«Բանդայի պարագլուխը կրել է միլիցիայի աշխատակցի համազգեստ, ցույց է տվել կեղծ վկայական». գործը դատարանում է

Երևանի ընդհանուր իրավասության դատարանի դատավոր Վահագն Մելիքյանի վարույթում է Գ. Մաչանյանի ու Տ. Խաչատրյանի գործի դատական քննությունը:

Այս գործի վերաբերալ ՀՀ գլխավոր դատախազությունը հաղորդել է, որ 2000-2001 թվականներին հարուցված բազմաթիվ քրեական գործերի միացված վարույթի շրջանակներում ՀՀ քննչական կոմիտեի ԵՔՔՎ ծանր հանցագործությունների քննության բաժնում կատարված հսկայածավալ քննությամբ պարզվել ու հիմնավորվել են հանցավոր բանդայի կողմից իրականացված բազմաթիվ ծանր և առանձնապես ծանր հանցագործությունների կատարման փաստեր:

Մասնավորապես, 2000-2001 թվականներին Աշոտ Զատիկյանի կողմից ձևավորվել և ղեկավարվել է հանցավոր խմբավորում, որում ի սկզբանե ներգրավվել և բանդայի կողմից կատարված հանցագործություններին, ըստ մեղադրանքի՝ մասնակցել է Գ. Մաչանյանը:

Հանցավոր խմբավորման կազմում ընդգրկվել են ապօրինաբար թմրամիջոցներ օգտագործելու, շորթում, գողություն, դիտավորյալ սպանություն կատարելու, ավազակային հարձակման և այլ հանցագործություններ կատարելու համար նախկինում դատապարտված, ինչպես նաև այլ բազմաթիվ անձինք:

Որպես բանդայի հավաքատեղի՝ օգտագործվել են Ա. Զատիկյանի կողմից Երևան քաղաքում վարձակալած բնակարանները, Երևանի «Առաջին մաս» կոչվող թաղամասում գտնվող «Երևան-Վայք»  երթուղային տաքսիների հավաքակայանի տարածքը, որտեղ որպես վարորդ աշխատել են բանդայի երկու անդամներ:

Աշոտ Զատիկյանը ձեռք է բերել և հանցագործությունը կատարելիս օգտագործել է միլիցիայի համազգեստ, պատրաստել է միլիցիայի աշխատակցի վկայական, հանցագործությունների գերակշռող մասը կատարելիս տուժողներին ներկայացել է որպես միլիցիայի աշխատակից՝ յուրացնելով պաշտոնատար անձի կոչումը:

Բանդայի մի շարք անդամների հանձնարարվել է  հանցագործությունների կատարման համար տրամադրել հանցագործության գործիքներ ու միջոցներ: Մասնավորապես, խմբի որոշ անդամներից պահանջվել են իրենց անձնական օգտագործման ավտոմեքենաները, որոնք խմբավորման անդամներին տրամադրվել են օգտագործելու որպես հանցագործությունների կատարման միջոցներ: Բացի այդ՝ ավտոմեքենաների վրա փակցնելու համար, կոնկրետ հանցագործությունների նախապատրաստական փուլերում նախապես հափշտակվել ու բանդային են տրամադրվել տարբեր համարանիշեր:

Աշոտ Զատիկյանը մշակել է հանցագործությունների կատարման պլաններ, բանդայի անդամների միջև կատարել է դերաբաշխումներ, իրականացրել ողջ հանցավոր գործունեության ու կոնկրետ հանցագործությունների կատարման ղեկավարումը, ձեռնարկել է միջոցառումներ բանդայի գոյության ու հանցավոր գործունեության գաղտնիությունն ապահովելու ուղղությամբ:

Ա. Զատիկյանը Գ. Մաչանյանի հետ միասին ապօրինի կերպով ձեռք է բերել, կրել, պահել և խմբավորման անդամներին զինել հրազենով, ռազմամթերքով ու սառը զենք հանդիսացող դանակներով: Դրանց գործադրմամբ 2000-2001 թվականներին կազմակերպել և իրագործել են ավազակային հարձակումներ, կողոպուտներ, ինչպես նաև ծանրացուցիչ հանգամանքներում դիտավորյալ երկու անձի, այդ թվում՝ միլիցիայի աշխատակցի սպանություն:

Հարձակումների թիրախ են ընտրվել բենզինի լիցքավորման կայանները, տարադրամի փոխանակման կետերը, ինչպես նաև ոսկու առևտրով ու տարադրամի փոխանակմամբ զբաղվող առանձին անձինք, որոնք ենթարկվել են տարատեսակ բռնությունների: Ընդհանուր առմամբ՝ բանդայի հանցավոր գործողություններից տուժել է 35 անձ:

Միաժամանակ, խմբավորման ղեկավարը հիմնական դերակատարների հետ կազմակերպել ու իրականացրել է միջոցառումներ հանցագործությունների բացահայտումը կանխելու, հանցակիցներին, հետքերը, հանցավոր ճանապարհով ձեռք բերված առարկաները, հանցագործության կատարման գործիքներն ու միջոցները պարտակելու համար:

Քրեական գործով Աշոտ Զատիկյանի ու բանդայի 9 անդամների վերաբերյալ անջատված մասերը տարբեր ժամանակահատվածում ուղարկվել են դատարան, դատական քննության արդյունքում վերջիններս դատապարտվել են տարբեր ժամկետներով ազատազրկման, իսկ Աշոտ Զատիկյանը դատապարտվել է ցմահ ազատազրկման:

Ըստ «Դատալեքս» տեղեկատվական համակարգի՝ Աշոտ Զատիկյանը հետագայում մեկ այլ քրեական գործով էլ է դատվել: Ըստ դատական ակտի՝ նա, գտնվելով ցմահ ազատազրկման մեջ, առանց իրացնելու նպատակի՝ իր օգտագործման համար ապօրինի ձեռք է բերել խոշոր չափերով՝ մոտ 30 գրամ մարիխուանա թմրամիջոց և օգտագործել է: Աշոտ Զատիկյանը մեղադրվել է ՀՀ քրեական օրենսգրքի 268 հոդվածի 2-րդ մասի 2-րդ կետով: Այս գործով նրա հետ ամբաստանյալի աթոռին ևս երկու հոգի կար՝ թմրամիջոց իրացնելու մեղադրանքով: Գործը քննվել է դատավոր Արտուշ Գաբրիելյանի նախագահությամբ, և  2012 թվականի հուլիսի 17-ի դատավճռով Աշոտ Զատիկյանը դատապարտվել է 1 տարի 6 ամիս ազատազրկման: Այս պատիժը կլանվել է նախորդ պատժի մեջ, ու որպես վերջնական պատիժ՝  նորից նշանակվել է ցմահ ազատազրկում:

Բանդայի անդամներ Գ. Մաչանյանի և Տ. Խաչատրյանի նկատմամբ  հայտարարվել էր հետախուզում: Նրանք հայտնաբերվել են, ներկայացվել նախաքննական մարմնին:

Արդյունքում՝ Գ. Մաչանյանին  2020 թվականի մարտի 2-ին վերջնական մեղադրանք է առաջադրվել ՀՀ  քրեական օրենսգրքի 104 հոդվածի 2-րդ մասի 1-ին, 2-րդ, 6-րդ, 8-րդ, 11-րդ կետերով, 222 հոդվածի 2-րդ մասով:

Տ. Խաչատրյանին  2020 թվականի մարտի 3-ին վերջնական մեղադրանք է առաջադրվել ՀՀ քրեական օրենսգրքի 222 հոդվածի  2 –րդ մասով և 329 հոդվածի 1-ին մասով՝ 3 դրվագով:

Նշված անձանց հանցավոր գործողությունների արդյունքում տուժողներին պատճառվել է շուրջ 33,5 միլիոն դրամի նյութական վնաս: Նրանց անվամբ գրանցված գույքերի վրա արգելանք է կիրառվել:

Ըստ «Դատալեքս» տեղեկատվական համակարգի՝ Գ. Մաչանյանի խափանման միջոցը կալանավորումն է, նա բանդայի հիմնական անդամներից մեկն է՝ ըստ մեղադրանքի, իսկ Տ. Խաչատրյանի նկատմամբ կիրառվել է այլընտրանքային խափանման միջոց՝ գրավ: Տ. Խաչատրյանը, ըստ մեղադրանքի, իրեն հատկացված դերի շրջանակներում է մասնակցել բանդայի կողմից կատարված  հանցագործություններին և տրամադրել է իր անձնական օգտագործման «ՎԱԶ-2106» մակնիշի սպիտակ մեքենան:

Քրեական հետախուզման մեջ գտնվող մեկ մեղադրյալի և բանդայի հարձակումներին մասնակցած մյուս՝ քննությամբ չպարզված անձանց կապակցությամբ քրեական գործի անջատված մասով քննությունը շարունակվում է:

Այս թեմայով Նեթանյահուն ցանկանում է Էրդողանի դեմ մեղադրանքներ առաջադրել Միջազգային քրեական դատարանում Ենթակայանում բռնկված հրդեհի հետևանքով շուրջ 5 հազար բաժանորդ հոսանքազրկված է, միլիոնների վնաս է կրել. Ռոմանոս Պետրոսյան 6 տարի առաջ այս օրը ընկան հազարավոր ՏՂԱՆԵՐ Ոտնակոխ անելով Փաշինյանի այս հայտարարությունները` թփռոշացած ՔՊ-իստները գործող քաղաքապետ են «խաղացնում».ուր է հակակոռուպցիոնը Գեւորգ Սուջյանը նորություն ունի