«Գազպրոմ Արմենիա՞ն» է ստում, թե` Մարուքյանը

Բավական տարօրինակ հայտարարությամբ հանդես եկավ «Գազպրոմ Արմենիա» ընկերությունը: Այսպես, ընկերությունը պնդում է, թե` «մամուլում և սոցիալական ցանցերում տեղ են գտել առանձին հրապարակումներ», որոնցում «անհարկի շահարկվում է մատակարարված բնական գազի դիմաց  բնակիչ-բաժանորդների կողմից  սահմանված ժամկետներում համապատասխան վճարումներ չկատարելու դեպքում ԳՄՕԿ-ով և բնական գազի մատակարարման պայմանագրերով նախատեսված գազամատակարարման դադարեցման գործընթացը»: Այնուհետեւ ընկերությունը պնդում է. «Հիմք ընդունելով Հայաստանի Հանրապետությունում հայտարարված  արտակարգ դրության պայմաններում  Պարետի որոշումները և ՀՀ հանրային ծառայությունները կարգավորող հանձնաժողովի հայտարարությունը առ այն, որ ստեղծված իրավիճակը  բնակիչ-բաժանորդների կողմից  վճարումներ  կատարելու համար մինչև արտակարգ դրության ավարտը ճանաչվել է խոչընդոտող ֆորս մաժոր՝ անհարկի շահարկ ՓԲԸ-ն մինչև ՀՀ կառավարության որոշմամբ հաստատված արտակարգ դրության ավարտը  ձեռնպահ կմնա բնակիչ-բաժանորդների կողմից վճարման պարտավորության չկատարման դեպքում գազամատակարարումը դադարեցնելու գործընթացից»:

Բայց չէ՞ որ երեկվա դրությամբ ներկայացվել են կոնկրետ փաստեր, որ ընկերության տեսուչները չվճարումների պատճառով անջատում են մարդկանց գազը: Ավելին, տեսագրությամբ հաստատված նման փաստ ներկայացրեց նաեւ ԱԺ խմբակցություններից մեկի ղեկավարը` Էդմոն Մարուքյանը: Ու երբ ընկերությունն այդ հրապարակումները համարում է «անհարկի շահարկում», նշանակում է, որ նաեւ Մարուքյանի՞ն է մեղադրում ստախոսության մեջ: Լավ, այդ դեպքում ինչպե՞ս են հերքելու նույն Մարուքյանի ներկայացրեց տեսագրությունը, որտեղ ընկերության տեսուչը պարզ հայտարարում է` «Վառել ես, պետք է մուծես», ու կազմում է գազն անջատելու արձանագրությունը: Այն դեպքում, երբ «Գազպրոմ Արմենիան» էլի էր հայտարարել, թե անջատումներ չեն լինի: Այսպիսով, կա´մ պետք է ասեն, որ Մարուքյանի ներկայացրածը մոնտաժված տեսագրություն է: Կա´մ էլ, որ իրենք այլ հրահանգ են տվել, սակայն տեսուչը  չի ենթարկվել, հակառակն է արել եւ նա արդեն իսկ պատժված է: Եթե ոչ մեկը, ոչ էլ` մյուսը, դա կնշանակի, որ ընկերությունն է կեղծում` խոսելով «անհարկի շահարկման» մասին: Այսինքն, որ չնայած ընկերության հրապարակային հայտարարություններին, իրականում տեսուչներին բոլորովին այլ հանձնարարական է տրված: Դա էլ նշանակում է, որ հերթական հայտարարությունը եւս, թե անջատումներ չեն լինի, առնվազն կասկածելի է:

Ս.Աբրամյան

Այս թեմայով «Իրավունք». Ով է ստում․ Ավինյանը, թե՞ Փաշինյանը Արփինե Դավոյանը բացահայտ ստում է․ պարզաբանում Թալինի եկեղեցու հոգևորականի բնակարանի վերաբերյալ Կոչ եմ անում՝ չտրվել հերյուրանքներին․ Մհեր Արմենիան փակագծեր է բացում «Գազպրոմ»-ի բաժնետոմսերը հասել են պատմական նվազագույնի «Ժողովուրդ». ՀՀ կառավարությունը որոշել է ստուգումներ սկսել «Գազպրոմ Արմենիա» ՓԲԸ-ում