«Ապտակ կերած» Փաշինյանին մխիթարել է «Սուպեր մաման»
Արխիվ 16-20Խորհրդարանում երեկ արտառոց դեպք էր տեղի ունեցել, որի մասին առաջինն աղաղակեց ԱԺ «Ելք» խմբակցության ղեկավար ՆԻԿՈԼ ՓԱՇԻՆՅԱՆԸ՝ սոցցանցում հայտարարելով, թե ԱԺ միջանցքում Արտաշես Գեղամյանը բռունցքներով հարձակվել է իր վրա: Ապա վստահեցրել, որ հաջողությամբ պաշտպանվել է, թեպետ Փաշինյանի կարմրած այտը կատարվածի մասին ամեն ինչ ասում էր: Իհարկե, չուշացավ նաեւ ԱԺ ՀՀԿ խմբակցության պատգամավոր, «Ազգային միաբանություն» կուսակցության նախագահ ԱՐՏԱՇԵՍ ԳԵՂԱՄՅԱՆԻ արձագանքը, որը մասնավորապես նշել էր, որ եթե ինքը բռունցքներով խփեր, ապա Փաշինյանին հիվանդանոց կտանեին, որովհետեւ 3,5 տարի բռնցքամարտով է զբաղվել:
Ինչեւէ, պայթյունավտանգ իրավիճակը փորձեցին հարթել ՀՀԿ-ականները՝ խոսելով ե՛ւ Ն. Փաշինյանի, ե՛ւ Ա. Գեղամյանի հետ, իսկ թե ինչի՞ մասին` ԱԺ նախագահի տեղակալ, ՀՀԿ խոսնակ ԷԴՈՒԱՐԴ ՇԱՐՄԱԶԱՆՈՎԸ չցանկացավ փակագծեր բացել: Միայն մեզ հետ զրույցում շեշտեց. «Մի բան կարող եմ ասել ե՛ւ իր, ե՛ւ իմ կուսակցության անունից՝ ցանկացած ոչ կոռեկտ պահվածք պատգամավորների կողմից` լինի խորհրդարանի դահլիճում, դահլիճից դուրս, եւ անկախ նրանից, թե որ խմբակցության անդամ են՝ ընդդիմադիր կամ իշխանական, բռունցքներով խնդիր լուծելը, անձնական վիրավորանքներ հնչեցնելը չի տեղավորվում պատգամավորական էթիկայի սահմաններում: Չեմ ընդունում: Որպես Ազգային ժողովի նախագահի տեղակալ՝ շահագրգռված եմ, որպեսզի այսուհետ որեւէ նման դեպքեր մեզ մոտ չկրկնվեն»: Ի վերջո, ինչ է տեղի ունեցել, եւ ով էր մեղավոր` հարցին Է. Շարմազանովը նույնպես չցանկացավ պատասխանել. «Ես դատավոր չեմ, եղել է, չի եղել, սա չէ խնդիրը»:
Իսկ խորհրդարանական միջանցքներում միջադեպի վերաբերյալ քննարկումների պակաս չէր զգացվում, ընդ որում՝ շատերին առնվազն ապշեցրել էր, որ Ն. Փաշինյանը, որը «ռազբոռկեքի», «շշով խփելու» եւ նմանատիպ այլ բակային բարքերի մասնագետ է իրեն համարում, հանկարծ մեկ թեթեւ ապտակից ամենեւին էլ ոչ տղավարի վարքագիծ դրսեւորեց: Այս ամենն առավել զավեշտալի դարձավ, երբ պարզվեց, թե ինչով է ավարտվել երեկ Ն. Փաշինյանի օրը, ինչի մասին նա կրկին սոցցանցում գրառում էր կատարել. «Սուպեր Մամա-2»-ի պրեմիերային էինք։ Դահլիճը լքելիս հանդիսատեսը լայն ժպտում էր՝ թաց աչքերով»:
Այնպես որ, մնում է հուսալ, որ «Սուպեր Մաման» չորացրել է նաեւ Ն. Փաշինյանի թաց աչքերը:
ՀՐԱՆՏ ՍԱՐԱՖՅԱՆ