«Մի ծառայեք չար ու եկեղեցակործան, ազգակործան ուժերի, մեկ է՝ եկեղեցին հավետ է մնալու, իսկ այ՝ Ձեր անունները մաքրել չի լինելու».Գերաշնորհ Տ. ՄԻՔԱՅԵԼ ԱՐՔԵՊԻՍԿՈՊՈՍ ԱՋԱՊԱՀՅԱՆ

«Իրավունքի» հետ զրույցում Հայ եկեղեցու հետ կապված վերջին հայտնի սրացումներին, Գերաշնորհ Տ. ՄԻՔԱՅԵԼ ԱՐՔԵՊԻՍԿՈՊՈՍ ԱՋԱՊԱՀՅԱՆԸ նման կարծիք հայտնեց: Անկեղծ ասած, սպասում էինք կոշտ քննադատության: Սակայն Սրբազանը իր կոչմանն ու դիրքին վայել մոտեցում ցուցաբերեց.

- Սիրե՛ք իրար, իսկ իրար կարող եք սիրել` միայն Աստծուն սիրելով: Սիրե՛ք Ձեր եկեղեցին, սիրեք Ձեր հայրենիքը ու մի ծառայեք չար ու եկեղեցակործան, ազգակործան ուժերի: Մեկ է, եկեղեցին հավետ է մնալու, իսկ այ՝ Ձեր անունները մաքրել չի լինելու:

–  Սրբազան, ինչո՞վ եք պայմանավորում այս ատելության, չարության համատարած մթնոլորտը:

–  Գիտեք, արդեն չեմ զարմանում առկա ատելության, անհանդուրժողականության մթնոլորտից. բա սատանան չաշխատի՞: Բայց անհոգ եղեք, մենք էլ սատանայի դեմ ենք աշխատում: Անշուշտ, ցավալի է, որ մեզ մոտ կան նման մարդիկ, ովքեր կարողանում են, հանդգնում են եկեղեցուն, հոգեւորականին պիտակավորել: Միակ սփոփանքն այն է, որ նման մարդիկ մեծամասնություն չեն: Միայն մի բան եմ ուզում ասել այն զանգվածին, որոնք, կարծես, հոգիները սատանային են ծախել՝ եկեղեցին եղել է եւ միշտ էլ կմնա:

–  Ինչո՞ւ եկեղեցին սկսեց թիրախավորվել հատկապես վերջին երկու տարիներին:

–  Խանդից է գալիս: Ոմանք չեն կարողանում մարսել, որ եկեղեցին բարձր վարկանիշ ունի, որոշ ուժերի դա ձեռնտու չէ, եւ, բնականաբար, իրենք պետք է փորձեն այդ վարկանիշը իջեցնել: Թող փորձեն, ինչ կա որ, այնքա՜ն փորձող է եղել: Մի փորձող ավել, մի փորձող պակաս... Եթե ռեալ քննադատելու բան ունեն, թող ասեն, ոչ թե այսօրվա նման պարզապես չարախոսեն, զրպարտեն, վայրահաչեն: Թող խոսեն, մի օր խելքի կգան, հո չեն մնա: Կումունիստները խելքի եկան, իրենք խելքի չե՞ն գալու:

–  Բայց մենք տեսանք, թե Վեհափառի միասնության կոչից հետո ինչ արշավ սկսվեց ամբողջ եկեղեցու դեմ: Ինչո՞ւ:

–  Ակնհայտ երեւում է, որ այստեղ հատուկ նպատակ կա, ու ամենացավալին այն է, որ այդ նպատակը վատն է: Այն է՝ եկեղեցին վարկաբեկել, սեւացնել եւ վարկանիշը ցածրացնել, ինչը, բնականաբար, նրանց մոտ չի հաջողվելու: Եկեղեցու արմատները այնքան խորն են ժողովրդի սրտի, հոգու եւ մտքի մեջ, որ յոթանասուն տարվա աթեիզմը ոչինչ չի կարողացել անել. սրանք ի՞նչ պիտի կարողանան: Ցավում եմ ուղղակի, որ նման մարդիկ այսօրվա իշխանություններում են: Աստված բոլորին թող ների, իսկ եկեղեցին կշարունակի իր հաղթական ընթացքը` ծառայել մեր ժողովրդին, անգամ նրանց, ովքեր այսօր թիրախավորում են եկեղեցուն: Եկեղեցին չի խռովում իր ժողովրդից: Քարավանը գնում է, ինչքան ուզում է կողքից շունը հաչի, քարավանը շարունակելու է ընթանալ: Պարզապես, չարը հիմա ավելի ակտիվացել է, երեւի դրա նախապայմանները կան:

Զրույցը՝ ԻԼՈՆԱ ԱԶԱՐՅԱՆԻ

Այս թեմայով Ո՛չ Կառավարությունը պետք է դառնա եկեղեցական ժողով, ո՛չ Եկեղեցին՝ կառավարություն Եկեղեցու բարեփոխումը և Եկեղեցու պետականացումը նույն բանը չեն. Տեր Հեթում 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան Հայ Առաքելական եկեղեցին այսօր տոնում է Սուրբ Մարիամ. Աստվածածնի ծննդյան օրը. Սեպտեմբերի 8 Ստեփան Ասատրյանը ստո՞ւմ է. թամադան տեսանյութ է հրապարակել