2018-Ի «ԲՈՒՄԵՐԱՆԳԻ» ՎԵՐԱԴԱՐՁԸ
Վերլուծություն2018-Ի «ԲՈՒՄԵՐԱՆԳԻ» ՎԵՐԱԴԱՐՁԸ
Ապրիլի 23-ը կարծես խորհրդանշական օր լինի: 4 տարի առաջ Հանրապետության հրապարակում «Մերժիր Սերժին» անունով վակխանալիա էր, իսկ այս տարի այդ օրը հրապարակը լեցուն էր ջահերթի մասնակիցներով, ովքեր «Զարթնիր լաո» կարգախոսի ներքո մերժում էին թրքահպատակ կապիտուլյանտներին: Եվ մի քանի տասնյակ հազարավոր ջահակիրների հանգամանքը խիստ «մանթրաժի» է ենթարկել ՔՊ-ի քարոզչամեքենային, ու քարոզչամիջոցներն իրենց պատռում էին, որպեսզի քիչ ներկայացնեն երթի մասնակիցների քանակը: Սակայն ինչպե՞ս, եթե նախ լիքը հայորդիներ հենց մասնակից էին, եւ երկրորդը` տեսանյութերն ու լուսանկարներն ակնթարթորեն հերքում են նիկոլաստերը:
ՔԱՂԱՔԱՑԻԱԿԱՆ ԱՆՀՆԱԶԱՆԴՈՒԹՅՈՒՆԸ ՈՐՊԵՍ ՈՒՂԻՂ ՃԱՆԱՊԱՐՀ
Եվ խորհրդանշական է, որ մարզերից դեպի Երեւան առաջին քայլերթը հենց Իջեւանից մեկնարկեց: Որ առաջինը Նիկոլի երկրացիներն են շտապում մայրաքաղաք` Նիկոլին մերժելու:
Եվ մայրաքաղաքում սկսվեցին ապակենտրոն անհնազանդության ակցիաները, որոնք 2018-ին ցույց տվեցին իրենց արդյունավետությունը, իսկ հիմա բումերանգի պես վերադարձան: Առավոտից 15 բուհերի ուսանողներ Երեւանում արեցին «Զարթնիր, ուսանող» ակցիաներ: Իսկ Արաբկիր վարչական շրջանում դաշնակցական երիտասարդները փողոց էին փակել` վանկարկելով «առանց Նիկոլ Հայաստան», «առանց թուրքի Հայաստան», «Միացում, պայքար, հաղթանակ»: Նրանցից մի քանիսը բարձրացել էին ուղեւորատար ավտոբուսի վրա` պարզել Արցախի դրոշն ու «Սկսել ա» գրությամբ պաստառը: «Թույլ չենք տալու Հայաստանի թրքացում: Սկսել է արժանապատվության պայքար»,- նշում էին նրանք: Մի քանի երիտասարդներ բարձրացել էին ավտոբուսի վրա եւ պարզել «Սկսելա» պաստառը: «Հայաստանում սկսվել է արժանպատվության եւ ազգային ինքնասիրության համար պայքարը: Նիկոլ Փաշինյանին եւ իր վարչակարգին հեռացնելու ենք Հայաստանում ղեկավարելու իրավունքից: Նիկոլ Փաշինյանը չի կարող որոշել հայ ժողովրդի տեղը, Արցախի հարցը, ոչ ոք իրեն մանդատ չի տվել, որ Արցախը հանձնի Ադրբեջանին»,- ուղիղ եթերում հայտարարեց երիտասարդներից Գոռ Սարգսյանը:
Հետո եղան ոստկանական բռնության զազրելի տեսարաններ, սակայն երեկոյան Արաբկիրից մեկնարկեց բազմամարդ երթը: Իսկ մինչ այդ երթը հանդուգն ակցիաներ արեցին ՀՀԿ-ի երիտասարդները` բողոքի ակցիա իրականացնելով «նիկոլաորջի»` ՔՊ գրասենյակի մոտ: Իսկ այնուհետ Հայաստանի ֆուտբոլի առաջնության «Փյունիկ»-«Նորավանք» խաղի ընթացքում Հանրապետականի մի խումբ երիտասարդներ եւ ԱԺ նախկին պատգամավոր Նաիրա Զոհրաբյանը մարզադաշտ մտան` վանկարկելով հականիկոլական կարգախոսներ:
