ՋԵՐՄ ԸՆԴՈՒՆԵԼՈՒԹՅԱՆ ԱՐԺԱՆԱՑԱՎ ԱՆՎԱՆԻ ՇԱԽՄԱՏԻՍՏ, ԽՍՀՄ ՍՊՈՐՏԻ ՎԱՐՊԵՏ, ՄԱՐԶԱԴՊՐՈՑԻ ՀԻՄՆԱԴԻՐՆԵՐԻՑ ՀՈՎԻԿ ԽԱԼԻԿՅԱՆԸ
ՍպորտIravunk. com -ի մարզական թղթակիցը Գյումրիում էր։ Հայաստանի սպորտի մայրաքաղաք Գյումրիի Շախմատի մարզադպրոցը հյուրընկալել էր մարզադպրոցի հիմնադիրներից, ԽՍՀՄ սպորտի վարպետ, ՀՀ վաստակավոր մարզիչ, ՖԻԴԵ֊ի վարպետ, անվանի շախմատիստ ՀՈՎԻԿ ՀՈՎՀԱՆՆԵՍԻ ԽԱԼԻԿՅԱՆԻՆ, ինչպես նաև մեր հայտնի շախմատիստներ ԷԼԻՆԱ ԴԱՆԻԵԼՅԱՆԻՆ ու ԶԱՎԵՆ ԱՆԴՐԵԱՍՅԱՆԻՆ։ Պարոն Խալիկյանը իր ելույթում նշեց, որ Գյումրին մշտապես աչքի է ընկել բարձր արդյունքներով, միջազգային գրոսմայստերներ, վարպետներ, միջազգային և հանրապետական հաղթողներ, բարձրակարգ մարզիչներ, մրցավարներ, մարդիկ, ում համար շախմատը դարձել է կենսակերպ ու առօրյա։ Նա հուշեր պատմեց նաև իր հարազատ քաղաքի Լենինականի /այժմ Գյումրիի /մասին։ Նա ցավով նշեց, որ նոր սերունդը այդքան մեծ հետաքրքրություն չունի շախմատի հանդեպ։ Մրցաշարերի ժամանակ նույնիսկ հանդիսատես չի լինում։ Նա շախմատային խաղատախտակի վրա ցույց տվեց նաև նոր հնարքներ։ Անվանի շախմատիստի մեծարման ցերեկույթին ներկա էին ընկերները, ուսանողներ, աշակերտներ, հյուրեր։ Նշենք, որ Գյումրիի շախմատի մարզադպրոցի հիմնադիրներից մեկն է Հովիկ Խալիկյանը ի թիվս Վիկտոր Համբարձումյանի, Լորիս Քալաշյանի ու Դոնարա Հարությունյանի։ Հովիկ Խալիկյանը, առաջիններից մեկն է, որ 70֊ականների սկզբներին, նաև անվանի ծանրորդ Վարդան Միլիտոսյանը, որ Լենինականի սպորտը հնչեցրին Խորհրդային Միության մակարդակով։ Շախմատը երկու խաղացողի համար նախատեսված սեղանի խաղ է համարվում, որը խաղում են հաջորդաբար բաց և մուգ գույնի 64 դաշտ ունեցող քառակուսի խաղատախտակի վրա։ Աշխարհում ամենատարածված խաղերից մեկն է, միլիոնավոր մարդիկ շախմատ են խաղում տանը, հասարակական վայրերում, շախմատային ակումբներում։ Շախմատը Միջազգային Օլիմպիական կոմիտեի կողմից ճանաչված մարզատեսակ է, միջազգային շախմատային մրցությունները անցկացվում են Շախմատի միջազգային ֆեդերացիայի կողմից։ Հայաստանի դպրոցներում դասավանդում են շախմատ առարկան, հնում այն անվանել են ճատրակ։ Միջոցառման ժամանակ, շախմատային հետաքրքիր խաղով հանդես եկան մեր հայտնի շախմատիստներ Էլինա Դանիելյանն ու Զավեն Անդրեասյանը։ Ներկաները մեծ բավականություն ստացած հեռացան մարզադպրոցից, հետագայում կրկին հանդիպելու ակնկալիքով։
Պատրաստեց ՀՈՎՀԱՆՆԵՍ ՍԱՐԳՍՅԱՆԸ