«Անցյալը» կգերազանցի ձեր սպասումները».Բացառիկ մանրամասներ հեռուստասերիալից

«Իրավունքը» բացառիկ մանրամասներ է պարզել հեռուստադիտողին քաջ հայտնի «Անցյալ» հեռուսասերիալից: Մեր զրուցակիցն է հեռուստասերիալի սցենարի հեղինակ եւ պրոդյուսեր ՊՈՂՈՍ ԱՄԻՐԽԱՆՅԱՆԸ, որն անդրադարձավ ինչպես սերիալի առաջիկա զարգացումներին, այնպես էլ դերասանական կազմին ու հնչող քննադատություններին:

- Հնդկական եւ հայկական սերիալների մերօրյա բբազմազանության մեջ, արդյո՞ք կարծում եք, որ «Անցյալը» կարող է մրցունակ մնալ:

- Ցանկացած որակով նախագիծ մրցունակ է եւ հստակ կարող եմ ասել, որ լսարան է ունենում: Ինձ եւ շատերի համար «Անցյալը» որակով նախագիծ է, որտեղ շեշտը դրված չի եղել հանրությանը ներկայացնել հերթական սերիալը: Երկար ենք մտածել, քննարկել, որպեսզի նոր պատմություն ներկայացնենք հանրությանը: Եվ ուրախ եմ, որ հեռուստասերիալը ձեռք բերեց բավականին մեծ հեռուստալսարան, որի վառ ապացույցն են հեռուստատեսային վարկանիշային աղյուսակները: Հանրության բազում շերտեր կարող են հասանելի դարձնել այդ աղյուսակները եւ համոզվել, որ «Անցյալն» իր ուրույն տեղն ունի հայկական հեռուստաեթերում:

- Հետաքրքիր է՝ վերջապես ձեռբազատվե՞լ ենք այն բարդույթներից, որ սցենարը հարմարեցվում է դերասանին, թե՞ հաջողվել է «Անցյալում» համապատասխանեցնել նրանց սցենարին:

- Այնպես է ստացվել, որ իմ դերասաններից մի քանիսը հարմարեցվել են կերպարին, սակայն ունեցել եմ կերպարներ, որ նման են եղել հենց դերասաններիս: Նման խնդրի առաջ չեմ կանգնել այս նախագծում, որովհետեւ դերասանները բոլորն էլ քիչ-քիչ կերտել են իրենց կերպարները:

- Իսկ ինչպե՞ս է կայացվել դերասանական կազմի ընտրությունը:

- Երկար ենք մտածել, ընտրել ենք, մի քանիսին նախնական նկարահանումներ ենք արել: Գլխավոր հերոսուհիս ինձ համար միանշանակ Նանե Արզումանյանը պետք է լիներ: Հերոսիս երկար չփնտրեցի՝ Հայկ Աֆրիկյան, ով հրաշալի կատարում է իր առջեւ դրված խնդիրը: Պրոֆեսիոնալ դերասանների կողքին կան նաեւ սկսնակներ՝ Հակինթ Բաղդասարյան, Մարիաննա Գեւորգյան, Նիկոլայ Եղիազարյան, Ռուզան Վիթ, Ռուզաննա Ղազարյան, Էլիզա Թունյան, Անչոկ, Լուիզա Շերմազանյան, Սեմ Ասատրյան, Անահիտ Մանուկյան, Դավիթ Ղարիբյան եւ այլք: Ուրախ եմ տեղեկացնել, որ սերիալում կընդգրկվեն այլ պրոֆեսիոնալ դերասաններ եւս, որոնց թվում է Կայա Խուրշուդյանը, որը երկար դադարից հետո կվերադառնա հեռուստաէկրաններ միանգամայն այլ կերպարով: Այսպիսի Կայա դեռ ոչ ոք չի տեսել:

- Անդրադառնանք նաեւ հեռուստասերիալի սաունդթրեքին…

- Սաունդթրեքը երգում է չափից դուրս տաղանդավոր երգչուհիներից մեը՝ Անի Քրիստին, ում շնորհակալ եմ երգը մեզ վստահելու համար: «Ինձ մի մեղադրի» երգը համահունչ էր հեռուստասերիալին, ուստիեւ խնդրեցինք, որպեսզի Անին այն տրամադրի մեզ, եւ նա էլ մեծ սիրով համաձայնվեց, ինչի համար շնորհակալ եմ անչափ: Ասեմ նաեւ, որ երգը միանշանակ կունենա տեսահոլովակ:

- Ովքե՞ր են աշխատում «Անցյալի» վրա…

- Որպես ռեժիսոր՝ ընտրել եմ իմ շատ տաղանդավոր ընկերներից մեկին` Հայկ Աֆրիկյանին, ով գիտի ինչպես ճիշտ կատարել իր գործը: Իսկ հեռուստասերիալի նոր սերիաները կգրի չափից դուրս տաղանդավոր Դիանա Մարդանյանը: Վստահեցնում եմ, որ հեռուստադիտողը շունչը պահած սպասելու է հեռուստասերիալի զարգացումներին:

- Ի դեպ, հեռուստասերիալներ ցուցադրող ավանդական հեռուստաընկերությունների փոխարեն, «Անցյալը» ցուցադրվում է 21TV-ով: Ինչո՞ւ ընտրվեց հենց այս հեռուստաընկերությունը եւ ինչո՞ւ է հեռուստասերիալը ցուցադրվում շաբաթական 4 օր:

- 21TV-ին ընտրեցինք, քանի որ այն ամենաերիտասարդական հեռուստաալիքն է, հեռուստասերիալի համար ամենաթիրախային լսարանը հենց այս հեռուստաընկերությունն էր: Շնորհակալ եմ 21TV-ի ողջ անձնակազմին վստահության համար: Շաբաթական 4 օր, որպեսզի հեռուստադիտողը չհոգնի: Հեռուստասերիալը էկրաններին շատ չի մնա: Ամռանը այն կմոտենա իր հանգուցալուծմանը:

- Ի՞նչ է սպասվում գլխավոր հերոսներին, որովհետեւ մենք սովորենք տեսնել, որ հայկական հեռուստասերիալներում սցենարիստներն անխնա տանջում են նրանց՝ ամենասարսափելի ճակատագրերի արժանացնելով:

-Հերոսները կտանջվեն, կհուզեն, կստիպեն իրենց հետ ապրել ցանկացած վայրկյանը: Վստահեցնում եմ ինտրիգները գնալով ավելանալու է եւ հեռուստադիտողը նրանց համար ցավելու է, նրանց հետ՝ ուրախանալու: «Անցյալի» գլխավոր հերոսներից մի քանիսը կունենան սպասված երջանիկ ավարտ, իսկ մի քանիսը կստիպեն իրենց կերպարի մահով հուզվել հեռուստադիտողին:

- Կա՞ն չի կարելիի սահմաններ, որի շրջանակների մեջ փորձել եք տեղավորվել Ձեր հեռուստասերիալում:

- Ուրախ եմ, որ սահմանափակումներ չունեմ այս առումով, ամեն ինչ ներկայացվում է չափի մեջ եւ գեղեցիկ: Փորձում ենք պահել ցենզուրան եւ գրական հայերենը:

- Իսկ ինչպես եք վերաբերվում քննադատություններին՝ կապված դերասանների ընտրության, տեխնիկական թերությունների եւ սյուժեի առումով:

- Նման մանր բաների ուշադրություն չեմ դարձնում: Քննադատությունները միշտ եղել են, կան ու կլինեն: Կառաջարկեմ քննադատողներին նկարահանել սեփական նախագծերը եւ զբաղվել դրանցով: Ցանկացած նախագիծ ունենում է խնդիրներ, այնպես չի, որ մերն անթերի է:

- Ի վերջո, ո՞ւմ անցյալի մասին է հեռուստասերիալը, թե՞ այն իրական հիմքեր չունի:

- Հիմքեր կան, որոնց մասին, պարզապես, չեմ բարձրաձայնի: Ի վերջո, հանրային մարդկանց մեծ մասը Նանեի մեջ կտեսնի հենց իրեն:

- Ի՞նչ կմաղթեք «Անցյալի» հեռուստադիտողին:

- Համբերություն եւ վստահեցնում եմ, որ «Անցյալը» կգերազանցի ձեր սպասումները:

ՀՐԱՆՏ ՍԱՐԱՖՅԱՆ

Այս թեմայով Հաղթեցինք բոլորս. պարային հրավառություն` Երեւանում Պատահակա՞ն է, որ ՆԱՏՕ-ի հետախուզական կառույցների ներկայացուցիչները Հայաստանում են. Հայկ Նահապետյան Հավատացնում եմ` Ղարաբաղի էջը փակված չէ՛. Հայկ Նահապետյան Ինչքա՞ն կարելի է մեր ազգին բզել, վերջը այդ պայթյունը լինելու է, վստահ եմ. Դավիթ Մկրտչյան Գրանտակեր պրոպագանդիստները… պետք է վերջ տան հակառուսականության տարածմանը