3 ԱՆՉԱՓԱՀԱՍ ԵՐԵԽԱ, 2 ԳՈՐԾԱԶՈՒՐԿ ԾՆՈՂ ԵՎ 0 ՊԵՏԱԿԱՆ ՕԳՆՈՒԹՅՈՒՆ

Ինչպես հայտնի է, ՀՀ կառավարությունը, խոստացել է կորոնավիրուսի պատճառով առավելագույն օգնություն ցուցաբերել երկրի բնակչությանը: Սակայն տարբեր ծրագրեր այն տեսքն ունեն, որ փաստացի դրանցից կարող են օգտվել միայն փոքր թվով մարդիկ:

Եվ ահա պարզվում է, որ անգամ այդ փոքր թվով մարդիկ խնդիրներ ունեն: Այսպես, կառավարությունը մասնավորապես խոստացել էր օգնել այն ընտանիքներին, որոնք ունեն անչափահաս երեխա, իսկ ծնողը սահմանված ժամանակահատվածում գործազուրկ է դարձել: Եվ ահա քաղաքացին, որը դիմել էր մեզ, պատմեց հետեւյալը. «Ունենք երեք անչափահաս երեխա: Ես մինչ այս էլ չէի աշխատում, ամուսինս եւս գործազուրկ է, օրական հիմունքներով պատահական աշխատանք էր կատարում, այդպես էլ գոյատեւում էինք: Բայց հիմա ամեն ինչ կանգնած է, անգամ այդ աշխատանքը չկա: Չունի նաեւ գործազուրկի կարգավիճակ: Դիմել ենք օգնության համար: Համապատասխան կայքում միայն մեծ դժվարությամբ հասկացանք, թե ինչ պետք է անել. երեւի այդպես են արել, որ հնարավորին քի՞չ մարդ դիմի: Ինչեւէ, գտանք եւ բոլոր պահնաջվող լրացումներն ու մանրամասները ներկայացրինք: Ուղարկում ենք նամակը, եւ ոչ մի արձագանք: Փորձեցինք երկու-երեք անգամ, ինչ-որ անհասկանալի նամակ ստացանք եւ վերջ: Այդպես էլ որեւէ օգնություն, գոնե այս պահին, չենք ստացել: Եվ ոչ միայն մենք. ընկերուհիս նույն կարգավիճակում է, նորից դիմում է, ու ոչ մի արդյունք: Ինչպե՞ս վարվենք»:

Վերոնշյալ խնդրի շուրջ պարզաբանում փորձեցինք ստանալ ՀՀ աշխատանքի եւ սոցիալական հարցերի նախարարության լրատվականից, որտեղից մեզ կարճ պատասխանեցին. «Պետք չէ ո՛չ նամակ գրել, ո՛չ դիմում: Պարզապես պետք է մտնել եւ նշված վայրում հավաքելով անուն ազգանունը եւ անձանագրի տվյալները` ստուգել՝ ընդգրկվա՞ծ են տվյալ օգնության շահառուների մեջ, թե՝ ոչ: Մեզ ՊԵԿ-ը ուղարկում է բոլորի տվյալները եւ բազայում այն մուտքագրվում է, իսկ հղիների մասով` Առողջապահության նախարարությունն է տվյալները ուղարկում: Այնպես որ, եթե ընդգրկված լինեն, նրանց ծանուցում կգա` առանց կայք մտնելու էլ»:

Ի՞նչ է ստացվում. եթե տվյալները ստանում են ՊԵԿ-ից, ապա բոլոր դեպքերում, երբ երեխաների ծնողները գործազուրկ էին այս կորոնավիրուսից էլ առաջ, պարզապես չեն էլ կարող լինել շահառուների թվում: Ընդ որում, ֆիքսենք՝ խոսքը ամենաանպաշտպանների մասին է, որոնց վիճակը հիմա դարձել է ծայրահեղ ծանր: Միգուցե, ժամանակի ընթացքում նրանց օգնելու համար էլ բարեհաճեն մի քանի կոպեկ նետել: Բայց դա էլ լուծում չէ. մարդիկ հենց այս պահին են բառացիորեն սոված: Ինչ վերաբերում է մեր դիմումատուի հարցին, թե ինչ անեն, երեւի պատասխանը սա է. հետեւեք, թե ինչպես են վերնախավային ընտանիքների երեխաներն ու անգամ՝ վերին չինովնիկությունը ամեն առիթով ուտելիքներով նկարներ հրապարակում, նայեք այդ ուտելիքներին ու դրանով փորձեք յոլա գնալ: Մի քիչ էլ, մինչեւ դերերը կփոխվեն:

ՔԵՐՈԲ ՍԱՐԳՍՅԱՆ

Այս թեմայով Հայաստանում արձանագրվել է կորոնավիրուսային հիվանդության 70 դեպք Թե ինչու Բայդենը կորոնավիրուս ընկավ Ինչո՞ւ եք ձեզ խողովակի տեղ դնում, ժողովրդին էլ ավանակի տեղ. Գրիգոր Գրիգորյան Կենսաբանական գրոհ է նախապատրաստվում. Գրիգոր Գրիգորյան Նախապատրաստվում է ներքին հեղաշրջում՝ ամերիկյան սցենարով. Գրիգոր Գրիգորյան