ԹՈՒՐՔԻԱՆ ՕԳՏԱԳՈՐԾԵԼՈՎ ՀԱՅԿԱԿԱՆ ԵԿԵՂԵՑԻՆԵՐԸ`ՑԱՆԿԱՆՈՒՄ Է ՍՐԵԼ ՀԱՅ-ՎՐԱՑԱԿԱՆ ՀԱՐԱԲԵՐՈՒԹՅՈՒՆՆԵՐԸ

ԹՈՒՐՔԻԱՆ ՕԳՏԱԳՈՐԾԵԼՈՎ ՀԱՅԿԱԿԱՆ ԵԿԵՂԵՑԻՆԵՐԸ`ՑԱՆԿԱՆՈՒՄ Է ՍՐԵԼ ՀԱՅ-ՎՐԱՑԱԿԱՆ ՀԱՐԱԲԵՐՈՒԹՅՈՒՆՆԵՐԸ

13-րդ դարում կառուցված Անիի Տիգրան Հոնենց եկեղեցին, որը Թուրքիան միջազգային հանրությանը ներկայացնում է իբրեւ վրաց-քաղքեդոնական, վրացագետ ՋՈՆԻ ՄԵԼԻՔՅԱՆԻ բնորոշմամբ, Թուրքիայի կողմից իրականացվող հերթական խաղն է.«Առաջին անգամ չէ, որ Թուրքիան հայկական եկեղեցիները ներկայացնում է իբրեւ վրացական: Նախկինում Մ. Սահակաշվիլիի նախագահության օրոք խոսակցություններ կային, որ Վրաստանը ցանկանում է Թուրքիայի տարածքում հայկական եկեղեցիների հաշվին հոգեւոր թեմ բացել, նույնիսկ երկու երկրների մշակույթի նախարարություններն արդեն ձեռք էին բերել պայմանավորվածություն: Սակայն, Վրաստանում տեղի ունեցավ իշխանափոխություն եւ ծրագիրը մնաց անկատար: Հետագայում պարզվեց, որ թուրքական կողմը Վրաստանին պահանջ էր ներկայացրել, որ թույլ կտա իր տարածքում բացել հոգեւոր թեմ միայն մեկ պայմանով, եթե Վրաստանը վերակառուցի Աջարիայում գտնվող թուրքական մզկիթը: Ինչն անընդունելի էր վրացական ուղղափառ եկեղեցու համար»,-«Իրավունքի» հետ զրույցում փաստեց վրացագետը եւ ավելացրեց. «Այսօր Վրաստանի Պատրիարքը մեծ հեղինակություն է վայելում եւ բավականին լուրջ ազդեցություն ունի երկրի քաղաքական գործընթացների վրա: Չեմ կարծում, որ պաշտոնական Թբիլիսին որեւէ կերպ կխառնվի այս հարցին, ինչը չեմ կարող ասել եկեղեցու վերաբերյալ»: Նրա խոսքով`Թուրքիան հայկական եկեղեցիները շահարկելով ցանականում է հայ-վրացական հարաբերություններում ստեղծել կոնֆլիկտ, քանի որ այս պահին հարաբերությունները լարված են Ռուսաստանի հետ.«Նախկինում էլ, այսօր էլ Ադրբեջանը բավականին ակտիվ աշխատում է հայ-վրացական հարաբերոթյունները սրել, նույնն էլ անում է Թուրքիան: Նախիջեւանում Ադրբեջանն այդքան վայրագություններ կատարեց, ով նրա ձեռքը բռնեց, որ այսօր Թուրքիայի ձեռքը բռնեն եւ թույլ չտան խեղաթյուրել փաստերը»,-եզրափակեց Ջ. Մելիքյանը:

ԶՎԱՐԹ ԽԱՉԱՏՐՅԱՆ