Մյուս հանձնվող տարածքը Ներքին Հանդն է լինելու, գյուղացիներին անտեր են թողել. Նարինե Կիրակոսյանն ահազանգում է

Սրանք մեր տարածքներն են, ինչն ապացուցելի է նաեւ բոլոր քարտեզներով եւ միջազգային օրենքներով: Չէ՞ որ Շիկահողի արգելոցը հիմնվել է 1958 թվականին, քարտեզագրվել, կադաստրի, այսպես կոչված, թուղթ ստացել։ Նման դեպքում ոչ մեկն իրավունք չունի ասել, թե այս տարածքները կարող են երբեւիցե եղած լինել Սովետական Ադրբեջանի կազմում:

 

Մթնաձորից այն կողմ, դեպի Մեղրի «Բողաքարի արգելավայրն» է (Զանգեզուր կենսոլորտային համալիրի մեջ է մտնում), որը նույնպես օկուպացվել է եւ պնդում են, թե դա «Զանգելանի» տարածքն է, այսինքն իրենցն է, թշնամունը: Կցում եմ նաեւ այդ արգելավայրի մասին տեղեկություն, որ փաստաթղթերով երբեք էլ չի եղել ադրբեջանական «տարածք»։ Ուշադրություն դարձրեք թվերին։ Օրինակ, այս պահպանվող տարածքի կառավարման պլանում գրված է, որ «էնդեմիկ բուսատեսակների (Վարդակակաչ սոսնովսկու, Խլածաղիկ թախտաջյանի, Կաղնի արաքսյան եւ այլն) պահպանությունն է կազմակերպվում», իսկ քարտեզագրված ու կադաստրով հաստատումը տեղի է ունեցել «10.08.1989 ՀՍՍՀ Մինիստրների խորհրդի № 400» որոշմամբ։

 

Վերջում փոխանցում եմ ՀՀ կառավարությանը, որ գյուղացիներին ավելի քան մեկ տարի է՝ անտեր եք թողել: Նրանք ունեն խմելու ջրի խնդիր, քանի որ ադրբեջանցիները հին գյուղատեղիում են, գյուղի եկեղեցու գերեզման մարդիկ չեն կարողանում գնալ, խմելու աղբյուրի ակունքն են փակել, խոզի, թռչունի կեր չունեն, որովհետեւ արոտավայր չի մնացել, թշնամիները կենդանիներին առեւանգում են, իսկ կառավարությունը հրաժարվել է փոխհատուցել այդ կորուստները:

 

Նաեւ իմ այցից հետո, առեղծվածային կերպով, համապատասխան տեսառեպորտաժիցս հետո, արագի մեջ գյուղ են գործուղել պաշտոնյաների։ Կոնկրետ Ներքին Հանդ գնացել է Կապան խոշորացված համայնքի ղեկավարը։ Թեպետ ասեմ, որ նրա մասին գյուղացիները ոչ լավ, ոչ վատ չեն արտահայտվում։ Ասում են գալիս է, ոտքով քայլում գյուղի մեջ։ Գյուղը մի քանի 100 մետր է: Սա ինֆորմացիայի համար, որ հասկանաք, թե ինչքան է փոքրացել շարժվելու տարածքը: Այնումաենայինիվ, գյուղի անվտանգությունը համայնքի ղեկավարը չէ, որ պետք է ապահովի։ Եվ այս ֆոնի վրա, նույնպես ի զարմանս ինձ, տարածք է գալիս ոչ ավել, ոչ պակաս նախագահ Վահագն Խաչատրյանը։ Նա գնացել է Ծավ գյուղ։

 

Ի՞նչ ասեմ, նաեւ բժիշկների թիմ էր գնացել, այցիս օրը, նյութը հրապարակելուց հետո։ Չհասկացա... եթե կարող են այդպես արագ գալ, ինչո՞ւ մինչ այդ օրերով, ամիսներով, տարով, ըստ գյուղացիների, Ճակատեն, Սրաշեն, Շիկահող, Ներքին Հանդ, Շիշկերտ, Ծավ եւ ընդհանուր այդ ուղղության վրա գտնող գյուղեր չէին գնում։

 

Ամեն դեպքում, Վահագն Խաչատրյանը Ծավ գնացել է, բայց չի մտել Ներքին Հանդ։ Ինչո՞ւ: Խոսել եմ գյուղապետի հետ նա ասաց, միայն Փարսյանն է գալիս ու հաճախակի։ Հիմա, ես որպես տարածքը լավ իմացող կարծում եմ, որ մյուս հանձնվող տարածքը, արդեն ամբողջությամբ, հենց Ներքին Հանդն է լինելու։ Որովհետեւ ամեն բան դրա համար նախապատրաստել են, իսկ գյուղացիներին թողել մենակ, թուրքի բերանը: Շրջակա միջավայրի նախարարության մասին չեմ ծավալվում, բայց այս տարածքների պահպանման ռեժիմը վաղուց պետք է փոխեին ու դա, չնայած բազմիցս ահազանգել եմ, չեն անում։ Հիմա, եթե չեք փոխում, ապա ինչո՞ւ բնապահպանական ծրագրերն այլեւս չեն իրականացվում այնտեղ, որոնք թույլ էին տալիս գյուղացիներին նաեւ օգնել։ Բայց արգելոցն ավերելուց հետո դրա ստատուսի մնալը ճիշտ չի եւ իրականությանը չի համապատասխանում։ Սա թույլ է տալիս ենթադրել, որ ՇՄ-ն Ալիեւ-Փաշինյանի միջանցք-խաչմերուկներ տրամադրելու գործարքի մեջ լինելով, շարունակում է, կրկում եմ, թաքցնել իրականությունը։ Այլապես պահպանման ստատուսը կփոխեին եւ կկազմակերպեին նորմալ ինքնապաշտպանություն։