Կարելի է մերկ մարմին ցույց չտալ, էժան կատակներ չանել, բայց արդյունքում ստանալ լավ հումոր. առաջնախաղ՝ Պարոնյանում

Երկու աղքատ ընտանիք, որոնք կիսում են ընդհանուր կացարանը, կանգնած են անօթեւան դառնալու վտանգի առաջ, եթե կարճ ժամկետում չմարեն վարձակալության պարտքը։ Այս իրավիճակում նրանք շատ անսովոր կերպով փորձում են գումար հայթայթել՝ ռոմանտիկ արկածներ փնտրող տղամարդկանց գայթակղելով եւ գրպանները դատարկելով: Ամեն ինչ լավ է ընթանում՝ մինչեւ հերթական հաճախորդը հանկարծ «փչացնում է» խաբեբաների կողմից հիանալի մշակված սցենարը, որից հետո պատմությունն անսպասելի շրջադարձ է ստանում: Բոլոր ժամանակներում խիստ ակտուալ բովանդակությամբ՝ իտալացի մեծ կատակերգու Էդուարդո Դե Ֆիլիպոյի անկանխատեսելի շրջադարձերով լի «Ցիլինդր»-ը բարձրացավ Հ. Պարոնյանի անվան երաժշտական կոմեդիայի պետական թատրոնի բեմ:

«ԵԹԵ ԴՈՒ ՈՒՆԵՍ ԱՅԴ ՑԻԼԻՆԴՐԸ, ՀՐԱՄԱՆՆԵՐ ԵՍ ՏԱԼԻՍ, ԵՎ ԴՐԱՆՔ ԴԱՌՆՈՒՄ ԵՆ ՈՍԿԻ»

Ինչու հենց այս ստեղծագործությունը որոշվեց բեմադրել, եւ որքանով է այն այսօր արդիական, հետաքրքրվեցինք «Ցիլինդր»-ի բեմադրիչ ԱՐԹՈՒՐ ՍԱՐԻԲԵԿՅԱՆԻՑ:

— Այն, որ «Ցիլինդր»-ը միշտ է արդիական, կարծում եմ՝ խոսում է Էդուարդո Դե Ֆիլիպոյի ստեղծագործության այսքան երկար ապրելու մասին փաստը: Այստեղ ճակատային, էժան հումոր չկա, թաքնված հումոր է: Եկեք չմեկնաբանեմ՝ ինչ է նշանակում ցիլինդրով մեկը լինելը, այդքանով ասված է արդեն, թե որքանով է այն այսօր արդիական: Այսինքն, կարեւոր չէ ով լինելդ, եթե դու ունես այդ ցիլինդրը, հրամաններ ես տալիս, եւ դրանք դառնում են ոսկի՝ աջը դառնում է ձախ, ձախն այլեւս դառնում է աջ:

— Պարոն Սարիբեկյան, անդրադառնանք դերասանական կազմին. ինչպե՞ս ընթացան փորձերը:

— Բոլոր դերակատարները Հ. Պարոնյանի անվան երաժշտական կոմեդիայի պետական թատրոնի դերասաններն են. դրսից մարդ չկա հրավիրված: Ըստ էության, ընտրել եմ այն  դերասաններին, որոնք կհամապատասխանեին ստեղծագործության կերպարներին: Միայն ասեմ, որ դերերից մեկը կատարում էր թատրոնի հենասյուներից մեկը՝ բոլորիս կողմից սիրված դերասան Բորիս Պեպանյանը, բայց, ցավոք սրտի, փորձերի ժամանակ նա վնասվածք ստացավ, ինչպես վնասվածք են ստանում բալետ պարողները կամ ֆուտբոլիստները: Մենք ստիպված եղանք վերջին հինգ օրվա մեջ փոխարինել նրան Արթուր Պետրոսյանով:

«ՀԱՆԴԻՍԱՏԵՍՆ ԱՅՍՕՐ ՇԱՏ ԲԱՐԱԿ ԹԵԼԻ ՎՐԱ Է ԿԱՆԳՆԱԾ, ԼՐԻՎ ՈՒՐԻՇ ՌԻԹՄՈՎ Է ԱՊՐՈՒՄ»

— Հեշտությա՞մբ հաջողվեց գտնել այն լուծումը, թե ինչպես 18+ բովանդակությամբ ներկայացում բեմադրել՝ առանց 18+ տեսարանների:

— Մեր հանդիսատեսն այսօր լարախաղացի կարգավիճակում է գտնվում, շատ բարակ թելի վրա է կանգնած, եւ մի քիչ ավելի դժվար է հասկանալ ու ընտրել այն պիեսները, որոնք կհետաքրքրեն հանդիսատեսին: Հանդիսատեսն այսօր ապրում է լրիվ ուրիշ ռիթմով, իր համար մի րոպեն մի ժամ է թվում: Բայց ներկայացման մեջ ինձ համար ամենակարեւորն այն էր, որ չլինեն էժանագին եւ սպասված հումորներ: Հուսով եմ՝ հանդիսատեսը չգնաց զզված, այլ գնաց մի փոքր բավականություն ստանալով եւ հավատալով, որ կարելի է մերկ մարմին ցույց չտալ, էժան կատակներ չանել, բայց արդյունքում ստանալ լավ հումոր:

— Առաջնախաղին Դուք դահլիճից էիք հետեւում ներկայացմանը,  եղա՞ն դրվագներ, որոնք հաջորդիվ կփորձեք  նոր շտկումներ մտցնել:

— Ինձ թվում է՝ չկա ներկայացում, որը չունենա թերություններ: Ամեն ներկայացում կենդանի օրգանիզմ է, խնդիրներ լինում են ռիթմի, բառերի ճիշտ արտասանության, ճիշտ ռեպլիկների հետ: Կինո չէ, որ 18 դուբլ նկարելուց հետո՝ գան ճիշտ եզրակացության: Ներկայացումն ունի իր բնականոն ընթացքը, որտեղ լինում են 10-20 միջադեպ, որոնց մասին գիտի միայն ռեժիսորը եւ, բնականաբար, հաջորդ ներկայացմանը փորձում է շտկել:

«ԿԱՐԵՎՈՐ Է, ՈՐ ՀԱՆԴԻՍԱՏԵՍԻ ՀԱՄԱՐ ՆԵՐԿԱՅԱՑՈՒՄ ԴԻՏԵԼԸ ՏՈՆ ԼԻՆԻ»

— Ի՞նչ ապագա է սպասվում ներկայացմանը: «Ցիլինդր»-ը համալրելո՞ւ է Հ. Պարոնյանի անվան երաժշտական կոմեդիայի պետական թատրոնի խաղացանկը:

— Երբ եղավ ներկայացման գլխավոր ցուցադրությունը՝ փակ դիտումը, փոքր շտկումներից հետո՝ թատրոնի գլխավոր ռեժիսոր Հակոբ Ղազանչյանը որոշեց, որ այն պետք է ներառվի խաղացանկում: Ինչ վերաբերում է ապագային, ամեն ներկայացում յուրովի է հարթում իր ճակատագիրը: Այս ներկայացումը եւս կունենա իր սեփական ճակատագիրը, բայց այս պահին չեմ կարող գուշակել, թե ինչ ճակատագիր է ունենալու: Բայց այն, որ թատրոնի խաղացանկում է, արդեն հստակ է:

— Առաջիկայում նախատեսվո՞ւմ են Ձեր բեմադրությամբ նոր ներկայացումներ Պարոնյանի բեմում:

— Ես Պարոնյան թատրոնում հրավիրված ռեժիսոր եմ: Ինձ հրավիրել է Հակոբ Ղազանչյանը: Պարոն Ղազանչյանի հրավերով եւ իմ հայտով բեմադրել ենք այստեղ նաեւ Պաուլո Կոելիոյի «Վերոնիկան որոշում է մեռնել» ներկայացումը, որը լավ հաղթարշավ ունեցավ: Իմ երկրորդ աշխատանքն էր սա, որը հանդիսատեսը կդատի: Ինձ համար կարեւոր է, որ հանդիսատեսի համար ներկայացումը դիտելը տոն լինի, հրավառություն, որը գուցե տեղի ունեցավ:

«ԴԻՄԱՎՈՐՈՒՄ ԵՆ ՀԱԳՈՒՍՏՈՎ, ՃԱՆԱՊԱՐՀՈՒՄ՝ ԽԵԼՔՈՎ» ՀԱՅՏՆԻ ԱՍԱՑՎԱԾՔՆ ԱՅԼԵՎՍ ՉԻ ԳՈՐԾՈՒՄ»

Ի դեպ, ներկայացման մեջ ցիլինդրով տղամարդու` Ագոստինո Մուսկարելլոյի կերպարը կերտել է ՀՀ վաստակավոր արտիստ ԱՎՈ ԽԱԼԱԹՅԱՆԸ: Նա ասում է, որ ոչ մի լավ բան կյանքում հեշտ չի տրվում, այդ թվում՝ դերը:

— Աշխատելու առիթ տվող եւս մեկ գունեղ գործ է «Ցիլինդր»-ը՝ մեր խաղացանկում: Շատ ուրախ եմ, որ Արթուր Սարիբեկյանին վստահվեց էլի, ու շատ ուրախ եմ, որ նա էլ ինձ վստահեց նաեւ դերակատարների ցանկում հանդես գալը: Կարծում եմ՝ այս ներկայացումը իր արժանի հանդիսատեսը կունենա եւ կապրի, որովհետեւ իր ասելիքն էլ այսօր զուգահեռ քայլում է մեր իրականությունում: Ընդհանրապես, շատ զուգահեռներ կարելի է տանել ցիլինդրի դերի մասին մեր օրերում: Նաեւ ուրախ եմ, որ իմ կոլեկտիվի հետ եմ, մեծ դերասանական խումբ է ներգրավված, գործն էլ եվրոպական, դասական, ճաշակով, հումորով պիես է: Էդուարդո Դե Ֆիլիպոն այնպիսի որակի դրամատուրգ է, որի պիեսը խաղալը շատ ավելի հաճելի է դերասաններին:

— Ի՞նչ եք կարծում՝ 21-րդ դարում ե՞ւս մարդկանց գնահատում են ցիլինդրով…

— Այսօր էլ շատ հաճախ դիմավորում են հագուստով, ամբողջ աշխարհում է այդպես, թանկարժեք զարդեր են նույնիսկ վարձույթով վերցնում մեկ ժամվա կամ մեկ օրվա համար: «Դիմավորում են հագուստով, ճանապարհում՝ խելքով» հայտնի ասացվածքն այլեւս չի գործում: Ե՛վ դիմավորում, ե՛ւ ճանապարհում են ցիլինդրին մեր օրերում փոխարինող, օրինակ, թանկարժեք ժամացույցով կամ «Մայ Բախով»:

— Այսօր լավ հումորի պակաս կա, բայց եւ դժվար է մարդկանց ուրախացնել: Ըստ Ձեզ, հաջողվե՞ց դա անել այս ներկայացման միջոցով:

— Ներկայացման ընթացքում հանդիսատեսի արձագանքը ոգեւորիչ էր: Հանդիսատեսի ծիծաղն ու շունչը վկայում էին, որ գործն ընդունվեց, առաջին հերթին այն, ինչ ուզում էր ասել ռեժիսորը եւ մենք, կարծում եմ՝ հասկացվեց, ինչի համար ուրախ ենք:

ՀՐԱՆՏ ՍԱՐԱՖՅԱՆ

Այս թեմայով Մի կողմ դնենք տարաձայնությունները, համահայկական այս շարժումը պետք է ձեւավորի մեր ապագան. Վարդանյան Ես երկրի ղեկավար եմ տեսնում Բագրատ սրբազանին. Արթուր Ղազարյան Ինչպես հայտնվեց «Հայրիկը սարդոստայնում». առաջնախաղ` ռուսական թատրոնի բեմում «ԴԴՏ» խմբի մեծ համերգը՝ Երեւանում Թեպետ հորդառատ անձրեւ է գալիս, բայց Բագրատ սրբազանի առաջնորդած երթը շարունակում է քայլել դեպի Երեւան