Երկուսն էլ իրար արժեն. Քաղաքագետը իշխանություն-ընդդիմություն կեցվածքի մասին

Այն, ինչ կատարում է կառավարող խմբակը, նորություն չէ, ավտորիտար տենդենց ունեցող իշխանությունները հենց այդպես էլ վարվում են, նրանք փորձում են ցանկացած լծակ կիրառել, որպեսզի մարդկանց վախեցնեն, կոտրեն իրենց դեմ գնալու որևէ գործողություն անելու ցանկությունը։ Սա շատ կանխատեսելի էր, դրանում մեղադրել Նիկոլ Փաշինյանին նույն է, թե Ալիևին մեղադրել, որ նա ուզում է մեզ ոչնչացնել, նա դա չի թաքցրել,- անդրադառնալով Բաղրամյանում տեղի ունեցածին, ասաց քաղաքագետ Հայկ Սահակյանը, ընդգծելով.

-Ընդդիմության առաջնորդները նույնպես պատասխանատվություն են կրում այս ամենի համար, որովհետև իրենք շատ լավ գիտեն, որ այսպես էր լինելու, հետևաբար, երբ մարդկանց հավաքում, տանում են բախման, պարզ է, որ այդպես էր լինելու։ Այսինքն՝ երկուսն էլ իրար արժեն, մեկը հստակ գիտեր, թե ինչ պիտի արվեր ու արել է, մեկը հստակ գիտեր՝ ինչ չպետք է աներ ու արել է, ի հետևանք տուժել են քաղաքացիներ։

– Ձեր գնահատմամբ՝ այդ բախումները նաև ընդդիմությունն է հրահրե՞լ։

– Այո՛, 30 տարի է ընդդիմությունը մարդկանց հավաքում, տանում է բախման, խնդիրն էլ չի լուծվում, Հայաստանի պատմության մեջ չի եղել մի դեպք, որ այդ բախումների հետևանքով իշխանություն փոխվի։ Իշխանությունը փոխվում է այլ տրամաբանությամբ, ոչ թե մարդ հավաքելով ու բախումներով։ 

Անգամ Նիկոլ Փաշինյանը, երբ Բաղրամյանում բախումներ եղան, սադրեց, որ ձեռքին իբր սրտիկ էր եղել, մինչև վերջ էլ դա դրոշակ էր սարքել: Անգամ դրա արդյունքում իշխանություն չփոխվեց, փոխվեց այլ տրամաբանությամբ, երբ իշխանությունը չկարողացավ իր ֆունկցիոնալ գործառույթը կատարել։ Երբ ընդդիմությունը հասնի նման իրավիճակի, իշխանությունը կհանձնվի, բայց դա բախում չէ։ Բախման ժամանակ իշխանությունը միշտ ուժեղ է ու պատրաստ, նրանք զինված են, ոստիկանություն ունեն, ոստիկաններն էլ դրա համար աշխատավարձ են ստանում։ Ընդդիմությունը պետք է մարդկանց բողոքը գեներացնի, դարձնի նորմալ քաղաքական գործընթաց, ոչ թե տանի բախման, երկուսն էլ պատասխանատու են այս ամենի համար: