ԹՌԻՉՔՆԵՐ ԳՐԵԹԵ ՉԿԱՆ, ԻՍԿ ՀՀ ԱԳՆ-Ն ՄԱՐԴԿԱՆՑ ՀՈՐԴՈՐՈՒՄ Է՝ ԹՌՉԵԼ

Երեկ մի ցնցող մտքով հաջողացրեց աչքի ընկնել նաեւ ՀՀ ԱԳՆ-ն: Ու ինչու չանի, եթե պետական մյուս գերատեսչություններն իրար հերթ չեն տալիս՝ ապշելու հայտարարություններ անելով:

Այսպես, ՀՀ ԱԳՆ-ն Ռուսաստանից Հայաստան վերադառնալ ցանկացող ՀՀ քաղաքացիներին հորդորում է օգտվել բացառապես օդային ուղիներից: «Վրաստանի կառավարության որոշման համաձայն՝ մարտի 18-ից սկսած բոլոր արտասահմանցիների մուտքը Վրաստան արգելված է: Հետեւաբար, նույնիսկ եղանակային պայմանների բարելավման եւ դեպի Լարս տանող ավտոճանապարհի բացման պարագայում ռուս-վրացական սահմանը հնարավորություն կունենան հատել միայն բեռնատարները եւ իրենց հայրենիք վերադարձող Վրաստանի եւ ՌԴ քաղաքացիները: Վերին Լարսի անցակետն անժամկետ փակ է օտարերկրացիների համար...»: Ուստիեւ, ՀՀ քաղաքացիներին ԱԳՆ-ն խորհուրդ է տալիս. «Ռուսաստանից Հայաստան վերադառնալու համար օգտվել բացառապես օդային ուղիներից, մասնավորապես՝ մոտակա Կրասնոդար եւ Դոնի Ռոստով քաղաքների օդանավակայաններից»:

Բայց ինչպե՞ս, եթե ՌԴ-ի հետ ավիահաղորդակցություն եւս չկա, իսկ օրինակ` «Պոբեդան» երեկ հայտարարեց՝ թռիչքները դադարեցնելու մասին: Հայաստանում գործող մի շարք ավիաընկերություններ դադարեցրել են, անգամ երկկողմ ուղղություններով, մասնավորապես` դեպի Մոսվա, Ռոստով, Կրանսոդար եւ Սոչի տոմսերի վաճառքը: Այս մասին տեղեկացանք մի քանի ավիաընկերություններ զանգահարելուց հետո: Օրինակ` «Արօն», «Արմենիա Թրեվլ», «Ֆեստա տուր» ավիաընկերությունները մեզ հետ զրույցում տեղեկացրին, որ ՀՀ-ից չվերթներ չեն իրականացվում, քանի որ ՀՀ քաղաքացիների մուտքը ՌԴ արգելված է՝ կորոնավիրուսով պայմանավորված, իսկ հակառակ ուղղությամբ` միայն ՀՀ քաղաքացիների մուտքն է թույլատրվում, այն էլ` շատ քիչ ռեյսեր են գործում: Քաղավիացիայի կոմիտեիից փորձեցինք հետաքրքրվել` արդյոք կա պաշտոնական չվերթների չեղարկման որոշում, լրատվական բաժնից տեղեկացրին, որ «Պաշտոնական չեղարկման որոշում` տվյալ ուղղություններով, այս պահին դեռ չկա: Պարզապես, ավիաընկերությունները, հաշվի առնելով ստեղծված իրավիճակը, հնարավոր է, որ չեղարկեն` առանց մեզ տեղեկացնելու: Այլ մանրամասների համար հետեւեք մեր պաշտոնական էջին»:

Ամեն դեպքում, ՌԴ-ից Հայաստան այս պահին մատերի վրա հաշված չվերթներ կան (առնվազն երեկվա դրությամբ), ընդ որում, ըստ որոշ խոսակցությունների, տոմսերի գներն այնպես են բարձրացել, որ միայն հատուկենտ մարդիկ կարող են իրենց նման շռայլություն թույլ տալ: Ու այս իրավիճակում տեսնես ՀՀ ԱԳՆ-ն տուն վերադառնալու ցանկություն ունեցող ՀՀ քաղաքացիներին այդ ո՞ր «օդային ուղիներով» է հորդորում թռչել:

ԻԼՈՆԱ ԱԶԱՐՅԱՆ

Այս թեմայով Հուսիթները նավթի համաշխարհային գների նոր թռիչք առաջացրեցին ԶԳՈՒՇԱՑԵՔ. 08.08 հայելային օր է, լի բացահայտումներով Իրանական ռազմական բեռնատար ինքնաթիռը թռիչք է կատարել Թեհրանից դեպի Մոսկվա Որոշ եվրոպական ավիաընկերություններ ավիավառելիքի բարձր գների պատճառով կարող են սնանկանալ. Ryanair Ավելի քան 3400 թռիչք է հետաձգվել տարածաշրջանում բռնկված նոր լարվածության պատճառով