Երիտասարդ հանրապետականներից մեկը Արցախի դրոշով ներխուժեց խաղադաշտ, եւ խաղը մի քանի րոպեով ընդհատվեց: «Առանց Նիկոլ Հայաստան» վանկարկումներին միացան նաեւ խաղի բազմաթիվ հանդիսատեսներ:
Ի՞նչ հակադրեց այդ ամենին խունտան` իր սիրելի գործիքը` ոստիկանական բռնությունը: Ինչպես փաստում է պատգամավոր Տիգրան Աբրահամյանը. «Արդեն հստակ է, որ Փաշինյանը ոստիկանությանը, մասնավորապես, կարմիր բերետների տխրահռչակ կառույցին, հրահանգ է իջեցրել ամենակոշտ միջոցներով կանխել բողոքի ցանկացած ակցիա:
Այս պահին գտնվում եմ Կենտրոնի ոստիկանության բաժանմունքում, որտեղ ապօրինի բերման են ենթարկել 11 քաղաքացիների:
Բերման ենթարկելու, ուղեկցելու ոհմակային արշավն ուղեկցվել է վիրավորանքներով եւ հայհոյանքներով: Մի քանի քաղաքացու մարմնի տարբեր հատվածներում կան կապտուկներ:
Թուրք-ադրբեջանական օրակարգը սպասարկող բոլոր էլեմենտները` քաղաքական գործիչ լինի, կուսակցական ֆունկցիոներ, թե ոստիկան վաղ թե ուշ խիստ պատասխանատվության է ենթարկվելու»:
Սակայն քանի որ անհնազանդության ակցիաների մասնակիցների մեծ մասը երիտասարդությունն է, ոստիկանական բռնությունը, ինչպես վկայում է բազում երկրների փորձը, հակառակ արդյունքն է տալիս: Չե՞ք հավատում` ծերուկ Ջին Շարփին հարցրեք, ավելի ճիշտ` նրա գրքերը կարդացեք:
ՍԵՐԺԸ ՃԻՇՏ ԷՐ, ԴՈՒՔ ՍԽԱԼՎԵՑԻՔ
Սակայն մի պահ վերադառնանք ապրիլի 23, Հանրապետության հրապարակ: Այդտեղ էին եկել ՀՀ երկրորդ ու երրորդ նախագահները: Սերժ Սարգսյանն, ում ուղիղ 4 տարի առաջ մերժեցին, ՀՀԿ գրասենյակից թոռնիկի հետ եկավ առաջնորդեց հազարավոր ՀՀԿ-ականների եւ համակիրների, նրանց հետ բարձրացավ Ծիծեռնակաբերդի բարձունք:
Ահա մեջբերում հընթացս տված նրա հարցազրույցներից. «Իրականության մեջ ես չեմ փոշմանել, բայց եթե ես կարողանայի կանխատեսել այս ամբողջ արհավիրքը, միգուցե 2018-ի մարտ-ապրիլ ամիսներին այլ կերպ գործեի, բայց իրոք չեմ փոշմանել, որ մեր խաբված ժողովրդի դեմ ուժ չեմ կիրառել: Ուղղակի կցանկանայի, որպեսզի այսօր էլ 2018թ. պահանջատեր ժողովուրդը նույն պահանաջատիրությամբ հանդես գար: Այդ ժողովրդին խոստացել էին կարճ ժամանակում Հայաստանը դրախտ դարձնել, բա նույն պահանջատիրությամբ պետք է հանդես գար: Ցավոք սրտի, այն ժամանակվա ոգեւորությունը այսօր վերածվել է հիասթափության, բայց մեր թիմը, մեր համակիրները, ողջախոհ մարդիկ պահանջատեր լինելուց առաջ հայրենասերներ են եւ ցանկացած պարագայում մենք կանգնելու ենք մեր ժողովրդի, մեր պետականության կողքին»: Նա նաեւ փաստեց, որ 4 տարի առաջ ցնծացող ժողովուրդն այժմ ողբում է: Բայց երրորդ նախագահի ուղերձը պարզ էր` նույն պահանջատիրությամբ` ինչ 2018-ին:
