MMA-ում նոր հայ աստղեր հաստատ դեռ բացահայտվելու են. Գոռ Ազիզյան
ՍպորտՏեղի ունեցավ երեւանյան այս տարվա սպորտային ամենաթեժ իրադարձությունը: Խառը մենամարտերի (MMA) սերիայի 61-րդ մրցաշարը կայացավ հենց մեր երկրում, որին մասնակցում էին մի շարք երկրներից ժամանած մարզիկներ: Այս մասին «Իրավունքը» զրուցել է Gor MMA-յի գլխավոր մարզիչ ԳՈՌ ԱԶԻԶՅԱՆԻ հետ, ում ջանքերով այսպիսի մասշտաբների մրցաշարը հնարավոր դարձավ իրականացնել Երեւանում: Ի դեպ, Գոռ Ազիզյանը հանդիսանում է նաեւ այնպիսի մարզիկների մենեջեր, ինչպիսիք են՝ Ռաֆայել Աբրահամյանը, Գեղամ Վարդանյանը, Բոգդան Գուսկովը եւ այլք:
«ՀԱՋՈՂՎԵՑ ՄԵՐ ՀԱՅՐԵՆԱԿԻՑՆԵՐԻ ՀԱՄԱՐ ՍՊՈՐՏԱՅԻՆ ՏՈՆ ԿԱԶՄԱԿԵՐՊԵԼ»
- Ինչպե՞ս հաջողվեց MMA-յում այսպիսի կարեւոր եւ մասշտաբային մրցաշարի անցկացումը իրականացնել Երեւանում:
- Շատ վաղուց էինք պլանավորում Հայաստանում անկացնել մեծ մրցաշար, բայց սկզբից կորոնավիրուսի պատճառով չէինք կարողանում, հետո՝ պատերազմական իրավիճակի: Հիմա վերջապես հաջողվեց մեր հայրենակիցների համար սպորտային այսպիսի տոն կազմակերպել:
- Քանի՞ երկրից մասնակցեցին մարզիկներ եւ քանի մենամարտ տեղի ունեցավ:
- Շուրջ 11 մենամարտ տեղի ունեցավ: Ցավոք, մրցաշարի մասնակիցների աշխարհագրության հետ խնդիրներ ունեցանք, որովհետեւ ուկրաինական պատերազմական իրավիճակով պայմանավորված՝ Ուկրաինայից, Բելառուսից, Ռուսաստանի շատ շրջաններից բավականին մարզիկներ չկարողացան գալ: Ամեն դեպքում, մրցաշարին ունեցանք մասնակիցներ ՌԴ-ից, Իրանից, Եգիպտոսից, Վրաստանից, Ուզբեկստանից, Ղրղզստանից, Ղազախստանից: Անգամ ունեինք մասնակից մարզիկ, ով Եվրոպայում է բնակվում:
- Մրցաշարի ո՞ր մարտը կառանձնացնեք մյուսներից:
- Իհարկե, երեկոյի գլխավոր մարտը Ռաֆայել Աբրահամյանի մասնակցությամբ էր: Նա կռվեց ազգությամբ թուրք Ղազախստանի քաղաքացի էլդար Կախորմանովի հետ եւ խեղդում հնարքով հաղթեց մրցակցին: Իմ աշակերտներից Բոգդան Գուսկովը մարտն ավարտեց նոկաուտի ենթարկելով մրցակցին: Նա ազգությամբ ռուս է, որը ներկայացնում է Ուզբեկստանը, որտեղ ունի երկրպագուների մեծ բանակ: Նա իր քաշային կարգում ռուս լավագույն 5 մարզիկների շարքում է: Մեր ակումբն էր ներկայացնում նաեւ Գեղամ Վարդանյան, որը նույնպես լավագույնս ներկայացավ:
ԿԲԱՑՎԻ «GOR MMA BY ՌԱՖԱՅԵԼ ԱԲՐԱՀԱՄՅԱՆ» ՍՊՐՈՏԴՊՐՈՑԸ
- Իսկ մրցաշարն անցկացնելու հետ կապված կազմակերպչական առումով ի՞նչ խնդիրների եք բախվել:
- Գիտեք, չէի ասի, թե հեշտ էր: Երեւի, դժվարություները հիմնականում պայմանավորված էին նրանով, որ առաջին անգամ էր այսպիսի մրցաշար անցկացվում: Հուսով եմ՝ երկրորդ, երրորդ անգամ այդպիսի դժվարություններ չեն լինի:
- Փաստորեն, նախատեսում եք, որ հետագայում ե՞ւս այսպիսի մասշտաբային մրցաշարեր տեղի ունենան Երեւանում:
- Պլանավորում ենք տարին չորս մրցաշար կազմակերպել Հայաստանում, ավելի ճիշտ՝ դեռ չորս:
- Կմանրամասնե՞ք, թե ինչ գործունեություն եք ծավալում MMA-յի աշխարհում:
- Հիմա զբաղվում եմ մարզչական եւ մենեջմենթի հարցերով: Ունենք շատ մեծ դպրոց Մոսկվայում, որն ունի արդեն երկու մասնաճյուղ՝ Gor MMA եւ American Top Team, որի ներկայացուցիչն եմ նաեւ: Պլանավորում ենք բացել մասնաճյուղ Հայաստանում եւս, որի ղեկավարը պետք է լինի Ռաֆայել Աբրահամյանը: Դպրոցը կգործի Gor MMA բրենդի ներքո՝ լինելով by Ռաֆայել Աբրահամյան: Բաից այդ պլանավորում ենք բացել մասնաճյուղ Դաղստանում: Այսօր ունենք 100-ից ավել պրոֆեսիոնալ մարզիկներ, որոնք մասնակցում են ամենատարբեր մրցաշարերի: 700-ի մոտ էլ սիրողական մակարդակի մարզիկներ ունենք: Մեր դպրոցներում գործում են մենամարտային բոլոր ձեւերը՝ բոքս, ըմբշամարտ, թայքվանդո, քիքբոքսինգ, թայսկի բոքս, կարատե, բայց հիմնականում հեդլայները MMA-ն է, որովհետեւ մենք դրանով ենք փող աշխատում:
«ՀԱՅԱՍՏԱՆՈՒՄ ԼԱՎ ՀԱՅ ՄԱՐԶԻԿԵՐ ՀԱՅՏՆՎԵԼԸ ԴԵՌ ԱՌՋԵՎՈՒՄ Է»
- Որքանով է MMA-ը Հայաստանում զարգացած: Վառ ներկայացուցիչներ ունե՞նք այս սպորտաձեւում:
- Կարող եմ ասել, որ Հայաստանում MMA-ը զարգացած չէ: Ունենք շատ լավ հայ մարզիկներ, բայց նրանք ծնվել են եւ կայացել ոչ Հայաստանում: Ինձ թվում է՝ Հայաստանում լավ հայ մարզիկեր հայտնվելը դեռ առջեւում է: Այնպես որ, MMA-ում նոր հայ աստղեր հաստատ բացահայտվելու են:
- Այս առումով փորձե՞լ եք համագործակցել ՀՀ ԿԳՄՍ նախարարության հետ:
- Դեռ՝ ոչ, բայց ինձ թվում է՝ կհամագործակցենք: Տեղյակ չեմ, թե ինչքանով է Հայաստանում MMA սպորտը կցված նախարարությանը, բայց Ռուսաստանում այն պաշտոնապես համարվում է սպորտ, եւ պետությունը շատ աջակցում է մանավանդ այն ակումբներին ու մարզիկներին, ովքեր ունեն արդյունքներ:
- Աշխարհում շատ մեծ է երկրպագուների բանակը MMA-ի նկատմամբ, իսկ Հայաստանում ինչպիսի՞ն է պատկերը:
- Երկրպագուների մասով՝ այո, մեծ է, բայց մեր երկրպագուները դեռ չեն հասկանում MMA-ից, որովհետեւ երկար ժամանակ չի անցել, որպեսզի ինչպես ֆուտբոլային խաղացողներին, անգիր իմանան ով ով է: Շատերը գիտեն միայն, երեւի, Քոնոր ՄաքԳրեգորին կամ Խաբիբ Նուրմագոմեդովին՝ այն էլ էլի մինչեւ վերջ չգիտեն նրանց մասին: Բայց ինձ թվում է՝ տեսարանը 5-6 տարի հետո կփոխվի:
- Հայաստանում անցկացված մրցաշարից հետո՝ Դուք պատրաստվում էիք մեկնել Եկատերինբուրգ Ձեր աշակերտներից մեկի մենամենարտին ներկա գտնվելու: Ի՞նչ նորություններ կան:
- Իմ աշակերտը Շառաբուտդին Մահոմեդովը դեկտեմբերի 3-ին մասնակցեց մենամարտի՝ Մխայել Ռագոզինի դեմ եւ հաղթեց: Այն համարվում է Ռուսաստանում 84 կգ քաշային կարգում ամենահետաքրքիր եւ ամենաթանկ կռիվը:
ՀՐԱՆՏ ՍԱՐԱՖՅԱՆ
Հ.Գ.- Նշենք, որ մրցաշարի լրատվության եւ հանրային կապերի համակարգողը Դավիթ Ղարիբյանն է։