«ՊԱՐԳԵՎԸ» ՏՄՊՊՀ-Ի ԿՈՂՄԻՑ «ՊԱՐԳԵՎԱՏՐՎԵՑ»

Արխիվ 16-20 11 Դեկտեմբեր, 2019 23:10

«Իրավունքն» դեռեւս ամիսներ առաջ անդրադարձել էր սպառողի ահազանգին, որ «Աշտարակ կաթի» 15 տոկոսանոց թթվասերները, որոնք իրենց մեջ բուսական յուղ են պարունակում, վաճառվում են որպես թթվասեր: Այն դեպքում, երբ ԵՏՄ օրենքով արգելված է բուսական յուղ պարունակող կաթնամթերքը, որպես թթվասեր ներկայացնել սպառողին: Այսինքն, նման կաթնամթերքների վրա պետք է գրվի ոչ թե թթվասեր, այլ՝ կաթ պարունակող մթերք: Այն պարզ պատճառով, որ եթե սննդամթերքի ինչ-որ բաղադրիչ փոխարինվում է (այս դեպքում՝ ավելի թանկ կենդանական յուղը բուսականով), դա արդեն այլ մթերք է, իսկ այլ ապրանքի անվան տակ վաճառելը՝ խաբեություն:

Ամիսներ առաջ մեր հրապարակման հիման վրա ՀՀ Տնտեսական մրցակցության պաշտպանության պետական հանձնաժողովը (ՏՄՊՊՀ) հարուցել էր վարչական վարույթ՝ ընդդեմ «Պարգեւ» ՍՊԸ-ի: Ընկերությունն էլ նույն հրապարակումից իրեն վիրավորված է համարում՝ մի գլուխ փորձելով դատական ատյաններում հարցը լուծել: Եվ ահա երեկ ՏՄՊՊՀ-ն մեզ տրամադրեց ուսումնասիրությունների եզրակացությունը: Ըստ դրա, հանձնաժողովը նախ մանրամասն ներկայացնում է ինչ ասել է՝ անբարեխիղճ մրցակցություն, հասարակությանը մոլորեցնել, այդ թվում՝ ոչ պատշաճ մակնշումների կամ գովազդի միջոցով: Հանձնաժողովը նաեւ ֆիքսում է, որ Եվրասիական տնտեսական հանձնաժողովի խորհրդի տեխնիկական կանոնակարգերը, մասնավորապես, պահանջում են՝ «Կաթնային ճարպի փոխարինիչով կաթ պարունակող մթերքի անվանումը պետք է սկսվի «կաթնային ճարպի փոխարինիչով կաթ պարունակող մթերք» բառերով»: Նաեւ պետք է ներկայացվի. «Պարունակում է բուսական յուղեր»: Ընդ որում` այնպես, որ դա որեւէ կերպ սպառողի մոտ շփոթություն չառաջացնի: Արդյունքում, հանձնաժողովը հասնում է նման եզրակացության. «Ընկերության կողմից արտադրված ապրանքի տուփի վերին եւ կողային հատվածներում մակնշված` «Բարձրորակ կաթնային մթերք` պատրաստված Դասական Թթվասերի տեխնոլոգիայով» գրառման մեջ «Թթվասերի» բառը մնացած բառերի համեմատությամբ ավելի մեծ տառաչափով մակնշելը, «կաթնային մթերք» արտահայտությունն օգտագործելն այն դեպքում, երբ ապրանքը պարունակում է կոկոսի յուղ եւ չի հանդիսանում կաթնային մթերք, ապրանքի անվանման մեջ «կաթնային ճարպի փոխարինիչով» արտահայտությունը չօգտագործելը, «պարունակում է բուսական յուղեր» արտահայտությունն ապրանքի վրա չմակնշելը համարվում է անբարեխիղճ մրցակցության գործողություն՝ հասարակության մոլորեցում, քանի որ կարող է մոլորեցնել հասարակությանը տնտեսվարող սուբյեկտի, նրա գործունեության կամ առաջարկած ապրանքների վերաբերյալ»: Այսինքն այն, ինչ մենք էինք ասում: Հանձնաժողովը նաեւ ֆիքսում է. «Վարչական վարույթի ընթացքում Ընկերության կողմից ներկայացված տեղեկատվության համաձայն` «Բարձրորակ կաթնային մթերք` պատրաստված Դասական Թթվասերի տեխնոլոգիայով» գրառմամբ ապրանքը 2019 թվականի հուլիս ամսին իրացվել է: Բացի այդ, հանձնաժողովի կողմից իրականացված ուսումնասիրությունների, մասնավորապես՝ հանձնաժողովի նախագահի (...) դիտանցումներ իրականացնելու մասին» թիվ 148-Ա հրամանի հիման վրա իրականացված դիտանցման արդյունքում պարզվել է, որ ընկերության կողմից շարունակվում է արտադրվել եւ իրացվել ապրանքը` «Բարձրորակ կաթնային մթերք` պատրաստված Դասական Թթվասերի տեխնոլոգիայով» գրառմամբ, որի մեջ «Թթվասերի» բառը մնացած բառերի համեմատությամբ ավելի մեծ տառաչափով է նշված: Նույն դիտանցման ընթացքում պարզվել է, որ ապրանքի մակնշման մեջ կատարվել է փոփոխություն` ապրանքի կողային հատվածում մակնշվել է «Կաթ պարունակող մթերք կաթնայուղի փոխարինիչով` արտադրված թթվասերի տեխնոլոգիայով» գրառումը...»:

Արդյունքում՝ հանձնաժողովն ընկերության նկատմամբ անհրաժեշտ է համարել նշանակել տուգանք՝ 2 384 338.93 դրամի չափով: Նաեւ որոշել է. «Հանձնարարել «Պարգեւ» սահմանափակ պատասխանատվությամբ ընկերությանը՝

1) 10-օրյա ժամկետում վերացնել օրենքի խախտումը՝ ապրանքի արտադրության, իրացման եւ գովազդի ընթացքում, ինչպես նաեւ առեւտրային շրջանառության մեջ ապրանքի առկայության դեպքում դրա մակնշումները համապատասխանեցնել գործող իրավական ակտերի պահանջներին...»: