ԿԱՐՃ ԼՈՒՐԵՐ

ԻՇԽԱՆԱԶԱՎԹԻՉՆԵՐԻ ՃԱՆԱՊԱՐՀԸ ԴԵՊԻ ԻԶԳՈՅ ՊԵՏՈՒԹՅՈՒՆ

17.10.2018 19:00 ՎԵՐԼՈՒԾՈՒԹՅՈՒՆ
ԻՇԽԱՆԱԶԱՎԹԻՉՆԵՐԻ ՃԱՆԱՊԱՐՀԸ ԴԵՊԻ ԻԶԳՈՅ ՊԵՏՈՒԹՅՈՒՆ

Երեկ երեկոյան Նիկոլ Փաշինյանը կատարեց իր խոստումը եւ հայտարարեց հրաժարականի մասին: Եվ խորհրդանշական է, որ հայտարարությունից անմիջապես հետո Հայաստանի ֆուտբոլի հավաքականը գոլ խփեց: Ինչպես կասեր ռուսը` մանրուք է, բայց հաճելի: Սակայն նման է, որ «ժողվարչապետը» ընտրել է դեպի սահմանադրական փակուղի տանող ճանապարհը, բայց, կարծես թե, դա նրան մազաչափ իսկ չի հուզում:

ԻՆՉՈՒ ՄԻՋԱԶԳԱՅԻՆ ԴԻՏՈՐԴՆԵՐԸ ՉԵՆ ՏԵՍՆՈՒՄ, ՉԵՆ ԼՍՈՒՄ, ՉԵՆ ԽՈՍՈՒՄ

 

ՈՎ ՊԻՏԻ ՎԱՐՉԱՊԵՏԻ ԹԵԿՆԱԾՈՒ ԱՌԱՋԱԴՐԻ

Այն, որ վարչապետի ընտրության առաջին փուլում անպայման պետք է թեկնածու առաջադրվի, լինի քվեարկություն, բայց բավարար քվեներ չլինեն, որպեսզի ԱԺ արձակումը գոնե ֆորմալ առումով չլինի հակասահմանադրական, կարծես թե պարզ է բոլորին: Բայց հարց է առաջանում` ո՞վ պետք է այդ առաջադրումը կատարի: ՀՀԿ-ն հայտարարել է, որ թեկնածու չի առաջադրելու, ԲՀԿ-ն հուշագրով գրավոր է պարտավորվել այդպիսի բան չանել, ՀՅԴ-ն էլ Արմեն Ռուստամյանի շուրթերով հայտարարեց` հո յոթ հոգով թեկնածու չե՞նք առաջադրելու: Տակը մնաց «Ելքը», եւ հիմա Սփյուռքի հայկական հարթակներում պտտվում է այն վարկածը, որ առաջադրվելու է հենց Նիկոլ Փաշինյանը, սակայն բավարար քվեներ միտումնավոր չի ստանալու, որպեսզի արտահերթ ընտրությունների համար ճանապարհ հարթվի: Դե պատկերացրեք դրա աբսուրդայնության աստիճանը:  Հիմա էլ շտապ կառավարությունը ԱԺ է բերել Ընտրական օրենսգրքի փոփոխությունները, որոնց հիմնական  իմաստը ռեյտինգային ընտրակարգի վերացումն է, ինչպես նաեւ որոշակի շեմերի փոփոխությունը (օրինակ, անցողիկ շեմը 5 տոկոսից դարձնել 4): Եվ այդտեղ էլ առաջանում է խնդիր` դա անցկացնելու համար անհրաժեշտ է  ԱԺ որակյալ մեծամասնության կողմ քվեարկություն, քանզի դա սահմանադրական օրենք է: Հիմա ինչ, այդ փաթեթը հոկտեմբերի 22-ի արտահերթ նիստին անցկացնելու են զոմբիացած խաժամուժի, կամ Նիկոլի ասած` «ժողովրդի» բիրտ ճնշումներո՞վ: Չէ՞ որ այդ փոփոխությունները, խոշոր հաշվով,  պետք չեն ո՛չ ՀՀԿ-ին, ո՛չ ԲՀԿ-ին, ո՛չ էլ ՀՅԴ-ին, եւ ընդհանրապես «ճամպրուկային» տրամադրություններ ունեցող խորհրդարանում նման քվեարկություն «երեսի զոռով» կազմակերպելը պրոբլեմատիկ է եւ հղի նորանոր լարումներով ու նորանոր բարիկադներով:

 

ՇՏԱՊԵՔ ԸՆՏՐՈՒԹՅՈՒՆՆԵՐԻ, ՎԱՐԿԱՆԻՇԸ ԿԱՐՃ Է

Նախկին վարչապետ Հրանտ Բագրատյանը դիտարկում է նաեւ գործընթացների տնտեսական կողմը եւ արձանագրում. «Շտապեք ընտրությունների, հարգելինե՛րս, այլապես ձեր վարկանիշից մի քանի ամիս հետո ոչինչ էլ չի մնա»: Խոշոր հաշվով, առկա է նաեւ մայիսի 9-ից իշխանազավթիչ Փաշինյանի երկյուղը` այդ օրն արդեն ԱԺ-ն իրավունք ունի նրան արդեն անվստահություն հայտնել եւ պաշտոնանկ անել, եւ «ռեյտինգի», այսինքն` ոգեշունչ զոմբիացած զանգվածների պակասը կարող է ճակատագրական լինել: Ի դեպ, Բագրատյանը, փոքր-ինչ վերլուծելով 2019-ի բյուջեի նախագիծը, գալիս է եզրակացության, որ լավ է, եթե ոչ մի բյուջե էլ չընդունվի, քանզի նրա վերլուծության համաձայն. «Հարկեր/ՀՆԱ ցուցանիշի իջեցումը, գրեթե առանց բացառության, վկայում է, որ իրականում կոռուպցիայի դեմ ոչ մի պայքար էլ չկա: Ընդհակառակը` «պլանավորված» է ավելի մեծ կոռուպցիա»:

ԹԱՎՇՅԱ ԴԻԿՏԱՏՈՒՐԱ` ՄԻ ՈՏՔԸ ԿԱՂ

Դե, իսկ «հին-քյառթու» կադրեր բերելը, զորօրինակ, նախկին փոխոստիկանապետ Հունան Պողոսյանին Սյունիքի մարզպետ նշանակելը. լիուլի սնում են կասկածները, որ տեղի է ունենում պարզապես նոր «պապայով» հին համակարգի վերականգնումը, առավել եւս, որ օլիգարխ պատգամավորների մեծ մասը Նիկոլի թրի տակով անցել են, «Ելք» խմբակցության ղեկավար Լենա Նազարյանն էլ չի բացառում ՔՊ համամասնական ցուցակում բիզնեսի ներկայացուցիչների առկայությունը:  Իսկ Հունան Պողոսյանի նշանակումը արդեն Սյունիքում հասցրել են դիմավորել` ավտոճանապարհ փակելով, ու դրա շնորհիվ էլ լրացուցիչ խորացում տեղի ունեցավ «Սասնա ծռեր»-թավշակրոն իշխանություն հարաբերություններում, եւ «ծռերն» արդեն  պաշտոնական հայտարարություն են տարածել դրա կապակցությամբ. «Կառավարությունը շարունակում է պատասխանատու պաշտոններին նշանակել նախկին հանցավոր ռեժիմի ներկայացուցիչներին, այդ թվում նրանց, ովքեր աչքի են ընկել իրենց դահճային բնույթով եւ զբաղվել են ժողովրդին կեղեքելով ու թալանելով: Կրկին հորդորում ենք Նիկոլ Փաշինյանին ոչ միայն վերանայել նման անընդունելի կադրային քաղաքականությունը, այլեւ արդեն նշանակված անձանց, առաջին հերթին` Վալերի Օսիպյանի եւ Հունան Պողոսյանի նմաններին ազատել զբաղեցրած պաշտոններից եւ հանձնարարել ստուգելու այդպիսի անձանց նախկին գործունեությունը` ժողովրդի եւ պետականության դեմ կատարած հանցագործությունների համատեքստում»: Դե, եթե դրան հավելենք նաեւ, որ ավելի վաղ հանճարեղագույն ՀՔԾ-ն Լեւոն Երանոսյանի մասով կարճեց 2016-ի Սարի թաղի դրվագները, ապա պարզ է դառնում, որ ինչքան մոտենա արտահերթ ընտրությունների օրը, այնքան ավելի շատ «շուն եւ կատու» վիճակ է տիրելու «թավշյա հեղափոխության» եւ «հեղափոխական տեռորի» կուսակցությունների միջեւ:

ԴԵՄՔԵՐ ԵՎ ԴԻՄԱԿՆԵՐ. ԲՌՆԱՊԵՏՈՒԹՅՈՒՆԸ ԿԱՆԽԵԼՈՒ ԺԱՄԱՆԱԿԸ

 

ԿԱՏԱՐՅԱԼ ՓԼՈՒԶՈՒՄ ԱՐՏԱՔԻՆ ՀԱՐԱԲԵՐՈՒԹՅՈՒՆՆԵՐՈՒՄ

Տեղի ունեցավ շատ խայտառակ մի իրողություն` ՀԱՊԿ ԽՎ գագաթնաժողովը, որի` Երեւանում անցկացնելու համար այդքան ջանք է թափել նախկին իշխանությունը, անց է կացվելու Մոսկվայում: Ու թեեւ որպես պատճառ նշվում է հենց հնարավոր արտահերթ ընտրությունների հանգամանքը, սակայն թերեւս իրական պատճառը թավշակրոն վարչախմբի հանդեպ վստահության բացակայությունն է: Գումարած դրան` գործնականում կարող ենք կորցրած համարել ՀԱՊԿ գլխավոր քարտուղարի հայաստանյան քվոտան: Բայց Արեւմուտքի ուղղությամբ էլ խայտառակ վիճակ է, թեեւ իշխանազավթիչների վարչախումբը գերհագեցած է սորոսական կադրերով: Այսպես, ԵԽԽՎ-ում շատ լուրջ պրոբլեմ է դարձել այն, որ ընտրություններն անցկացվում են այդքան հապճեպ, իսկ նոր Ընտրական օրենսգիրքը ծրագրված է ընդունել առանց Վենետիկի հանձնաժողովի եւ այլ եվրոպական կանոնակարգերի: Կարող է վիճակ ստեղծվել, որ մեր երկրին անգամ պարզապես վռնդեն ԵԽԽՎ-ից: Ի դեպ, ԱԺ արտաքին հարաբերությունների հանձնաժողովի նախագահ Արմեն Աշոտյանն էլ մատնանշում է, որ ՀՀ-ԵՄ համաձայնագրով նախատեսված աշխատանքներից էլ կառավարությունը գրեթե ոչինչ չի արել:  Արդյունքում ինչ ենք ստանում` որ ռուսների համար դառնում ենք անվստահելի գործընկեր, նույնքան անվստահելի գործընկեր ենք դառնում Արեւմուտքի համար, որը նաեւ չի մոռանա հիշեցնել, որ հակասահմանադրական եւ հակաժողովրդավարական ճանապարհով տեղի է ունեցել առկա խորհրդարանի ցրում եւ նոր խորհրդարանական ընտրությունների անցկացում: Այսինքն` գործնականում դառնում ենք իզգոյ պետություն, եւ այդ ամենը հանուն Նիկոլի «սիրո եւ համերաշխության», «ոչ բռնի եւ խաղաղ» հեղափոխության: Եթե դրան հավելենք նաեւ այն, որ ԱՄՆ դեսպան Ռիչարդ Միլզը իր հրաժեշտի հարցազրույցում նաեւ ուղղակի տեքստով պահանջել է տարածքների հանձնում, ապա վիճակը դառնում է լրիվ դրամատիկ: Բայց որպես անուղղելի լավատեսներ, կրկին վերադառնանք դրական նախանշանին` որ Փաշինյանի հրաժարականի հայտարարությանը անմիջապես հետեւել է Հայաստանի ֆուտբոլիստների հաղթանակը 4:0 հաշվով:

ՀՈՎՀԱՆՆԵՍ ԳԱԼԱՋՅԱՆ

 

КОМСОМОЛЬСКАЯ ПРАВДА