Ինչ պայմանով կկայանա Պուտին-Փաշինյան հանդիպումը
Մամուլի տեսություն«Լավ չէ՞ կռիվը սկսել 2 կմ-ից, քան 200 մետրից»։ Ի պատասխան Գեղամ Նազարյանի հարցին, Նիկոլը նորից իր «ռազմական հանճարը» գործադրեց, թե. «Բայց, կներեք, սա 12-րդ դարը չէ, որ 50 մետրի հեռավորությունը բան որոշի, որովհետեւ նիզակը կարող է 50 մետր այս կողմ, այն կողմ ընկնի, կամ քարը պարսատիկով որ նետես, կարող է 50 մետր այս կողմ, այն կողմ ընկնի։ Այսօր ժամանակակից զենքերով տասնյակ կիլոմետրերի վրա թիրախ խոցելու խնդիր չկա։ Այսօր Ոսկեպարում տեղեր կան, որ 100-200 կմ-ի մասին է խոսքը հեռավորության։ Ես չեմ ասում՝ 100 մետրի ու 50 մետրի միջեւ տարբերություն չկա, բայց այդ հեռավորությունն այսօր խնդիր չի լուծում»: Ու էս խելքով երկի՞ր են ղեկավարում:
ՈՒ ԱՅՍՊԵՍ ԷԼ ՔԱՂԱՔԱԿԱՆՈՒԹՅՈՒՆ ԵՆ «ԿԱՌՈՒՑՈՒՄ»
Ստիպված ենք խոսել պարզագույն ճշմարտություններից: Գոնե ուկրաինական պատերազմի փորձն ուսումնասիրեք: Այնտեղ գործում են հեռահար զինատեսակներ, որոնց մասին «ռազմական հանճար» Նիկոլը երեւի միայն անուններով է լսել կամ առանց դրա: Մինչդեռ բազմաթիվ դեպքեր են ֆիքսվել, ավելին` դեպքերի հիմնական մասում հակառակորդի դիրքերի մաքսիմալ արագ մոտենալը կամ մեկ փոքրիկ բարձունքի տիրապետելը, լուծել է ճակատամարտի ելքը: Ու Նիկոլը գոնե պատկերացնո՞ւմ է, որ հակառակորդը հարձակվելու դեպքում 50-100 մետրը կհաղթահարի շատ ավելի արագ, քան 200-ը, 300-ը, էլ չասած` 500-ը: Կամ այսպես. պաշտպանվողների համար 50-100 մետրի վրա գտնվող հակառակորդը շատ ավելի մեծ վտանգ է, քան 500 մետրի վրա գտնվողը: Այլ օրինակ. թեեւ անօդաչուների դար է, բայց նորից ուկրաինական պատերազմի փորձը ցույց տվեց, որ մեկ փոքրիկ բարձունքից կարելի է շատ ավելի արագ եւ ճշգրիտ կոորդինացնել հրետանու կրակը, առավել եւս` զանգվածային կրակը, քան անօդաչուներից: Ու այս պայմաններում, երբ երկիր, ասել է թե` նաեւ բանակ եւ պաշտպանություն ղեկավարող անձը դիրքային մոտիկության մասին դատողություններ է անում նետ ու նիզակի մակարդակով` կնետեն, թե` չէ, լիովին պարզ է դառնում, թե ինչու ենք այս ողբալի վիճակին հասել:
Ու խոսքը միայն բանակի մասին չէ. հիշատակված պարզագույն օրինակը գալիս է հուշելու, որ սույն անձը մյուս բոլոր հարցերում եւս պետք է որ առաջնորդվի նույն «պրիմիտիվ նետ ու նիզակի» տրամաբանությամբ: Այդ թվում, երբ ԱԺ նույն նիստում Նիկոլը սկսեց դատողություններ անել իր մոգոնած «պատմական Հայաստան եւ իրական Հայաստան բանաձեւերի» մասին: Թե դրանով ինչ է ասում, հասկանալի է. ներկա Հայաստանը կապ չունի մինչ այս եղած Հայաստանի հետ: Այն է՝ Հայաստանը սկսվում է այն պահից, երբ Նիկոլը եկավ իշխանության: Թե ինչ է ասում, դա եւս հասկանալի է. պետք է ամեն ինչ մոռանալ, Ցեղասպանություն, թուրք-ազերի եւ այլն, ու ամեն ինչ սկսել զրոյից: Հա, չմոռանանք, զրոյից սկսեց նաեւ արցախյան բանակցային գործընթացը, ու դրա արդյունքում ի՞նչ եղավ Արցախի հետ, աչքներիս առաջ է: Զրոյից սկսում է «իրական Հայաստանը», եւ Արցախի օրինակը չմոռանանք: Միայն թե այսքան պարզ եւ հասկանալի լինելով հանդերձ` մեկ բան կա, որ էլի Նիկոլի այդ տրամաբանությունը «պրիմիտիվ նետ ու նիզակի» շրջանակներում է թողնում. ինչ է, իր իսկ աստվածանարգությունից հետո, երբ իրեն Հիսուսի հետ էր համեմատում, լրջորեն հավատացել է, թե կարող է Արարի՞չ լինել՝ Հայաստանը քանդել եւ նորը «ստեղծել»:
ԻՆՉ ԱԿՆԱՐԿԵՑ ՆԻԿՈԼԸ
Չնայած, «իրական Հայաստանի» մասին նման (ճիշտ տերմինը չօգտագործենք) ճառերի ֆոնին՝ Նիկոլը ստիպված էր անդրադառնալ նաեւ Արեւմուտքի եւ Ռուսաստանի հետ հարաբերությունների հայտնի թեմային եւ այստեղ ահա պարզ ցույց տվեց, որ «պատմական Հայաստան եւ իրական Հայաստան» այդ ճառերն ընդամենը իր ավերածությունները «պարտակելու» եւ ապագա հավանական ավերածությունները քողարկելու պարզունակ իմաստն ունեն: Նախ` Բրյուսելի հանդիպման մասին: Այսպես, Նիկոլը ստիպված էր խոստովանել, որ այն «անվտանգային ենթատեքստ ու օրակարգ չի ունեցել»: Կարճ ասած, այս խառը պահին Արեւմուտքին բացարձակապես չի հետաքրքրել Հայաստանի անվտանգային հարցերը: Ճիշտ է, մի քիչ էլ գովերգեց Արեւմուտքին, թե խոստացել են այս-այս, բայց գլխավորը փոխել չես կարող. անվտանգության հարցում Արեւմուտքը որեւէ բան չի տալու:
Ապա մի քիչ էլ ՀԱՊԿ-ի մասին ծածկված ոճով ճառեր կարդալով, նա անցավ Հայաստան-Ռուսաստան հարաբերություններին՝ խոստովանելով, որ անգամ այն իրավիճակում, երբ այդ հարաբերությունները «իրենց լավագույն ժամանակները չեն ապրում», էլի մեկ է՝ դրանց կարեւորությունը մեր պետականության, ինքնիշխանության, անվտանգության ու տնտեսության համար դժվար է գերագնահատել: Ու հաջորդեց «տարօրինակ» մտքի կրկնությունը, թե. «Այսօր մենք իսկապես ՌԴ-ի հետ մեր հարաբերություններում ոչ մի սխալ քայլ չենք արել: Չկա մի տեղ, որտեղ մեր գործընկերները կարող են մեզ մեղադրել մեր պարտավորությունները չկատարելու մեջ»: Եթե այդպես է, բա էլ ինչո՞ւ է արդարանում: Առավել եւս, շարունակելով, թե. «Մենք գնահատում ենք այն ահռելի դրականը, որ եղել է եւ կա մեր հարաբերությունների մեջ: Բայց նաեւ կարեւոր է հասկանալ՝ թե ինչ եւ ինչու է տեղի ունենում մեր հարաբերություններում խորքային եւ հայեցակարգային իմաստով… Մենք ՌԴ հետ նման աշխատանքի պատրաստ ենք»: Ու հասավ նրան, թե՝ «ԵԱՏՄ մայիսի 8-ի նիստին մասնակցությունը քննարկում ենք»:
Եթե «արանքի ջուրը» մի կողմ ենք թողնում, ապա Նիկոլը, ըստ էության, այս պատկերն ուրվագծեց: Արեւմուտքը քաղաքական կամ տնտեսական օգնություն ընդամենը խոստանում է, բայց ներկայիս գլխավոր՝ անվտանգային հարցերում անգամ խոստում չկա: Ռուսաստանից էլ «դժգոհ ենք», բայց նաեւ «ահռելի դրական» ու «աշխատանքի պատրաստ ենք»: Դրանից հետո, հասկանալի է, աբսուրդի է նմանվում, թե՝ «ԵԱՏՄ նիստին մասնակցությունը քննարկում ենք», քանի որ այստեղից արդեն շատ հարցեր են բխում: Նախ, եթե նիկոլյան իշխանությունները մինչ այս ասում էին, թե հիմնական խնդիրը ՀԱՊԿ-ի հետ է, այս կառույցին անդամակցությունն են «սառեցրել», իսկ ԵԱՏՄ-ի հետ կապված հիմնականում դրական էին արտահայտվում՝ հպարտորեն մատնանշելով այդ ուղղությամբ հայաստանյան արտահանման ճոխ աճերը, բա հիմա ինչպե՞ս եղավ, որ նույն ԵԱՏՄ նիստին մասնակցությունն ընդամենը «քննարկում եք», սա հերթական հիմնավորումը չէ՞, որ խնդիրը Ռուսաստանի հետ թշնամանալն է, իսկ ՀԱՊԿ-ն ընդամենը պատրվակ է: Կամ, այդ ինչպե՞ս է, որ ԵԱՏՄ նիստին մասնակցությունը գոնե «քննարկում եք», բայց ահա Միրզոյան Արոն կտրուկ մերժել է ԱՊՀ-ի ԱԳ նախարարների հանդիպմանը մասնակցել:
Բայց, չնայած այս ամենին, այն, որ Նիկոլը «քննարկում է» Մոսկվա գնալ-չգնալու հարցը, արդեն իսկ հետաքրքիր է: Առավել եւս, որ այդ «քննարկելու» եւ «աշխատելու պատրաստ լինելու» խոսքերը Մոսկվայում, նման է, որ ընկալել են որպես ակնարկ: Այդ մասին է հուշում այն, որ ՌԴ նախագահի խոսնակ Դմիտրի Պեսկովն օպերատիվ կերպով արձագանքեց, թե. «Դուք գիտեք, որ Հայաստանը մեր մտերիմ գործընկերն է, մեր դաշնակիցը, այն երկիրը, որի հետ մեզ միավորում են ինտեգրացիոն բազմաթիվ ձեւաչափեր՝ ԱՊՀ, ԵԱՏՄ եւ այլն, եւ, իհարկե, պատմական երկկողմ հարաբերությունները, հումանիտար հարաբերությունները, կարեւորությունը. ինչը դժվար է»: Ինչ վերաբերում է հարցին, թե՝ Հայաստանը ՌԴ-ի հետ հարաբերություններում իրո՞ք ոչ մի սխալ քայլ չի արել, Պեսկովն արձագանքեց. «Հուսով ենք, որ տեսանելի ապագայում Պուտինը եւ Փաշինյանը հնարավորություն կունենան անձամբ քննարկել երկկողմ հարաբերությունների հարցերը»:
Այսինքն, մինչ այս կային հրապարակային խոսակցություններ, որ Նիկոլը փորձում է կամուրջներ ստեղծել՝ մայիսի 9-ին Կարմիր հրապարակում սպասվող ռազմական շքերթի առիթով մեկնել Մոսկվա եւ հանդիպել Պուտինի հետ, եւ ԱԺ-ում նրա ելույթը, ըստ էության, այդ վարկածի օգտին էին: Եվ Մոսկվայից եկավ պատասխան, թե` դեմ չենք:
ՄՈՍԿՎԱ ՄԵԿՆԻ, ՈՐ Ի՞ՆՉ
Բայց միայն Պեսկովի հայտարարություններով չէ, որ Մոսկվայի պատասխանը սահմանափակվեց: Այսինքն, եթե անգամ Նիկոլը մեկնի Մոսկվա, կայանա Պուտինի հետ նրա հանդիպումը, ապա մեկ է, մնում է հարցը, թե ինչի՞ համար, դրանից ի՞նչ են սպասում, դրական տեղաշարժեր կարո՞ղ են լինել: Այսինքն, եթե հանդիպում են, ու դրանից հետո Նիկոլը վերադառնում եւ շարունակում է, թե՝ ՀԱՊԿ-ից դուրս ենք գալիս, գնում ենք ԵՄ, որտեղ մեզ սպասող չկա, ապա էլ ո՞րն է հանդիպման իմաստը: Իհարկե, Պեսկովի խոսքում էլ կար ակնարկ, թե Մոսկվան այդ հանդիպումից ինչ է ակնկալում՝ «մեզ միավորում են ինտեգրացիոն բազմաթիվ ձեւաչափեր՝ ԱՊՀ, ԵԱՏՄ եւ այլն», այսինքն, պետք է այդ ամենը հետագայում եւս «միավորի»:
Սակայն չմոռանանք, որ ԱՊՀ, ԵԱՏՄ, ՀԱՊԿ թեմաները հայ-ռուսական հարաբերություններում ածանցյալ են: Հիմքը եղել եւ մնում է նույնը՝ Հայաստանը Ռուսաստանի՞, թե՝ Արեւմուտքի հետ է, որի ներկայիս թիվ 1 ինդիկատորն այն է, թե հայ-ադրբեջանական «խաղաղության համաձայնագիրը» ո՞ր հարթակում է կնքվելու: Ու առաջին հերթին կոմունիկացիաների հարցը, որը կտանի նաեւ սահմանազատման խնդրի համեմատաբար արագ եւ տրամաբանական լուծման, ինչի մասին, ի դեպ, օրերս խոսում էր նաեւ Արոն: Եվ ահա, Պեսկովին զուգահեռ, հնչեց նաեւ ՌԴ ԱԳՆ խոսնակ Զախարովայի հայտարարությունը, որով նա հերթական անգամ խոսեց Արեւմուտքի «վտանգավոր դերի մասին, որն այժմ կեղտոտ խաղ է սկսում տարածաշրջանում իրավիճակը ապակայունացնելու համար»: Ապա նաեւ, թե. «Բաքվի եւ Երեւանի միջեւ բոլոր տարածքային վեճերը եւ փոխադարձ պահանջները պետք է լուծվեն բացառապես քաղաքական եւ դիվանագիտական մեթոդներով: Մենք կողմերին կոչ ենք անում ցուցաբերել առավելագույն զսպվածություն եւ նվազեցնել ռազմատենչ հռետորաբանության ինտենսիվությունը»: Վերջապես, որ տարածաշրջանում կայուն խաղաղության եւ բարգավաճման հաստատման համար անհրաժեշտ բոլոր մեխանիզմներն արդեն կան, եւ խնդիրները պետք է լուծվեն Ռուսաստանի, Հայաստանի եւ Ադրբեջանի ղեկավարների միջեւ եռակողմ պայմանավորվածությունների շրջանակում:
Այսինքն, Մոսկվայի առաջարկը եղել եւ մնում է հայ-ադրբեջանական գործընթացը եռակողմ պայմանավորվածությունների շրջանակներում լուծելու տարբերակը, որին Ալիեւը հրապարակավ համաձայնություն տվել է, իսկ Բրյուսելի վրա հույսը դրած Նիկոլը հրաժարվում էր: Բայց ահա բրյուսելյան հարթակը փաստացի այս պահին մեռած վիճակում է, եւ Նիկոլի վերջին այցը Բրյուսել ցույց տվեց, որ գոնե այս պահին դրան հարություն տալ հնարավոր չէ: Այս պարագայում Նիկոլը պատրա՞ստ է վերադառնալ եռակողմ հարթակ, որը ներկա լարվածությունը կարգավորելու միակ ռեալ տարբերակն է, ահա այս հարցն է, որ Մոսկվան դնում է նրա առաջ: Հակառակ դեպքում Պուտինի հետ հանդիպելն էլ է դառնում անիմաստ: