Ինչ եղավ «Հայաքվեն»
ՆերքաղաքականՊարզվում է` «Հայաքվե» նախաձեռնող խումբը պատասխան է ստացել ՀՀ կենտրոնական ընտրական հանձնաժողովից` 50 հազար ստորագրություն հավաքելու եւ Ազգային ժողով օրենսդրական նախաձեռնություն ներկայացնելու դիմումի վերաբերյալ: Ստորագրահավաքի համար սահմանվել է 60 օրյա ժամկետ` հունիսի 21-ից օգոստոսի 19-ը:
Հիշեցնենք, որ նախաձեռնող խումբը հանդես է գալիս օրենսդրական առաջարկով` Լեռնային Ղարաբաղի ինքնորոշումից հրաժարվելու եւ Հայոց ցեղասպանության նշանակությունը նսեմացնելու համար խիստ պատիժ նախատեսելու համար: Իսկ ստորագրահավաքը կարող է սկսվել երեք օրից: Այս մասին տեղեկացանք «Հայաքվե» նախաձեռնող խմբի ներկայացուցիչ ԱՐԱՄ ՊԵՏՐՈՍՅԱՆԻՑ:
— Մենք կդիմենք համայնքների ղեկավարներին, որոնք եռօրյա ժամկետում պետք է տարածքներ տրամադրեն ստորագրահավաքի անցկացման համար: Հուսով եմ` շենքերի բարձր հարկերում, տանիքներին եւ այլ տեղերում ստորագրահավաքի համար տարածք տրամադրելու փորձ չի արվի, քանի որ դա կդիտվի որպես խոչընդոտ: Այս պահին կոնկրետ ժամկետ նշել հնարավոր չէ: Նախապես ծրագրված է, որ Երեւանի ողջ տարածքում պարտադիր կլինեն նախաձեռնության մշտական ներկայացուցիչներ, մշտական ներկայացուցիչներ կլինեն նաեւ Գյումրիում, Վանաձորում եւ Կապանում: