«ԿԱՐԾԵՍ ԱՄԵՆ ԲԱՆ ԱՐՎՈՒՄ Է ՎԱՐԱԿԱԿԻՐՆԵՐԻ ԹՎԻ ԱՃԻ ՀԱՄԱՐ»

Արխիվ 16-20 6 Մայիս, 2020 23:20

«Պարացելսուս» ՀԿ-ի նախագահ, մասնագիտությամբ բժիշկ-փորձագետ Նունե Ներսիսյանն օրերս ֆեյսբուքյան գրառում էր կատարել՝ մասնավորապես նշելով. «Հայաստանի Հանրապետությունը րոպե առաջ պետք է կասեցնի Առողջապահության համաշխարհային կազմակերպությանը (ԱՀԿ) անդամակցությունը եւ հրաժարվի ԱՀԿ-ի եւ Բիլ Գեյթսի ծրագրերով մեր երկրի առողջապահության համակարգը վտանգող, դրա գործունեությունը ուղղորդող ծրագրերից: ՀՀ-ն պետք է մերժի COVID 19-ի դեմ պատվաստումների նախատեսված ցանկացած ծրագրերը»:

Նկատենք, որ սա ԱՀԿ-ին, այդ կառույցի հիմնական ֆինանսավորող Բիլ Գեյթսին եւ աշխարհով մեկ առողջապահական տարաբնույթ խաղերի մասին ամենեւին էլ միակ մեղադրանքը չէ: Իսկ ԱՄՆ-ում ԱԿ-ին ուղղված մեղադրանքներ հնչել են նաեւ նախագահի մակարդակով: Ուրեմն, որտեղի՞ց է գալիս նման անհանգստությունը, փորձեցինք պարզել՝ զրուցելով ՆՈՒՆԵ ՆԵՐՍԻՍՅԱՆԻ հետ:

– Ինձ մոտ ԱՀԿ-ի նկատմամբ վստահության կորուստ սկսվեց դեռեւս 2017թ. վերջերից, երբ հենց այդ կառույցի հրահանգով ՀՀ առողջապահության նախարարությունը սկսեց ներդնել առողջապահական էլեկտրոնային կառավարման միասնական համակարգ: Այդ ժամանակ սկսվեցին նաեւ քննարկումներ` մեկ այլ ծրագրի հետ կապված: Խոսքը միայն դեղատոմսերով դեղերի վաճառք թույլատրելու մասին է: Զուգահեռաբար Հայաստանում սկսվեցին քննարկումներ, որոնք ավելի շատ նման էին փորձարկումների, ալյուրը հավելանյութերով (ֆոլաթթու եւ այլն) հարստացնելու ծրագրի շուրջ: Բարեբախտաբար, ծրագիրը կյանքի չկոչվեց: Որից հետո սկսվեց ավելի կործանարար ծրագիր` ԱՀԿ-ի կողմից՝ մարդու առողջությանը վտանգ սպառնող Գարդասիլ ծրագիրը: Այդ ծրագիրը ժողովրդագրական անվտանգությանը սպառնացող դավադիր ծրագիր է: Ըստ իս, այս ամենը առողջապահական անվտանգության սպառնալիքներ են: Էլեկտրոնային կառավարման միասնական համակարգում ներբեռնելով մարդու` պացիենտի ամբողջական տվյալները, հեշտացնում է նրան վերահսկել, հետեւաբար՝ մեծանում են մարդու վրա ճնշում գործադրելու եւ հարձակում իրականացնելու հնարավորությունները: Օրինակ` առաջիկայում նախատեսված է՝ պատվաստումից խուսափելու դեպքում, օգտագործելով այս վերահսկողական միջոցները, պետական մակարդակով բժշկին արգելել տվյալ անձի համար ցանկացած դեղատոմս գրել: Իսկ թե ինչ կապ ունի կորոնավիրուսը այս ամենի հետ, եկեք անցկացնենք զուգահեռականներ: Պանդեմիա, կարանտին հայտարարվել է հենց ԱՀԿ-ի հրահանգով, ԱՀԿ-ն է ուղղորդում թեստավորման, բուժման ուղեցույցերը, հենց ԱՀԿ-ն է ներգրաված պատվաստանյութեր (քիմիական զենք) օպերացիայում: Նաեւ հենց ԱՀԿ-ի ուղղորդմամբ է Գավի հիմնադրամը Հայաստանին մատակարարում «Գարդասիլե պատվաստանյութը, որով կատարում են կլինիկական փորձարկումներ: ԱՀԿ-ի կողմից է ցանկացած հիվանդության ժամանակ տալիս բուժման ուղեցույց, որն անընդունելի է, քանի որ որպես բժիշկ, վստահորեն կարող եմ ասել, որ ամեն օրգանիզմ անհատական է: Տարիների ընթացքում էվոլյուցիայի հետ համահունչ փոխվել է նաեւ ե՛ւ բուժումը, ե՛ւ մարդու դիմադրողականությունը, դեղերի նկատմամբ զգայունությունը:

– Առհասարակ, ինչպե՞ս եք գնահատում կառավարության՝ կորոնավիրուսի դեմ տարվող պայքարի միջոցառումների արդյունավետությունը:

– Այսօրվա իշխանությունների պայքարը կորոնավիրուսի դեմ (կանխարգելիչ միջոցառումները) արդյունավետությունը գնահատում եմ միջինից ցածր: Տարածաշրջանում կորոնավիրուսը Վրաստանից ավելի ուշ է թափանցել Հայաստան, սակայն այսօր մեր վարակվածների ցուցանիշներն անհամեմատ ավելի բարձր են, քան այնտեղ: Նույնիսկ ինձ թույլ կտամ ասել հակառակը. կարծես ամեն բան արվում է վարակակիրների թվի աճի համար, քանի որ հենց ԱՀԿ-ի կողմից մեծ գումարների սպասելիքներ ունեն: Մարալիկի դեպքերը ակնհայտ խոսում են այդ մասին: Բացի այդ, կանխարգելիչ միջոցառումները շատ թույլ են կազմակերպված: Իսկ իշխանության ասօրվա ամենամեծ սխալը, որի պատճառով չենք կարող կանխատեսել հիվանդության տարածումը, բուժումը, կանխարգելումը, դա դիահերձումներն արգելելն է: Այսպիսով, գալիս ենք մի եզրահանգման, որ տեղաշարժի թերթիկ լրացնելը բավարար չէր COVID 19-ը կանխելու համար: