ԷՍ ԷԼ «ՆՈՐ ՀԱՅԱՍՏԱՆԸ»

Դեռեւս մարտի 30-ին գրավոր հարցում էիք ուղարկել Արդարադատության նախարար Ռուստամ Բադասյանին՝ հետաքրքվել, թե ի՞նչ է ենթադրում օրենսդրությունը այն անձի համար, ով հրաժարվում է դատարանի վճիռը կատարելուց: Մասնավորեցնելով, թե կոնկրետ ինչ է նախատեսում օրենքը Առողջապահության նախարար ԱՐՍԵՆ ԹՈՐՈՍՅԱՆԻ համար, ով հրապարակավ հրաժարվեց դատական վճիռը կատարելուց:

Արդեն անցել է օրենքով սահմանված հնգօրյա եւ, առհասարակ, այդ պարզ հարցին պատասխանելու ամեն մի ողջամիտ ժամկետ: Բայց ահա, ի պատասխան մեր գրավոր հարցման եւ դրա պատասխանելու մասին մեր հերթական հիշեցման, նախարարությունից մեզ ընդամենը պատասխանեցին, որ մեր հարցումը ընթացքի մեջ է: Եվ միայն ավելի ուշ ժամի ստացանք նախարարության այս պատասխանը.

«Ձեր 2020 թվականի մարտի 27-ի թիվ Մ/12957-2020 գրության՝ հայտնում եմ հետեւյալը.

«Դատական օրենսգիրք» սահմանադրական օրենքի 13-րդ հոդվածի համաձայն՝

«1. Եզրափակիչ դատական ակտը դատարանը կայացնում է Հայաստանի Հանրապետության անունից:

2. Օրինական ուժի մեջ մտած դատական ակտերը պարտադիր են դրանց հասցեատերերի համար:

3. Օրինական ուժի մեջ մտած դատական ակտը չկատարելն առաջացնում է օրենքով նախատեսված պատասխանատվություն»:

ՀՀ քաղաքացիական դատավարության օրենսգրքի 5-րդ հոդվածի 5-րդ եւ 7-րդ մասերի համաձայն`

«5. Օրինական ուժի մեջ մտած դատական ակտը, ինչպես նաեւ դատարանի պահանջները կատարման համար պարտադիր են դրանց հասցեատերերի համար եւ ենթակա են կատարման Հայաստանի Հանրապետության ամբողջ տարածքում:

(…)

7. Դատական ակտի եւ դատարանի պահանջների չկատարումը հանգեցնում է օրենքով նախատեսված պատասխանատվության»:

Վերոշարադրյալի համատեքստում անհրաժեշտ է նշել, որ օրինական ուժի մեջ մտած դատական ակտը օրինական ուժի մեջ մտնելու պահից ձեռք է բերում պարտադիրության եւ կատարելիության հատկանիշներ, որից ուղղակիորեն բխում է, որ օրինական ուժի մեջ մտած դատական ակտը պարտադիր է դրանց հասցեատերերի համար եւ ենթակա է կատարման Հայաստանի Հանրապետության ամբողջ տարածքում»:

«ՀՀ օրենսդրությամբ նախատեսվել են պատասխանատվության միջոցներ օրինական ուժի մեջ մտած դատական ակտը չկատարելու համար (Վարչական իրավախախտումների վերաբերյալ ՀՀ օրենսգրքի 206.9-րդ եւ ՀՀ քրեական օրենսգրքի 353-րդ հոդվածներ): Կախված կոնկրետ դեպքից, կարող են վրա հասնել օրենքով նախատեսված տարբեր հետեւանքներ:

Ինչ վերաբերում է այն հարցին, թե արդյոք կոնկրետ անձի՝ Արսեն Թորոսյանի կողմից դատական ակտը կատարվել է, թե` ոչ, եւ ինչ հետեւանքներ կարող են վրա հասնել դատական ակտը չկատարելու դեպքում, ապա այս հարցերը դուրս են ՀՀ արդարադատության իրավասության շրջանակից»:

Վերջին արդարացումը, թե՝ նախարար Թորասյանն իրենց գործը չէ, իհարկե, լավ արդարացում էր: Բայց ֆիքսենք սա. նախարար Թորոսյանը պարտավոր է կատարել դատական ակտը (իհարկե, առանց Արդարադատության նախարարության էլ, դա պարզ էր), բայց հրապարակավ հայտարարել է, որ չի էլ պատրաստվում: Նրան կպարտադրեն կատարել, թե՝ ոչ, այլ հարց է: Մինչ այդ նկատենք, որ հայտարարելով դատական ակտը չկատարելու մասին` նա, մեղմ ասած, արհամարհանք է դրսեւորել ինչպես հայաստանյան «շարքային» օրենքների, այնպես էլ՝ Սահմանադրության նկատմամբ: Ամեն մի իրեն հարգող երկրում վարչապետը պարտավոր էր անհապաղ կարգի հրավիրել իր նախարարին, իսկ ավելի ռեալ, սա մի արարք է, որին պետք է հաջորդեր պաշտոնանկություն: Հենց դա է, որ չտեսանք, այսինքն՝ նախարարն իրեն համարեց օրենքից վեր, իսկ ահա «նոր Հայաստանից» անդադար խոսող վարչապետը պարզապես լռեց: Իսկ Սահմանադրության երաշխավոր կոչված Արմեն Սարգսյանը... Լավ, անլուրջ բաներից չխոսենք: Չնայած, վարչապետը չի Թորոսյանին դրել, որ հիմա էլ՝ հանի:

ԻԼՈՆԱ ԱԶԱՐՅԱՆ

Այս թեմայով 200 հազար դրամից ցածր աշխատավարձ ստացողները ներգրավվելու են ապահովագրության համակարգում. Թորոսյան Նվազագույն կենսաթոշակը կբարձրանա՝ դառնալով 47 հազար դրամ. սոցփաթեթի ծրագիրը հունվարից կավարտվի. Թորոսյան Թաղման նպաստները կստանան միայն անապահովները, կենսաթոշակը 1000 դրամով կբարձրանա. Արսեն Թորոսյան Տեր Աստված, ներիր խոսքերիս համար, բայց սրանք ուզում են մեր տղեքին սարքեն անհիշատակ մեռել․ Ղուկասյան Օլիմպիական փոխչեմպիոնի վերադարձը. Արսեն Ջուլֆալակյանը ոսկե մեդալ է նվաճել Արգենտինայի դրոշի ներքո