​​​​​​​«ԿԱՄՔ»-ի Արթուր Ալեքսանյանը երկու ամսով կալանավորվեց

Երկօրյա ձգձգվող դատական նիստերից հետո՝ այսօր ժամը՝ 22:00-ին, Կենտրոն եւ Նորք-Մարաշ վարչական շրջանների ընդհանուր իրավասության դատարանում կայացվեց որոշում ե՛ւ ազգային արժեքների պաշտպանության «ԿԱՄՔ» հասարակական նախաձեռնության անդամ ԱՐԹՈՒՐ ԱԼԵՔՍԱՆՅԱՆԻ փաստաբանական խմբի բողոքը, ե՛ւ քննիչի միջնորդությունը բավարարելու վերաբերյալ: Հիշեցնենք, որ Ա. Ալեքսանյանը մեղադրվում է ԱԺ «Իմ քայլը» խմբակցության պատգամավոր ՆԻԿՈԼԱՅ ԲԱՂԴԱՍԱՐՅԱՆԻ նկատմամբ հեծանիվով իբրեւ վրաերթի փորձ կատարելու մեջ:

Ինչպես ավելի վաղ «Իրավունքին» տեղեկացրել էր Ա. Ալեքսանյանի փաստաբան ԷՄԻՆ ԲԵԳԼԱՐՅԱՆԸ. «Արթուր Ալեքսանյանի ձերբակալման դեմ տարված մեր վերաքննիչ բողոքը միացվել են եւ մեկ վարույթով են քննվում՝ քննիչի միջնորդության հետ՝ Ալեքսանյանի նկատմամբ, որպես խափանման միջոց, կալանավորումն ընտրելու վերաբերյալ»:

Արդյունքում դատարանը որոշեց Արթուր Ալեքսանյանին երկու ամսով կալանավորել, միեւնույն ժամանակ՝ փաստելով, որ նրա ձերբակալումը ոչ իրավաչափ է եղել: Աբսուրդի թատրոն հիշեցնող այս գործընթացը՝ փաստաբանը համարում է խայտառակություն:

Է. Բեգլարյանը տեղեկացրեց, որ Արթուր Ալեքսանյանն իրեն մեղավոր չի ճանաչում. «Նա տվել է մանրամասն ցուցմունք իրեն հայտնի հանգամանքների վերաբերյալ: Դատարանում էլ, բնականաբար, մեր ձերբակալման դեմ տարված բողոքի հետ համաձայն էր, իսկ քննիչի կալանավորման դեմ առարկում էր եւ միանում իր պաշտպաններին»:

Հավելենք, որ այսօր երրորդ անգամ դատարանի դիմացից բերման ենթարկվեց «ԿԱՄՔ» հասարակական նախաձեռնության հիմնադիր ՎԱՀԱԳՆ ՉԱԽԱԼՅԱՆԸ, որը եկել էր սատարելու ընկերոջը: Նա հայտարարությամբ է հանդես եկել, որում մասնավորապես ասված է. «Սիրելի‘ հայրենակիցներ, որպես հայ, որպես Հայաստանի Հանրապետության քաղաքացի, որպես հայկական արժեքների պաշտպանության «ԿԱՄՔ» հասարակական նախաձեռնության անդամ, դատապարտում եմ Արթուր Ալեքսյանյանի անհիմն կալանավորումը, որը օրենքի պարզ չարաշահում է, եւ ինչ-որ տեղ, սպառնալիքի ժեստ՝ ուղղված «ԿԱՄՔ»-ին, որպեսզի վերջինս չըմբոստանա Լանզարոտի կոնվենցիայի վավերացմանը: Հայտարարում եմ, որ «ԿԱՄՔ»-ի որեւէ անդամ երբեւէ չէ որդեգրելու կրավորական քաղաքականություն, եւ որեւէ մեկը որեւէ ձերբակալությամբ չի կարող լռեցնել մեզ: Արդեն պարզ է, որ իշխանությունները համավարակն ու արտակարգ դրությունն օգտագործում են Հայաստանում այլասերում ու հոգեփոխում իրականացնելու նպատակով: Ես եւ իմ ընկերները չենք լռելու եւ չենք հանդուրժելու ո‘չ այդ գործողությունների իրացումը, ո‘չ էլ այդ ճանապարհին արված քաղաքական հետապնդումները: Պահանջելու ենք ազատ արձակել Արթուր Ալեքսանյանին, ով հետապնդվում է իր քաղաքական հայացքների պատճառով: Արթուրի եւ «ԿԱՄՔ»-ի անունից պահանջելու եմ հետ կանչել կոնվենցիան եւ ցրել Հայաստանի Հանրապետության յոթերորդ գումարման Ազգային Ժողովը»:

ՀՐԱՆՏ ՍԱՐԱՖՅԱՆ

Այս թեմայով Արթուր Վարդանյանի կյանքին վտանգ է սպառնում. Փաստաբան Ընտրապայքարի են դուրս եկել ներկա եւ նախկին համայնքապետերը Թե բա 82 միլիոն դրամ էլ դեռ ես եմ ներդրել փողոցի լայնացման և բորդուրների համար ՀՐԱՏԱՊ. ԴՕԿ կուսակցության պատվավոր նախագահ Վարդան Ղուկասյանի հայտնի փաստաբանը հայտարարությամբ է հանդես եկել ՇՏԱՊ․ Արմավիր ՔԿՀ-ի բանտախցում կտրուկ վատացել է Արթուր Վարդանյանի առողջական վիճակը կտրուկ վատացել է