ծրագրերը բարեգործական որակելու եւ գրանցելու կարգի 25-րդ կետով սահմանված կարգով պետք է ներկայացվեր տեղեկություններ տվյալ եռամսյակի ընթացքում նշված ծրագրի շրջանակներում կազմակերպության կողմից կատարված աշխատանքների, ինչպես նաեւ կազմակերպությանը մատակարարված ապրանքների ու մատուցված ծառայությունների, իսկ ծրագրի ավարտից հետո՝ մեկամսյա ժամկետում` ամփոփ տեղեկություններ ծրագրի կատարման մասին:

Սակայն պարզվում է՝ կառավարությունը բաց եւ թափանցիկ չէ, երբ խոսքը վերաբերում է սորոսական հիմնադրամին: Իսկ թե ինչո՞վ են վերջիններս այս ողջ ընթացքում զբաղվել բարեգործության անվան տակ՝ անհայտ է կամ առնվազն թաքցվում է փոխվարչապետի մակարդակով: «Իրավունքը» վերոնշյալ որոշման հետքերով՝ փորձել էր անձամբ Տ. Ավինյանից պարզել, թե իր տված արտոնություններով ինչով են այս ընթացքում զբաղվել Սորոսի հիմնադրամում, բայց փոխվարչապետի գրասենյակից ստացանք խուսափողական պատասխաններ: Ավելին՝ տպավորություն է, որ ո՛չ վերահսկողություն է իրականացվել, ո՛չ էլ նույնիսկ հաշվետվություն է ներկայացվել Սորոսի հիմնադրամի կողմից: Չէ որ առնվազն այս հիմնադրամի գործադիր տնօրեն Լարիսա Մինասյանի մի քանի հրապարակային ելույթները հուշում են, որ մի բան էլ կառավարությունն է իրենց հաշվետու եւ ոչ իրենք: Կամ, միգուցե, կառավարության թիկունքի հետեւում` քաղաքական ինչ-ինչ փոխադարձ շահերից ելնելով՝ համաձայնության են եկել Ավինյանն ու Սորոսի հիմնադրամը՝ առանց թղթաբանության: Ինչեւէ, մեր հարցերն ու փոխվարչապետի գրասենյակից ստացված պատասխանը ներկայացնում ենք ստորեւ:

– Պարոն Ավինյան, խնդրում ենք մեզ տրամադրել եռամսյակների ընթացքում նշված ծրագրի շրջանակներում վերոնշյալ կազմակերպության կողմից կատարված աշխատանքների, ինչպես նաեւ կազմակերպությանը մատակարարված ապրանքների ու մատուցված ծառայությունների մասին հաշվետվությունները:

– «Բարեգործության մասին» ՀՀ օրենքի 18-րդ հոդվածի համաձայն՝ օրենքի պահանջներին բարեգործական կազմակերպության գործունեության համապատասխանության նկատմամբ վերահսկողությունն իրականացնում է լիազորված մարմինը, որին բարեգործական կազմակերպությունը ներկայացնում է իր գործունեության մասին տարեկան հաշվետվությունը: Լիազորված մարմինն իրեն ներկայացված փաստաթղթերի հիման վրա կատարած ուսումնասիրությունների արդյունքում խախտումների հատկանիշներ հայտնաբերելու դեպքում կազմակերպությունում ստուգում անցկացնելու միջնորդությամբ դիմում է իրավասու մարմիններին: Նշված հաշվետվությունները լիազոր մարմին ներկայացվում են վերջինիս կողմից իր վերահսկողական լիազորություններն իրականացնելու նպատակով: Միաժամանակ նույն հոդվածի համաձայն՝ բարեգործական կազմակերպություններն իրենց ֆինանսական գործունեության մասին հաշվետվությունների, ինչպես նաեւ բարեգործական ծրագրերի իրականացման ընթացքի մասին յուրաքանչյուր տարվա ավարտից հետո՝ եռամսյա ժամկետում տեղեկատվություն են հրապարակում զանգվածային լրատվության միջոցներով:

– Ինչպե՞ս եք գնահատում կատարված աշխատանքը, եւ արդյոք այն բավարարում է բարեգործական ծրագիր համարվելու համար անհրաժեշտ չափանիշներին:

– Նշված աշխատանքները նախապես նկարագրված են եղել բարեգործական որակված ծրագրերում, եւ ծրագրերը բարեգործական են որակվել՝ չափորոշիչներին համապատասխանելու արդյունքում:

– Հայաստանում համավարակով պայմանավորված՝ ստեղծված իրավիճակը հաշվի առնելով` հնարավո՞ր է, որ հարկային արտոնությունների տրամադրման մասին որոշումը հետ կանչվի:

– Որոշումը հետ կանչելու ընթացակարգ նախատեսված չէ: Դրա համար չկան իրավական հիմքեր:

ՀՐԱՆՏ ՍԱՐԱՖՅԱՆ

Այս թեմայով Անկախության օրը՝ ախմախ անակնկալներով Ո՛չ Կառավարությունը պետք է դառնա եկեղեցական ժողով, ո՛չ Եկեղեցին՝ կառավարություն Բաբուխանյանը բարձրացրեց Արցախի օկուպացված քաղաքների հարցը Գիշեր ցերեկը կհավասարվեն Թե բա 82 միլիոն դրամ էլ դեռ ես եմ ներդրել փողոցի լայնացման և բորդուրների համար