Իմ խոսքն ասելու եմ մենամարտում, իսկ մրցակիցս լռելու է. Ռաֆայել Աբրահամյանը թեժ երեկո է խոստանում

Երեւանում սպասվում են թեժ մենամարտեր: Այսօր տեղի կունենա խառը մենամարտերի (MMA) սերիայի 61-րդ մրցաշարը, որին մասնակցում են մարզիկներ աշխարհի բազմաթիվ երկրներից: Իսկ երեկոյի գլխավոր իրադարձությունն է ռուսաստանաբնակ հայ մարզիկ ՌԱՖԱՅԵԼ ԱԲՐԱՀԱՄՅԱՆԻ մենամարտը՝ Ղազախստանը ներկայացնող ազգությամբ թուրք մարզիկ Էլդար Կախորմանովի հետ:

Մենամարտից առաջ Ռաֆայել Աբրահամյան - Էլդար Կախորմանով հայացքների մենամարտն անցավ ոչ պակաս գերլարված: Հիստերիկ ջղաձգումների մեջ էր Էլդար Կախորմանովը. ամեն կերպ փորձեց սադրել Ռաֆայել Աբրահամյանին, վերջում էլ արդեն Ալլահին էր օգնության կանչում:

«Աստված մեր հետ է», - հյուրընկալողի մեծահոգությամբ՝ ի պատասխան մրցակցի ասաց Ռաֆայել Աբրահամյանը, այնուհետեւ կատակեց՝ նշելով, թե հայացքների փոխանակմանը եկել էր տոնական հագուստով, ոչ թե մարզական, որովհետեւ կարծում էր, թե Էլդարն ընդհանրապես չի գա Երեւան:

Հայացքների մենամարտից հետո՝ «Իրավունքը» բացառիկ զրույց է ունեցել Ռաֆայել Աբրահամյանի հետ, ով, ի դեպ, առաջին անգամ է հանդես գալու MMA սերիայում:

- Ռաֆայել, ի՞նչ մարզավիճակում եք եւ հոգեբանորեն ինչպե՞ս եք տրամադրված մենամարտին:

- Շատ ուժեղ եմ: Իմ անձնակազմը՝ Գոռ Ազիզյանից սկսած, շատ պրոֆեսիոնալ ենք նախապատրաստվել այս մենամարտին: Կիսաթեթեւ քաշային կարգում (66 կգ)  վերականգնվել եմ եւ 100 տոկոսով վստահ եմ, որ գտնվում եմ լավագույն  մարզավիճակում:

- Լինել 76 կգ, բայց հասնել 66 կգ քաշային կարգի: Հեշտությա՞մբ հաջողվեց:

- Դաժան էր: Քաշ գցելն ինձ համար ավելի դժվար է, քան մենամարտելը: Ավելի լավ է դուրս գաս մենամարտի, քան քաշ գցես:

- Ձեր մրցակիցն ազգությամբ թուրք է: Սա հավելյալ պատճա՞ռ է լինելու մենամարտում հաղթանակը չզիջելու:

- Իհարկե: Ես առաջին անգամ եմ Հայաստանում գլխավոր մենամարտում: Եվ այն, որ մրցակիցս թուրք է, հավելյալ եւ շատ մեծ պատասխանատվության բեռ է ինձ վրա: Բայց հոգեբանորեն արդեն պատրաստ եմ այդ ամենին:

- Ձեր մրցակից Էլդար Կախորմանովը հայացքների փոխանակման ժամանակ բավական ագրեսիվ էր տրամադրված: Որեւէ ասելիք ունե՞ք նրան՝ մենամարտից առաջ:

- Նա խոսում է իմ հետ մինչեւ մենամարտը, բայց ես լուռ եմ մնում, իսկ մենամարտի ժամանակ արդեն ես եմ խոսելու ու վստահ եմ, որ ինքն է այդ ժամանակ լուռ  մնալու: Այնպես որ, մինչեւ մենամարտը թող զվարճացնի, իսկ օկտագոնում ես եմ զվարճանալու:

- Ասացիք, որ առաջին անգամ եք Հայաստանում մենամարտում: Ի՞նչ եք կարծում՝ ի տարբերություն այլ երկրներում Ձեր մենամարտերի՝ հայրենի հողը հավելյալ ինքնավստություն կտա՞:

- Իմ հողն ու ջուրն է, բոլորն այստեղ ինձ գիտեն: Անգամ, երբ խանութ եմ մտնում ինչ-որ բան գնելու, շատերն ինձ ճանաչում են, նույնիսկ զեղչեր ու նվերներ են անում: Սա եսիմ ինչ չէ, բայց շատ հաճելի է: Երբ փողոցում տեսնում են, մոտենում են ու հաջողություն մաղթում: Այս ամենը, բնականաբար, ինձ ոգեւորում է ու ավելի ուժ է տալիս: Դրա համար, իհարկե, Հայաստանում մենամարտելը տարբերվում է: Ես երազել եմ Հայաստանում մենամարտել, եւ այսօր երազանքս կկատարվի:

- Հայկական դրոշի ներքո՞ եք միշտ մենամարտել:

- Միշտ բարձրացրել եմ երկու դրոշ՝ Ռուսաստանի եւ Հայաստանի, բայց այս մենամարտին բարձրացնելու եմ միայն հայկական դրոշը:

- Աշխարհում MMA մարտարվեստի նկատմամբ ուշադրությունը շատ մեծ է: Ըստ Ձեզ, Հայաստանը զիջո՞ւմ է:

- Հայ մարզիկները միշտ եղել են առաջատար եւ լինելու ենք մշտապես առաջատար, որովհետեւ ունենք լավ պրոֆեսիոնալներ: Բայց ես շատ կուզենայի, որ պետությունն էլ ուշադրություն դարձներ մեր մարզաձեւին ու ինչ-որ չափով աջակցեր, որպեսզի մարզիկների սերունդ կարողանար զարգանալ եւ ավելի լավ արդյունքներ հետագայում ունենայինք:

- Անդրադառնանք նաեւ Ձեր ձեռքբերումներին: Ո՞ր հաղթանակները կառանձնացնեք Ձեր մենամարտերից:

- Ես BMF OPFS-ի չեմպիոնական գոտի ունեմ: Հաղթել եմ ուկրաինացի Ստեփան  Լիտվինենկոյին, որը շատ ուժեղ մրցակից էր, հաղթել եմ նաեւ ֆրանսիացի Պատրիք Մբոնդային, Սիլվեստոր Դուկլա, թուրք Բաթուհան Աքդումանին: Sherdog համաշխարհային խոշոր տեղեկատվական պորտալտ, որը նվիրված խառը մարտարվեստներին, կարող է իմ մենամարտերի մասին մանրամասներ պատմել, թե ում հետ եւ ինչպես եմ կռվել: Իսկ իմ ամբողջական գործունեությանը ծանոթանալու համար կարող եք հետեւել իմ ինստագրամյան էջին:

Հիշեցնենք, որ երեք տարի առաջ Սամարա քաղաքում կայացած Ռաֆայել Աբրահամյանի  մրցապայքարը ազգությամբ թուրք Բաթուհան Աքդումանի հետ նույնքան ինտրիգային է եղել:  Թուրք մարզիկը մենամարտից առաջ հայտարարել էր, թե` «գնում եմ Ռուսաստան հայի գլխի հետեւից», ինչին բավական կոշտ արձագանքել էր Ռաֆայել Աբրահամյանը: Իսկ արդեն մենամարտի ժամանակ հայ մարզիկը կարողացել էր առավելության հասնել թուրք մրցակցի նկատմամբ: Նա խեղդում հնարքով տապալել էր Աքդումանին՝ բաց չթողնելով նրան այնքան ժամանակ, մինչեւ մրցավարը դադարեցրել էր մենամարտը: Թուրք մարզիկը նույնիսկ մի պահ ուշագնաց էր եղել: Իսկ մեզ մնում է Բաթուհան Աքսումանի տարոսը մաղթել Էլդար Կախորմանովին:

ՀՐԱՆՏ ՍԱՐԱՖՅԱՆ

Հ.Գ.- Նշենք, որ մրցաշարի լրատվության եւ հանրային կապերի համակարգողը Դավիթ Ղարիբյանն է։

Այս թեմայով Արցախի տարբեր կուսակցությունների երիտթեւերի եւ ՀԿ-ների ղեկավարները վերլուծական կենտրոն են ստեղծել Երեւանում Ինչպես է անցել Ջերմուկի 30-ամյա քաղաքապետի հարսանիքը Իշխանությունը փորձում է հասնել 8 գյուղերի հանձմանը. Տիգրան Աբրահամյան Այս անգամ արդեն հայերին կանգնեցնելը շատ դժվար է լինելու…ժամանակը կգա եւ կտեսնեք. Աբրահամյան Չպետք է բացառել, որ հնարավոր մասշտաբային գործողությունների համար նոր դաշտ կձեւավորվի. Աբրահամյան