Արտաշես Գեղամյան. Ինֆորմացիոն կուրտիզանուհիների թշվառությունն՝ առանց պերճանքի (շարունակություն)
Արխիվ 16-20Ահա իմ աշխատանքի ոչ լրիվ հաշվետվությունը ԵԱՀԿ ԽՎ Թբիլիսիի խորհրդաժողովում, որը մեկ անգամ ևս ցույց տվեց ԵԱՀԿ անդամ պետությունների պատվիրակություններին, որ ՀՀ ԱԺ պատվիրակությունը ԵԱՀԿ Խորհրդարանական վեհաժողովում սակարկության չի դնում իր սկզբունքները ղարաբաղյան կարգավորման հարցում, հանդես է գալիս որպես հուսալի դաշնակից, միևնույն ժամանակ՝ ղեկավարվում է սեփական ազգային անվտանգության ապահովման բարձրագույն շահերով։ Եվ եթե Ադրբեջանի պատվիրակության համար «հաջողություն» էր այն, որ Հայաստանի պատվիրակության առաջարկած առանձին լրացումներ չընդունվեցին, և այդ պատճառով նրանք, ինչ-որ կերպ իրենց դեմքը պահպանելու համար, «կողմ» քվեարկեցին Հռչակագրին՝ միևնույն ժամանակ հիանալի գիտակցելով հայկական կողմի համար պարագրաֆներ 35-ի, 47-ի, 48-ի, 49-ի բախտորոշ, դրական նշանակությունը՝ ղարաբաղյան հակամարտության կարգավորման նպատակով, ապա մենք ապրիլյան (2016թ.) պատերազմից հետո միջազգային կազմակերպությունների համաժողովներում պարտավոր ենք որակապես նոր խնդիրներ առաջադրել։ Խնդիրներ, որոնք կհետապնդեն միանգամայն որոշակի նպատակ. ընդունել բանաձև «Լեռնային Ղարաբաղի Հանրապետության անկախության ճանաչման անհրաժեշտության մասին», որի նախագիծը պատրաստել է ֆրանսիացի պատվիրակ Գի Տեսիեն։ Բայց դա այլ վերլուծության թեմա է։
Հ.Գ.-Ծանոթանալով արտասահմանյան և հայկական ամենատարբեր էլեկտրոնային ԶԼՄ-ների հրապարակումներին՝ կարող ենք նշել, որ նրանց բնավ համահունչ չէին բավական անախորժ zham.am և 7or.am էլեկտրոնային պարբերականները, որոնք վերջին ամիսներին վերածվել էին ոչ անհայտ Վարդան Օսկանյանի շահերը պաշտպանող փաստաբանական գրասենյակի։ Ընդ որում՝ պաշտպանելով նրան ընդդիմության գծով իր գործընկերոջ քննադատությունից, նրանք, իրար խառնված, չգիտես ինչու ինձ էլ էին վերցրել իրենց նողկալի բարբաջանքի շրջապտույտի մեջ՝ վիրավորանքներ հնչեցնելով իմ հասցեին։ Մասնագիտությամբ արտադրական գործընթացների ավտոմատացման ինժեներ լինելով՝ շատ բան չեմ հասկանում կոյուղուց, անգամ եթե այն տեղեկատվական է։ Եվ նշված ԶԼՄ-ներն ամուր պահում են առաջնության դափնին տեղեկատվական գարշահոտության տարածման մրցույթում։ Իհարկե, կարելի էր և չարձագանքել նրանց հերթական տեղեկատվական ծծմբաջրածնային արտանետմանը, բայց այդ դեպքում իմ գործընկերները կարող էին կշտամբել ինձ անհետևողականության համար։ Չէ՞ որ ՀՀ ԱԺ նիստերից մեկում ունեցած իմ ելույթում ես նախազգուշացրել էի այս դեմքերին, որ նրանք ուշքի բերեն իրենց լաքեյներին, այլապես ես ու գործընկերներս խիստ հետևողականորեն կպսակազերծենք դրանց տերերի, այն է՝ Վարդան Օսկանյան և Co-ի անարժան էությունը։ Օրինակ, ինչո՞ւ դեմոկրատիայի այդ նախանձախնդիրն այդպես էլ դատի չտվեց ՀՀ Ազգային անվտանգության ծառայության քննչական մարմիններին իր պատիվն ու արժանապատվությունը վիրավորելու և անբասիր անունն արատավորելու համար, որոնք ուղղակի մեղադրում էին նրան փողեր լվանալու մեջ ՀՀ Քր.օր. 178 և 190 հոդվածներով (փողերի լվացում և յուրացում)։ Մի՞թե նա կասկածում է մեր դատական համակարգի օբյեկտիվությանը։ Չէ՞ որ արտաքին գործերի նախարար եղած ժամանակ նա ավելի քան 10 տարի որևէ հանդիմանանք չի ունեցել նրա հասցեին, էլ չենք ասում Մարդու իրավունքների եվրոպական դատարանի մասին։ Նա դա կարող է անել նաև հիմա՝ տրամադրության տակ այդքան նշանակալի տեղեկատվական ռեսուրս ունենալով։ Կարելի էր չարձագանքել սույն գործչի ի սկզբանե նեխած տեղեկատվական ռեսուրսների վիրավորական հրապարակումներին, մանավանդ որ ՀՀ յուրաքանչյուր խելամիտ քաղաքացի հիանալի գիտի, թե դեռևս չբացահայտված քրեական գործերի ինչ գործող անձինք են սնուցում վերոնշյալ տեղեկատվական որջը։ Իսկ վերջում խորհուրդ եմ տալիս Վարդան Մինասովիչին՝ ձգել իր մանկլավիկների սանձերը, թե չէ «վոյևէ բան» նրան չի օգնի, իսկ պատասխան ռեակցիան իրեն երկար սպասել չի տա ու քիչ էլ չի թվա։
Հ.-Գ. 2-ԵԱՀԿ ԽՎ-ի նստաշրջանին հաջորդած իմ հասցեին վայրահաչոցները դեռ չէին դադարել, ինչ նոր ոռնոցներով փորձեցին ողողել լրատվական դաշտը: Եկեք տեսեք, որ ոմանց խիստ անցանկալի էր Տեղական ինքնակառավարման մարմինների առաջիկա ընտրություններում Գյումրիի քաղաքապետի թեկնածու Սամվել Բալասանյանին սատարելու վերաբերյալ Ազգային Միաբանություն կուսակցության որոշումը: Այս անգամ իր հիստերիկ հոդվածով աչքի ընկավ Խաթաբալայի հերոս Զամբախովի պատվերով մի քանի ղուրուշով լալկան կանանց նմանակող, մերօրյա բոշաների asekose.am կայքը, հանրությանը և ոչ մի բան չասող գագիկհամբարյանով վկլյուչիտելնօ: Իհարկե, կարելի էր երիտասարդական տարիներից ողջույնի մի քանի խոսք հղել սույն տարրին, սակայն ակամայից հիշեցի հայ նշանավոր պետական-քաղաքական գործիչ Կարեն Սերոբի Դեմիրճյանի խորհուրդը` ամեն համբալի ասած-գրածին մի արձագանքի, դա նրանց համար մեծ նվեր է: Ամեն:
ԱՐՏԱՇԵՍ ԳԵՂԱՄՅԱՆ
Հայաստանի Ազգային ժողովի պատգամավոր Հանրապետական կուսակցությունից,
ԵԱՀԿ Խորհրդարանական վեհաժողովում ԱԺ պատվիրակության ղեկավար,
«Ազգային միաբանություն» կուսակցության նախագահ