Էրդողանը հարված է հասցնում, որի պատասխանն ավելի հուժկու պետք է լինի. Կարեն Հովհաննիսյան

Թուրքիայի նախագահ Էրդողանը պատրաստակամություն է հայտնել դեղորայքային օժանդակություն ցուցաբերել Հայաստանին` համավարակի դեմ պայքարելու համար, ինչպես նաեւ դյուրացնել Թուրքիայից հայրենիք վերադառնալ ցանկացող Հայաստանի քաղաքացիների մեկնումը: Այս մասին Էրդողանը հայտնել է Պոլսո Հայոց պատրիարք Գերաշնորհ Տեր Սահակ արքեպիսկոպոս Մաշալյանի հետ կայացած հեռախոսազրույցի ժամանակ, ինչի մասին տեղեկացրել է Պատրիարքարանը: Թե ի՞նչ է թաքնված Էրդողանի այս «մարդասիրական» ականի տակ, «Իրավունքը» պարզեց թուրք-քրդական հարցերով անկախ փորձագետ ԿԱՐԵՆ ՀՈՎՀԱՆՆԻՍՅԱՆԻ տեսակետը:

– Էրդողանի, այսպես ասած, «բարեկամական» ժեստին սպասում էի հենց այն պահից, երբ մեր երկրում արտակարգ դրություն հայտարարվեց: Սակայն Էրդողանը շատ ավելի դիվանագիտորեն մոտեցավ եւ այս ժեստը կատարեց այն պահին, երբ հենց իր երկրի ներսում խնդիրներ կային, մասնավորապես` որոշակի նահանգներում կոնկրետ դեղորայքների եւ բժշկական այլ պարագաների պակաս կա: Այս առումով էրդողանը, կարծես թե, լուծեց առնվազն  երկու հարց. առաջինը` ներքին լսարանին փորձում է ապացուցել, որ այնքան են իրենք ապահովված բժշկական սարքավորումներով, դեղորայքով, որ կարող են անգամ Հայաստանին օգնություն առաջարկել, եւ երկրորդ` փորձում է աշխարհին ցույց տալ, թե այնքան հումանիտար է, որ կարող է, մեղմ ասած, դիվանագիտական հարաբերություններ չունեցող երկրին կամ թշնամի երկրին առաջարկել նմանատիպ մարդասիրական օգնություն: Եվ հետաքրքիր է այն, որ էրդողանի այդ մեսիջը կատարվեց ոչ թե ինչպես ընդունված է` Առողջապահության միջազգային կազմակերպության միջնորդությամբ, այլ` հենց կոնկրետ Հայ Առաքելական եկեղեցու միջնորդությամբ կամ խողովակներով:

– Ինչի՞ մասին է սա փաստում:

– Իրականում Էրդողանը սրանով փորձում է ցույց տալ, որ այնքան է մտերմացել պատրիարքի հետ, որ կարող է հենց ուղիղ երկխոսության գնալ Հայաստանի հետ ու առաջարկել այդ օգնությունը: Այսինքն` փորձ է կատարվում ցույց տալ, թե եթե ուզենք, կարող ենք ինքնուրույն գնալ երկխոսության` ուղիղ ճակատով:

– Այս դեպքում` պե՞տք է պետական բարձր մակարդակով արձագանք լինի էրդողանական մեսիջներին, թե` ոչ:

– Գտնում եմ, որ պատադիր պետք է պատասխան հնչի մեր կողմից, եւ այն պետք է լինի` դիվանագիտորեն հավուր պատշաճի: Առաջին հայացքից գուցե թվում է, թե Էրդողանը մարդասիրական որեւէ քայլ է կատարում, բայց իրականում հարված է հասցնում: Հետեւաբար, մենք էլ պետք է փորձենք այդ հարվածին ավելի հուժկու հարվածով պատասխանել: Ճիշտ է, շատ փորձագետներ ասում են, թե պետք չէ պատասխանել, բայց ես պնդում եմ հակառակը` մենք պետք է անպայմանորեն պատասխանենք, եւ այն շատ ավելի հուժկու պետք է լինի, քան Էրդողանի այդ առաջարկը:

– Ինչո՞ւ նախկինում նման առաջարկներ չէին հնչում Էրդողանի կողմից, ինչո՞վ է այս փուլը նպաստավոր նման ցինիզմի համար:

– Էրդողանը պարզապես փորձում է օգտվել համավարակի հետ կապված իրավիճակից, որպեսզի հետագայում, այսպես ասած, արտաքին քաղաքականության մեջ կարողանա մեջբերել, թե` այ տեսեք, ես այսպիսի քայլ եմ կատարել: Բացի այդ, ինչպես արդեն նշեցի, էրդողանը փորձում է իր ներքին լսարանին հանգստացնել, որ իրենք ապահովված են ամեն ինչով` այն աստիճանի, որ նույնիսկ կարող են դեղորայքով եւ բժշկական պարագաներով ապահովել Հայաստանի նման երկրին:

ՀՐԱՆՏ ՍԱՐԱՖՅԱՆ

Այս թեմայով «Ժողովուրդ». Իրավապահները կուսումնասիրեն ՔՊ-ական Կարեն Համբարձումյանի եղբոր մասին բացահայտումները Թուրքական ավիաընկերությունները չեղարկել են դեպի Իրան չվերթները. վերադարձվել է ավելի քան 50.000 տոմս «Իրավունք». Փաշինյանը «հաթաթա» է տվել «Շեֆ ջան, մենք պրոբլեմ չունենք» ասողներին Հայտնի է մարզպետից՝ համայնքապետ ձգտման պատճառը ԵԽԽՎ զեկույցից ընդդիմությունը գոհ լինելու շատ հիմնավոր պատճառներ չունի․ Արփինե Հովհաննիսյան