«ՄՈԳՈ» ՎԱՐԿԱՅԻՆ ԿԱԶՄԱԿԵՐՊՈՒԹՅՈՒՆԸ ՁԵՐ ՓՈԽԱՐԵՆ ՈՐՈՇՈՒՄ Է, ՈՐ ՁԵՐ ՎԱՐԿԸ ՀԱՍՏԱՏՎԱԾ Է

Երկու օր առաջ տողերիս հեղինակը որոշեց հեռախոսով երգ ներբեռնել: Արդյունքում պարզվեց, որ ոչ միայն երգը ներբեռնվեց, այլ, ինչպես ժողովուրդն է ասում` հազար ու մի զրթուզիբիլ էլ հետը: Այդ թվում` մի շարք գովազդներ, որոնք ոչ միայն անպետք էին, այլ նաեւ՝ զզվեցնող:

Հատկապես անկոչ հյուրի նման հեռախոս խցկվեց «ՄՈԳՈ» ունիվերսալ վարկային կազմակերպության ինչ-որ գովազդ: Իսկ ամենավատն այն է, որ այդ գովազդ կոչվածը կարող է մարդկանց համար թակարդ կամ հոգեբանական բարդ խնդիր դառնալ: Այսպես, ներբեռնելուց հետո հանկարծ պարզվեց, որ սույն կազմակերպությունը ձեր փոխարեն որոշում է, որ դուք վարկ եք ցանկանում ստանալ, հետո վարկային մենեջերը ձեր փոխարեն մտածում է՝ ձեզ վարկ տրամադրի, թե՝ ոչ: Ու մեկ էլ` «ԲԻՆԳՈ». ձեր վարկը հաստատվել է` 250 000 դրամ, շնորհավորում ենք...

Բայց կներեք, ի՞նչ վարկ, այդ ինչպե՞ս, եւ ո՞վ իմ փոխարեն որոշեց, որ ես վարկ եմ ուզում: Ստացվում է, որ ինչ-որ մեկը մեր փոխարեն մտածում է, եւ հենց ինչ-որ մեկն էլ որոշում է, որ այն հաստատված է: Այս մտքերի մեջ ընկնելով` փորձեցի պարզել՝ ի՞նչ տեղի ունեցավ այս արտակարգ իրադրության ընթացքում իմ գլխին: Սկսեցի մանրամասն ուսումնասիրել տվյալ էջը, որտեղ կոնկրետ որեւէ բան նշված չէ, թե այդ ինչպես եղավ, որ իմ վարկը հաստատվեց: Նաեւ այն վախով, որ միգուցե իմ անունով ապօրինի վա՞րկ են ձեւակերպել, ու հիմա ստիպված եմ լինելու վճարել: Այդ մտահոգություններով էլ, որոշեցի զանգահարել գրասենյակ՝ կայքում տեղադրված համարով: Գրասենյակից ինձ, կարծես թե, հանգստացրին, որ ես չունեմ որեւէ հաստատված վարկ, դա պարզապես գովազդ է: Գովազդը` գովազդ, բայց մինչեւ բան իմացա, պատկերացնո՞ւմ եք, թե ինչեր մտածեցի: Եվ դա այն դեպքում, երբ ունեի վստահություն՝ եթե ինչ-որ բան այն չէ, կկարողանամ խնդիրը լուծել: Իսկ ի՞նչ անեն այն մարդիկ, ովքեր ավելի շուտ են նման բաների հավատում կամ կարող են շատ ավելի պարզ վիճակներում նյարդային խանգարում ստանալ: Ընկերության ներկայացուցիչը մեզ նաեւ բացատրեց՝ որ վարկը ոչ թե հաստատված է, այլ եթե ցանկանում եմ, կարող են հաստատել: Նաեւ կարող եմ այդ հարցով մոտենալ մոտակա գրասենյակ: Պարզ ասած, որ դա սովորական գովազդ է, որ որեւէ վատ կամ սխալ բան չկա: Մեր այն պնդմանը, որ գովազդելը չի նշանակում՝ պարտադրել, կամ մեր փոխարեն որոշել՝ մարդկանց սթրեսային վիճակի հասցնելով, մեր զրուցակիցը պատասխանում էր, որ դա ընդամենը գովազդ է: Մնում էր միայն ընկերության աշխատակցին հիշեցնել, որ գովազն ունի իր կանոնները եւ օրենքով սահմանափակումները: Այդ թվում` չի թույլատրվում մարդկանց մոտ առնվազն շփոթություն առաջացնել: Իսկ լսափողից այն կողմից շարունակում էին համոզել՝ դա ընդամենը գովազդ է: Լավ, ընդունենք: Բայց որքանո՞վ է նման գովազդն օրինական: Այ, դա բացատրելու համար կան պետական կառույցներ, որոնց էլ կդիմենք:

Ա. ՀԱԿՈԲՅԱՆ

Այս թեմայով Երկրները հիմնականում պարտք վերցնում են ճգնաժամերի ժամանակ, իսկ եթե տեղի ունենա այդ ճգնաժամը, ապա այստեղ մենք արդեն ավելի խոցելի ենք լինելու ՀԷՑ-ի գրավադրման ոդիսականը եւ Կառավարության ժառանգած վարկային պարտավորությունը Հայաստանի վարկային կազմակերպությունների զուտ շահույթը նվազել է 31.6%-ով Այս պահից Արցախից բռնի տեղահանվածները կարող են դիմել և ստանալ 2-րդ վերանորոգման վարկը «Հրապարակ». Թաթոյանը նախընտրական խոշոր վարկ է վերցրել