«ԵՐԿՐՈՐԴ «ՓԱԶԼՆ» ԱՎԵԼԻ ԽՈՇՈՐ Է, ՈՐԻ ՇՐՋԱՆԱԿՈՒՄ ԴԻՏԱՐԿՎՈՒՄ Է ՂԱՐԱԲԱՂՅԱՆ ՀԱՐՑԸ»

Ըստ Մոսկվայի Միջազգային հարաբերությունների պետական ինստիտուտի Եվրատլանտյան անվտանգության կենտրոնի առաջատար գիտաշխատող, քաղաքագետ ՍԵՐԳԵՅ ՄԱՐԿԵԴՈՆՈՎԻ` այսօրվա դրությամբ ղարաբաղյան հակամարտության կարգավորման հնարավորությունները փոքր են: Իսկ ինչ վերաբերում է նախագահական ընտրություններին եւ երկրորդ փուլի հնարավորությանը, ռուս քաղաքագետն ընդգծեց, որ պաշտոնական Երեւանը դեռ իր խոսքը չի ասել` հավանաբար ենթադրելով, որ ամեն ինչ մեկ փուլով կավարտվի: Նրա կարծիքով` կարելի է գոնե խորհրդանշական մի խոսք ասել` որպես Արցախի անվտանգության երաշխավոր:

- Բավարար է նայել Նիկոլ Փաշինյանի եւ Իլհամ Ալիեւի մյունխենյան դիալոգը` հասկանալու, որ այս խնդրում մեծ առաջընթաց չկա: Ռուսաստանի համար կարեւոր է, որ, եթե այս հակամարտությունը սառեցված չի մնալու, ապա գոնե չդրսեւորվեն էսկալացիոն բացասական նշաններ, ինչը տեղի ունեցավ 2016-ի ապրիլին: Սրանում է մտահոգություններից մեկը: Երկրորդ «փազլն» ավելի խոշոր է, որի շրջանակում դիտարկվում է ղարաբաղյան հարցը, սա վերաբերում է Մեծ Հայաստանի իրավիճակին: Եվ որքան էլ խոսենք Հայաստան-Արցախ, այսպես ասած, դիստանցիայից, Արցախի  կախվածությունը Հայաստանից մեծ է` ռազմական, անվտանգային հարցերում: Իսկ վերջերս ականատեսն ենք նաեւ ինչ-որ առումով քաղաքական կախվածության: ՀՀ-ում 2 տարի առաջ իշխանություն փոխվեց, եւ մենք տեսանք, թե ինչպես քայլ առ քայլ ՀՀ նոր իշխանությունները վերաձեւեցին, վերակազմավորեցին հայկական քաղաքական էլիտայի համար առանցքային սեգմենտները. առաջինը` Երեւանի քաղաքային իշխանությունը, ինչի դերակատարումից եթե խոսենք, կարող ենք ասել, որ այն  համազգային նշանակություն ունի` հաշվի առնելով ՀՀ ընտրողների ընդհանուր թվում երեւանցիների քանակը, երկրորդ` ԱԺ-ն, որտեղ մեծամասնություն է իշխող կուսակցությունը, երրորդ` մենք տեսանք, թե ինչ կատարվեց դատական համակարգի շուրջ: Ապրիլի 5-ին պետք է տեղի ունենար հանրաքվե, ինչը, կորոնավիրուսի համավարակի տարածմամբ պայմանավորված, չկայացավ: Այսինքն` սրա հետ կապված իրավիճակը սառեցված է, բայց շարունակություն կունենա: Եվ վերջապես, ՀՀ եւ Արցախի իշխանությունների միջեւ` ի դեմս Նիկոլ Փաշինյանի եւ Բակո Սահակյանի, կային որոշակի խնդիրներ, եւ Փաշինյանը կցանկանար Արցախի նախագահի պաշտոնում այլ մարդու տեսնել` հաշվի առնելով ՀՀ մեծ քաղաքականության, Քոչարյանի հետ կապված ֆակտորները, չմոռանանք, որ Բակո Սահակյանը երաշխավոր եղավ, որ Ռ. Քոչարյանին կալանքից ազատեն: Նիկոլ Փաշինյանի շուրթերից հնչել է նաեւ, որ Ղարաբաղը դա մի վանդեա է (հակահեղափոխության օջախ), ինչը չպետք է թույլ տալ:

ՀՐԱՆՏ ՍԱՐԱՖՅԱՆ

Այս թեմայով Մտորումներ Վալենտին Օսկոցկու եւ հայկական Ղարաբաղի կրկնվող ողբերգության մասին Այն ճանապարհը, որն ընտրել է Հայաստանի իշխանությունն ու այդ իշխանությանն ընտրած ժողովուրդը, անհամատեղելի է Արցախ ունենալու հետ. Սամվել Շահրամանյան 6 տարի առաջ այս օրը ընկան հազարավոր ՏՂԱՆԵՐ Արցախյան գեներալիտետից ոչ մեկ մոտ չի գալիս. Ինչ են պլանավորում արցախահայերը Վեճ՝ արցախցիների հարցով քննարկման ընթացքում․ ՔՊ-ն լքեց դահլիճը․ «Չեմ հասկանում՝ ով է հարցը լուծելու»