Հունիսի 9-ը անվանի ծանրամարտիկ Տիգրան Մարտիրոսյանի ծննդյան օրն է
ՍպորտՀունիսի 9-ին ծննդյան 35-րդ տարեդարձն է նշում նորանկախ Հայաստանի անվանի ծանրամարտիկ, Հայաստանի սպորտի վաստակավոր վարպետ, Հայաստանի բազմակի չեմպիոն, Եվրոպայի եռակի, Աշխարհի երիտասարդական և մեծահասակների առաջնությունների չեմպիոն, Օլիմպիական խաղերի բրոնզե մեդալակիր ծնունդով գյումրեցի ՏԻԳՐԱՆ ԳԵՎՈՐԳԻ ՄԱՐՏԻՐՈՍՅԱՆԸ։
Նա 2010-ի սեպտեմբերին Թուրքիայի Անթալիա քաղաքում հռչակվեց Աշխարհի չեմպիոն։ Այնուհետև, Գոյանգում կայացած ԱԱ֊ում նա արծաթե մեդալ էր նվաճել, իսկ Թուրքիայում Գյումրեցի ծանրորդն անգերազանցելի էր։ Տիգրանը անգերազանցելի էր մինչև 77 կգ քաշային կարգում։ Ելույթը սկսվեց շատ վստահ, պոկումում հաջող օգտագործեց բոլոր 3 մոտեցումներն ու 173 կգ֊ով ապահովեց փոքր ոսկե մեդալ։Տիգրանի հայրը Գևորգ Մարտիրոսյանը ևս ծանրամարտիկ է եղել, ծագումով Կարսից էր, մայրը Սեդա Յախանեջյանը Սեբաստիայից։ Մեծ եղբայրը Հայկը ևս պրոֆեսիոնալ ծանրապարտով է զբաղվել։ Iravunk.com-ի մարզական թղթակցին հաջողվեց հանդիպել ու զրուցել օրվա հոբելյարի հետ։
- Շնորհավորում ենք, Տիգրան, ծննդյան տարեդարձի առթիվ, ամենալավն ու բարին մաղթում...
֊ Շնորհակալ եմ։ Ցանկանում եմ, որ խաղաղություն լինի մեր երկրում։ Ծննդյանս օրերը անցկացնում եմ հարազատներիս, ընկերներիս հետ միասին։
- Ի՞նչ հիշողություններ ունես, երբ Աշխարհի չեմպիոն էիր դարձել ու վերադարձել հայրենիք։
- Աշխարհի չեմպիոնի տիտղոսը նվաճելուց հետո, երբ ժամանեցինք Երևան, օդանավակայանում հազարավոր մարդիկ էին մեզ դիմավորում, շատ մեծ անակնկալ էր ինձ համար, կարծես, ողջ ազգը տոնում էր իմ հաղթանակը։ Գյումրիում էլ բազմաթիվ մարդիկ էին եկել դիմավորելու։ Իսկ տանը ընկերների ու հարազատների հետ ենք նշել հաջողությունս։
- Ապրիլին Երևանում կայացավ Ծանրամարտի Եվրոպայի առաջնությունը, որի ժամանակ աննախադեպ նվաճումներ ունեցանք։ Ի՞նչ կասես այս մասին:
- Շատ ուրախ եմ, որ նման հիանալի երիտասարդ ծանրորդներ ունենք, որոնք մեր արժանի փոխարինողներն են, սերնդափոխություն է լինում ու մեր փոխարեն արդեն նոր անուններ են ի հայտ գալիս։ Շատ լավ մարզիկներ ունենք, ես մրցաշարին ներկա էի, միշտ ոգևորում էի, փոխանցում իմ ունեցած փորձը, մարզական հմտությունները։ Ուրախ եմ, որ մեր երկրում վերանորոգվում են մարզադպրոցները, մարզագույքով ապահովվում, որպեսզի պարապմունքները կարողանան լիարժեք իրականացնել։
Պատրաստեց ՀՈՎՀԱՆՆԵՍ ՍԱՐԳՍՅԱՆԸ