Իսկ հիմնական ուղերձը Սերժ Սարգսյանը հրապարակեց ապրիլի 24-ին, որը բազմակողմանի է եւ տողատակեր ունի. «Այսօր` հայ ժողովրդի նկատմամբ իրականացված ցեղասպանության զոհերի հիշատակի օրը, ես վերահաստատում եմ նախկինում հնչեցրածս ուղերձը` պահանջատեր լինելուց առաջ ազգովի լինենք հայրենատեր:
Քանի դեռ Թուրքիայի Հանրապետությունը պետական ամենաբարձր մակարդակով որդեգրել է սեփական հանրությանն ու աշխարհին մոլորեցնելու քաղաքականություն եւ Հայոց ցեղասպանությունը ժխտելու հետ միասին անթաքույց խրախուսում է պանթյուրքիզմի գաղափարախոսությունը, ցեղասպանության կրկնման վտանգը միշտ լինելու է, եւ խաղաղասիրության ու բարիդրացիության մասին այդ երկրի իշխանությունների հայտարարությունները դիտարկվելու են ընդամենը որպես հարեւան ժողովրդի ու միջազգային հանրության զգոնությունը բթացնելու նոր հնարք: Դա թույլ չտալու համար պետք է գործել:
- Դիմում եմ սթափ դատող, պատմությունից դասեր քաղած, ազգային արժանապատվություն ունեցող, Հայրենիքի ազատությունն ու անկախությունը ամեն ինչից վեր դասող հայերին.
– Հնարավոր ու անհնարին բոլոր միջոցներով հակազդենք թույլ, վախկոտ, ամեն գնով խաղաղություն մուրացող, մորթապաշտ տեսակին, որ խորթ է մեր էությանն ու օտար` մեր ոգուն: Հանրայնորեն դատապարտենք ու չհանդուրժենք մեր կողքին հայրենավաճառ այդ տեսակը: Զգոն լինենք եւ միշտ պայքարի պատրաստ, երբ մեր թշնամին կփորձի կրկին իրագործել իր դարավոր երազանքը:
- Դիմում եմ իր առօրյա կենցաղային հոգսերի մեջ Հայրենիքը մոռացած, սեփական երկրի պաշտպանությունն իր գործը չհամարող կամ ամեն ինչից հիասթափված ու հուսահատված հայրենակիցներիս.
– Հանուն ձեր զավակների ապագայի, սեփական երկրում ազատ ու անկախ ապրելու նրանց իրավունքի, հանուն դրա հարյուրամյակներով կռիվ ու կյանք տված մեր նահատակների անմահ հիշատակի` դուրս եկեք թմբիրից, վանեք ձեզնից անտարբերությունն ու հուսահատությունը եւ կանգնեք ձեր պայքարող եղբայրների ու քույրերի կողքին: Նրանց պայքարը նաեւ ձեր ու ձեր զավակների վաղվա օրվա համար է»:
Եթե ամփոփենք, ապա կարող ենք վստահաբար պնդել` Սերժը ճիշտ էր, նրան մերժողները (համենայնդեպս` դրանց միամիտ եւ խաբված մասը, բայց ոչ տականքը) սխալվեցին: Իսկ ինչպես վարվել տականքի հետ` ՀՀ երրորդ նախագահի ուղերձում ասված է ամենայն հստակությամբ: Եվ բոլորս էլ լավ գիտենք` ումից է կազմված այդ հայրենավաճառ տեսակը:
ՀՈՎՀԱՆՆԵՍ ԳԱԼԱՋՅԱՆ