«ԱՅՍ ՊԱՀԻՆ ՀՈԳԵԲԱՆԱԿԱՆ ԽՆԴԻՐՆԵՐԻ ԲՈՒՄ ՉԿԱ»

Ինչպե՞ս հաղթահարել մեկուսացման շրջանը, ի՞նչ հոգեբանական խնդիրների կարող է բախվել հանրությունը ստեղծված իրավիճակում, ի վերջո՝ որքանո՞վ էր պատրաստ մեր ազգը արտակարգ դրության ռեժիմին: Այս եւ այլ հարցերի շուրջ զրուցել ենք ճանաչված հոգեբան ՍԱՄՎԵԼ ԽՈՒԴՈՅԱՆԻ հետ, ով նախ նկատեց.

- Մեր ազգը շատ սթրեսադիմացկուն ու չափազանց հարմարվող ազգ է: Ցանկացած իրավիճակում հարմարվում են: Մերն էլ, հրեաներինն էլ հարմարվողականությունը շատ բարձր է: Առհասարակ, մենք՝ հայերս, շատ խելացի ենք, կյանքն է ստիպել, որ եթե խելք չաշխատացնես, չես կարող: Ունենք երեք կարեւոր հատկություն՝ ճկունություն, խելացիություն եւ սթրեսներին դիմակայելու ունակություն: Ինչ խոսք, իհարկե, այս մեկուսացումը որոշակի հոգեբանական ազդեցություն թողնում է մարդկանց վրա: Այսինքն, երբ մարդը զրկված է շփվելու, ազատ տեղաշարժվելու եւ այլ պահանջմունքները բավարարելուց, նրա մոտ, բնականաբար, առաջանում է տրամադրության անկում, կոնֆլիկտային իրավիճակներ են ստեղծվում տանը: Այս պահին մենք չենք կարող ասել, որ իրենց տներում մեկուսացած մեր հասարակության մոտ լուրջ հոգեբանական խնդիրներ ենք նկատում: Սակայն չմոռանանք, որ շատ մարդիկ կան, որ սովոր են եղել, որ ամբողջ օրը մինչեւ ուշ երեկո շփվեն իրար հետ, ընկերների հետ հանդիպեն, միջոցառումների մասնակցեն ու հիմա ստիպված են տանը մնալ: Դա, բնականաբար, հասարակության վրա բացասաբար է անդրադառնում եւ որոշակի դեպրեսիվ վիճակ առաջացնում է:

- Հոգեբանական ի՞նչ խնդիրների հետ կարող ենք բախվել՝ նման դեպրեսիվ իրավիճակից ելնելով:

- Այս պահին կոնկրետ այդպիսի հոգեբանական խնդիրների բում չկա: Ավելի շատ կա տագնապ: Երկու ծայրահեղություն ակնհայտ նկատելի է: Ոմանք բացարձակ թքած ունեն ամեն ինչի վրա, մտածում են, որ կորոնավիրուսը ոչ մի վտանգ չի ներկայացնում, մյուսներն էլ չափազանց սրված ձեւով են ընկալում իրավիճակը: Ընդհանուր առմամբ, հոգեբանական ճգնաժամ նկատելի չէ: Ուղղակի մարդիկ զգույշ են, տրամադրություններն ընկած է, նախկին ժպիտը դեմքներին չկա: Հոգեբանության մեջ կա ներքին ֆրուստրացիա արտահայտությունը, երբ մարդու որեւէ պահանջմունք չի բավարարվում. սեռական, սննդի, շփման, տեղեկատվության, աշխատելու: Դա բնական ագրեսիա է առաջացնում: Իսկ ագրեսիայի մեդալի մյուս կողմը դեպրեսիան է, ագրեսիան՝ ուղղված սեփական անձին:

- Ի՞նչ խորհուրդ կտաք մեր ընթերցողներին, ինչպե՞ս հաղթահարեն ի հայտ եկող հոգեբանական խնդիրները:

- Հոգեբանական խնդիրներ են առաջանում, երբ մարդը բոլորովին մեկուսանում է: Ուստի պետք է դուրս գան, մի քիչ քայլեն, իհարկե՝ դիմակ կրելով: Կարող են ֆիզիկական վարժություններ անել, գիրք կարդալ, տան մաքրությամբ զբաղվել: Մեկուսացման դեպքում տագնապներ են առաջանում, քանի որ մարդու մոտ չի բավարարվում շփումը, ուստի պետք է նոր գործերով առօրյան լցնել:

Զրույցը՝ ԻԼՈՆԱ ԱԶԱՐՅԱՆԻ

Այս թեմայով Այն ճանապարհը, որն ընտրել է Հայաստանի իշխանությունն ու այդ իշխանությանն ընտրած ժողովուրդը, անհամատեղելի է Արցախ ունենալու հետ. Սամվել Շահրամանյան Երեւանն արդեն շատ մեծ է, դրա համար չվում են Տիգրանաշեն․ ԸՆԿԵՐ ՓԱՆՋՈՒՆԻ Ռուսները նստան պոեզ, Մոսկվա գնացին, «Ուժեղ Հայաստանի» հայերը անտեր ու դուս պատերի տակ մնացին․ ԸՆԿԵՐ ՓԱՆՋՈՒՆԻ Սամվել Կարապետյանը դատի է տվել Նիկոլ Փաշինյանին․ պահանջում է 3 մլն դրամ և ներողություն խնդրել Ստեղծվում է համակարգ, որը մի կողմից չի աշխատի, մյուս կողմից մարդկանց կդնի հերթական սահմանափակումների տակ. Սամվել Մարտիրոսյան