«ԳՐԻԳՈՐ ԼՈՒՍԱՎՈՐԻՉԻ» ԱՌԵՂԾՎԱԾԸ

«Իրավունքը» նախորդ համարում անդրադարձել է «Սուրբ Գրիգոր Լուսավորիչ» ԲԿ-ի հերթական սկանդալային պատմությանը: ԲԿ-ն ամբողջությամբ ներգրավված է կորոնավիրուսի դեմ պայքարի գործում: Սակայն բացի ինֆեկցիոն բաժանմունքի բժիշկներից, մնացածներին չի տրամադրում համապատասխան հագուստ, որպեսզի բժիշկները կարողանան ապահովագրված լինեն կորոնավիրուսով վարակված հիվանդների հետ շփվելու ընթացքում: Ըստ շրջանառվող լուրերի` ստեղծված խտրական վերաբերմունքը արդարացի դժգոհությունների ալիք է բարձրացրել բժիշկների շրջանում: Ավելին, նույն լուրերի համաձայն, որոշ բժիշկներ չեն բացառում, որ հնարավոր է արդեն իսկ վարակված լինեն:

Այսպիսով, ինչո՞ւ է այս վիճակը. պարզաբանումներ փորձեցինք գրավոր կերպով ստանալ «Սուրբ Գրիգոր Լուսավորիչ» բժշկական կենտրոնի հանրային կապերի պատասխանատու Ծովինար Խաչատրյանից, ով անդրադառնալով բուժանձնակազմին տրամադրվող համազգեստներին, հետեւյալ պատասխանն է տվել.

– Բուժանձնակազմն ապահովված է ոչ միայն համազգեստով, այլեւ` անհատական պաշտպանիչ բոլոր անհրաժեշտ պարագաներով եւ նյութերով:

– Ճի՞շտ է արդյոք, որ տնօրենը վերջին շրջանում պարբերաբար բժիշկների անձնական գործերն է ուսումնասիրում: Եթե այո, ապա ինչո՞վ է դա պայմանավորված:

– Բժշկական կենտրոնի վերապրոֆիլավորմամբ պայմանավորված` աշխատակիցների աշխատաժամանակի փոփոխությունների, աշխատանքում ներգրավվածության եւ աշխատանքային պայմանների ապահովման նպատակով ընդունվում են համապատասխան անհատական իրավական ակտեր, հետեւաբար անհրաժեշտություն է առաջանում ուսումնասիրել նաեւ աշխատակիցների անձնական գործերը, որը պարունակում է աշխատանքային գործունեության եւ մասնագիտական որակավորման վերաբերյալ տվյալներ: Անձնական գործեր հանել, նայել, հրամանների նախագծեր կազմելը կադրերի գործն է, ինչը բնականոն աշխատանք է եւ արտառոց ոչինչ չկա դրանում:

– Կասե՞ք, ինչո՞վ է պայմանավորված, որ ադմինիստրացիան մեկուսացված է թանկարժեք «Թուֆենկյան» հյուրանոցում, իսկ բուժանձնակազմը՝ Ջրվեժում գտնվող «Սոչի» հյուրանոցում:

– Շատ տարօրինակ եւ սխալ տեղեկատվություն են Ձեզ տրամադրել: Թուֆենկյանում ընդամենը 9 հոգի են, որոնցից 8-ը բուժքույր է, մեկը կրտսեր բուժաշխատող: Հյուրանոցների տրամադրումը եւս եղել է հաջորդաբար, անձնակազմի տեղավորումն էլ ըստ այդմ եղել է հաջորդաբար տրամադրված հյուրանոցների հաշվարկով, չի եղել նախընտրություն: Սեփական քաղաքում հյուրանոցում բնակվելն արդեն իսկ բոլորի համար դիսկոմֆորտ է առաջացնում: Հյուրանոցների մեջ տարբերություն դնելը, լավ ու վատ անելն ինքնին զավեշտալի էր, էլ չեմ խոսում մամուլին սուտ տեղեկություններ տալու մասին:

– Ինչո՞վ է պայմանավորված, որ ադմինիստրատիվ աշխատողները շատ ավելին են վարձատրվում, քան` բուժանձնակազմը:

– «Սուրբ Գրիգոր Լուսավորիչ» ԲԿ ՓԲ ընկերությունում նոր կորոնավիրուսային համավարակով պայմանավորված վերապրոֆիլավորումից հետո դեռեւս աշխատողներին աշխատավարձ չի վճարվել, իսկ աշխատավարձի հաշվարկման համար հիմք է ընդունվելու ՀՀ աշխատանքային օրենսգրքով սահմանված կարգավորումները: Մասնավորապես` աշխատանքի վնասակարությունը, աշխատաժամանակը, ինչպես նաեւ՝ աշխատողների ձեւավորված (բազային) աշխատավարձը:

Նկատենք, որ թեեւ բժշկական կենտրոնի պատասխանատուն մեր բոլոր հարցերին փորձել է արդարացված պատասխաններ ներկայացնել, այնուամենայնիվ, մեր աղբյուրները շարունակում են պնդել, որ վերը նշված խնդիրներն իրապես կան ԲԿ-ում, բայց տնօրինությունն ամեն կերպ փորձում է, ինչպես մեր աղբյուրն է ասում. «Արտակարգ դրությամբ պայմանավորված բոլոր հարցերը ծածկադմբոց անելով` սղացնել»: Ի դեպ, այն, որ հարցերին պատասխանում են գրավոր, որի ժամանակ պարզապես բացառվում է ուղղող նոր հարցերի հնչեցումը, իր հերթին է շատ բանի մասին խոսում:

ԻԼՈՆԱ ԱԶԱՐՅԱՆ

Այս թեմայով Կրոնական հենքի վրա ռազմաքաղաքական դաշինք է ձեւավորվում ընդդեմ Իրանի Հայտնաբերվել է զինծառայող Գրիգոր Զաքարյանի դին՝ հրազենային վնասվածքով Շատ շուտով կսկսեն այլանդակ գործողություններ՝ ուղղված ռուսական 102-րդ ռազմաբազայի դեմ. Գրիգորյան Ձեզ ինչո՞ւ ենք ձայն տվել, որ հինգ տարի նստեք պառլամենտում ու ռեժիմով ծեծ ուտե՞ք. Գրիգոր Գրիգորյան Ռուսաստանը եթե դադարեցնի գազի մատակարարումը, հանգեցնելու է կատաստրոֆիկ հետեւանքների. Գրիգորյան