Պաշտոնական քարտեզագծում Հայաստանի եւ Ադրբեջանի միջեւ գոյություն չի ունեցել. ՔԱՐՏԵԶԱԳԵՏԻ ԲԱՑԱՀԱՅՏՈՒՄԸ
Հանդիպում«Պաշտոնական քարտեզագծում Հայաստանի եւ Ադրբեջանի միջեւ գոյություն չի ունեցել: Խորհրդային Միության կենտրոնական կառավարության կարգադրությամբ սահմանագծում է եղել»,-«Իրավունք TV»-ի եթերում ասել է հայտնի քարտեզագետ ՌՈՒԲԵՆ ԳԱԼՉՅԱՆԸ, ընդգծելով.
-Ալ լճերը հանձնել էին Ադրբեջանին, մինչդեռ տեղի ժողովուրդը չգիտեր, որ նման բան է տեղի ունեցել: Երբ իմացան, բողոքեցին, բայց Թիֆլիսից, Կովկասյան դաշնությունից նամակ եկավ, որ սահմանն արդեն գծել ենք:
Մարդիկ ասում էին` մեր գյուղի տարածքը, մեր արոտավայրերը, դաշտերը տվել եք Ադրբեջանին, մենք ինչո՞վ պետք է ապրենք, խնդրում ենք վերանայել, բայց պատասխանել էին, որ սահմանն արդեն գծված է եւ վերջ: Այդ եղանակով Ադրբեջանին տարածքներ են տրվել: Իհարկե Ադրբեջանը կընդունի 1980-ականների քարտեզներով գծված սահմանը:
Մի բան էլ կա, երբ 1920 թվականին Հայաստանի անկախ Հանրապետությունը իր հսկողության տակ եղած տարածքները տվեց Խորհրդային Ռուսաստանին, որը հետո էլ դարձավ Խորհրդային Հայաստան, մենք ունեինք շուրջ 43 հազար քառակուսի կիլոմետր տարածք:
Նախիջեւանը մերն էր, Քաշաթաղի ու Քարվաճառի մեծ մասը մեր հսկողության տակ էր: Իսկ հետո` 1921 թվականին, այդ բոլորը փոխանցվեցին Ադրբեջանին: Նույնիսկ նրանց փոխանցվելուց հետո այն տարածքները, որոնք հետո Ադրբեջանը գրավել էր, դրանք 1926 թվականի քարտեզում Հայաստանի տարածքում էին: