«Սեկտոր-18». Նռնագույն քաղաքի սևազգեստ մարդիկ

2018 թվականի սեպտեմբերի 1-ին Երևանի «Փյունիկը» սեփական հարկի տակ ընդունեց Վանաձորի «Լոռիին» և պարտվեց 0-3 հաշվով։ Շատերը գուցե արդեն մոռացել են այս հանդիպումը, սակայն դա երբեք չեն մոռանա այն վեց տղաները, որոնք հենց այդ օրն առաջին անգամ հանդիպմանը գնացին որպես ֆան-ակումբ և հայտարարեցին «Փյունիկի» ֆան ակումբի ` «Սեկտոր-18»-ի ստեղծման մասին։

«Սեկտոր-18»-ը շուտով նշելու է ստեղծման 2-րդ տարեդարձը։ Թվում է, թե այդքան էլ երկար պատմություն չունի ֆան-ակումբը, բայց հասցրել է համախմբել շուրջ 50 մարդկանց, որոնցից մշտապես ակտիվ են 30-ը։

Հետաքրքիր տրամաբանությամբ է որոշվել ֆան-ակումբի անվանումը` «Սեկտոր-18»-ը։ Քանի որ ստեղծվել է 2018 թվականին, տղաները որոշել են վերցնել 18 թվանշանը, որին էլ միացրել են սեկտոր բառը` որպես երկրպագուների հավաքատեղի, այդպես էլ ստացվել է անվանումը։

Ֆան-ակումբի անդամները հիմնականում տղաներ են, սակայն նրանց շարքերում կան նաև մի քանի աղջիկ, որոնք ևս մեծ սիրով և ոգևորությամբ երկրպագում են իրենց սիրելի թիմին։

Տղաները մշտապես ներկա են լինում «Փյունիկի» խաղերին, նաև փորձում են բաց չթողնել արտագնա հանդիպումները։ Ուշագրավ և հիշարժան պահեր շատ են ունեցել և՛ Հայաստանում, և՛ դրսում կայացած հանդիպումների ժամանակ։

Դրանց թվում է հենց առաջին «Փյունիկ» - «Լոռի» հանդիպումը։ Պարտությունից հետո նյարդային իրավիճակ, լարվածություն, դժգոհություններ, սակայն բարեբախտաբար երկրպագուների առաջին հանդիպումն ավարտվել է առանց հատուկ դեպքերի։

Հիշարժան դրվագներից է նաև 2019 թվականին Չեխիայի մայրաքաղաք Պրահայում ֆան-ակումբի կատարած նախախաղային երթը, որտեղ տղաներին միացել է նաև տեղի հայ համայնքը։ Ինչպես նշում են երկրպագուները, դա մեծ ոգևորություն և հպարտություն էր և՛ իրենց և՛ ֆուտբոլիստների համար։

Չեխիա ուղևորության հետ կապված նաև զավեշտալի դեպք են հիշում տղաները։ Հատուկ Չեխիայում Հայաստանի դեսպանի համար երկրպագուները նվեր էին պատրաստել, որն էլ մոռացել էին Պրահայի օդանավակայանում։ Այդպես դեսպանը մնացել է առանց իր նվերի։

Մակեդոնիայում ևս երկրպագուներն իրենց պատմությունն ունեն։ Վստահ ասում են, դրսում այնպես չեն ընդունում երկրպագուներին, ինչպես ընդունում ենք Հայաստանում։

Ֆան-ակումբը նաև իր մասնակցությունն է ունենում ակումբի հետ կապված հարցերում։ Տղաները փաստում են, որ իրենց ձայնը լսելի է ակումբի ղեկավարության կողմից, և դրա վառ օրինակն է «Тарханов Out» ակցիան, որի արդյուքնում գլխավոր մարզիչի պաշտոնից հեռացվեց Ալեքսանդր Տարխանովը։

Բացի երկրպագուներին հատուկ գործունեությունից, ֆան-ակումբը նաև նորարարություններ է ձեռնարկում։ Դրանց թվում է ակումբային ստիկեռների պատրաստումը և վերջերս Թումանյան փողոցում նկարված ֆուտբոլային գրաֆիտին։ Ստիկեռների և գրաֆիտիի հեղինակներ Հակոբն ու Հենրիկը նշում են, որ յուրաքանչյուր ֆուտբոլային ակումբ պետք է իրեն հատուկ ինչ-որ բան ունենա իր երկրում։ Դա կնպաստի ինչպես ակումբի ճանաչելիությանն, այնպես էլ ֆանատական մշակույթի զարգացմանը։

Տղաների խոսքով, սա դեռ սկիզբն է և բնականաբար շարունակական բնույթ է կրելու։ Ինչպես իրենք են նշում ` «Երևանը նռնագույն է»:

Հարցազրույցին մասնակցել են ֆան-ակումբի տղաները։

Պատրաստեց` Լիանա Հարությունյանը

Այս թեմայով Գյումրիում տեղի ունեցավ Զարգացման առաջնորդների ֆորումի պաշտոնական բացումը Եթե չկա քո ամենամտերիմը, դու ինքդ էլ այլեւս չկաս. Արմեն Քուշկյան «Տեղական արտադրանքի ադրբեջանցիները տանում են սևազգեստ մայրերին Եռաբլուրից...».ԱՆՆԱ ՀՈՎՆԵՐ Սահմռկեցուցիչ տեսարան էր. մարդիկ են գալիս՝ հրաժեշտ տալու, բերքը ծառերի վրա՝ չհավաքած, տների վրա ինչ-որ գրություններ, գաղթական հայը՝ 21-րդ դարում, ծանր է շատ. Մետաքսե Հակոբյան Դեպքի օրը մարդիկ ոտաբոբիկ գալիս էին մեզ օգնելու, ինչի հետեւանքով իրենք էին վնասվում. ԱԻՆ պաշտոնյա