ԱՐՏԱՇԵՍ ԳԵՂԱՄՅԱՆ. «ԱՅԴ ՀԵՐՅՈՒՐԱՆՔՆԵՐԸ ՏԱՐԱԾՈՒՄ ԵՆ ՌՈԲԵՐՏ ՔՈՉԱՐՅԱՆԻ ՄԱՆԿԼԱՎԻԿՆԵՐԸ»

ԱՐՏԱՇԵՍ ԳԵՂԱՄՅԱՆ. «ԱՅԴ  ՀԵՐՅՈՒՐԱՆՔՆԵՐԸ ՏԱՐԱԾՈՒՄ ԵՆ  ՌՈԲԵՐՏ ՔՈՉԱՐՅԱՆԻ ՄԱՆԿԼԱՎԻԿՆԵՐԸ»

ՀՀԿ խմբակցության պատգամավոր, «Ազգային միաբանություն» կուսակցության ղեկավար Արտաշես Գեղամյանի` ԵԱՀԿ ԽՎ-ում Հելսինիկիի հռչակագրին  դեմ քվեարկելը շարունակում է բուռն քննարկվել լրատվամիջոցների կողմից: Խնդրի շուրջ «Իրավունքը» զրուցեց պատգամավորի հետ:

-Պրն Գեղամյան,  որոշ լրատվամիջոցներ   տեղեկություններ տարածեցին, որ Դուք Ադրբեջանի բանաձեւին կողմ եք քվեարկել: Ի?նչ կասեք:

- Այդ բանաձեւի մասին ելույթ եմ ունեցել, ընդ որում` Ադրբեջանցիների համար ծանր ու ջախջախիչ, իսկ եվրոպացիների համար ուշագրավ, քանի որ ասել եմ` Հելսինկյան հռչակագրի չորրորդ կետը Ադրբեջանը մտցրել է այն պատճառով, որ ամերիկյան եւ  կոալիցիոն մբակոծություններից հետո էթնիկ ադրբեջանցի իսլամիստ ահաբեկիչները փախեփախ գալիս են Ադրբեջան: Վերջինս էլ ցանկանում է այնպիսի տպավորություն ստեղծել, որ  խաթարված է տարածքային ամբողջականությունը եւ իսլամական պետության ահաբեկիչներին ուղղի դեպի Ադրբեջանի եւ ԼՂ-ի բաժանարար գիծը: Այս ելույթներից հետո երբ հարցը դրվեց քվեարկության: Սկզբում հաշվեցին, թե ով է կողմ քվեարկել բանաձեւին: Դեռ չէին հասցրել հաշվել կողմ եղողների թիվն ամոբղջությամբ, ես դեմ եմ քվեարկում: Քննարկումից  հետո Ադրբեջանի ներկայացուցչին ասացի, որ խարդախություն չանեն եւ իմ «դեմ»-ը կողմ չհաշվեն: Նա էլ ասաց` ով է հոգեկան հիվանդ, որ  մտածի, թե Արտաշես Գեղամյանը կողմ քվեարկի այսքան ելույթներից  հետո: Բայց քանի որ զգաց, որ իր հայտարարությանը թերահավատորեն եմ վերաբերվում, առաջարկեց գլխավոր քարտուղարի տեղակալին դիմեմ, ով արձանագրում է  քվեարկության արդյունքները: Վերջինս էլ  արձանագրության մեջ շտկեց եւ գրեց` Հայաստանը դեմ է, ապա  խորհուրդ տվեց պլենար  նիստին  ելույթ ունենալ: Բնականաբար,  այդպես էլ արեցի: Ադրբեջանցիները, սակայն, ավելի պարկեշտ գտնվեցին (սկզբում գրեցին, որ իբր ես կողմ եմ քվեարկել այդ բանաձեւին, ապա այդ հոդվածները հանեցին լրատվամիջոցներից), քան քան Հայաստանի երիտասարդ թոշակառուի կողմից ֆինանսավորվող էլեկտրոնային լրատվամիջոցները: Ես իմ ելույթներով ձախողեցի նրանց պլանները:Այդ ուժի կողմից ֆինանսավորվող թերթերն անընդհատ գրում էին, որ Հայաստանը շուտով դավաճանելու է ՌԴ-ին, բայց հանկարծ ճիշտ հակառակն է  լինում:  Իսկ երբ իրենց դիմակները պատռվեց, ապա պետք է  նման խեղաթյուրված տեղեկատվություն տարածեին:

- Ըստ Ձեզ` որո?նք են այն շրջանակները, որոնք նման  տեղեկատվություն  տարածեցին:

- Ռոբերտ Քոչարյանի մանկլավիկները: Բանն այն է, որ ՀԷՑ-ի աուդիտը պետք է արվեր սկզբից:Եթե սկզբից արվեր, կպարզվեր, որ ժամանակին Ռոբերտ Քոչարյանը, ով զբաղեցնում էր ՀՀ նախագահի աթոռը, ՀԷՑ-ը 45 մլն դոլարով վաճառեց «Midland Resources» ընկերությանը, որն օֆշորային գոտում գրանցված կազմակերպություն է: Մի լումա ներդրում չանելով` մեկ տարի հետո 87 մլն դոլարով  ՀԷՑ-ը վաճառել են «Ինտեր ՌԱՕ ԵԷՍ»-ին: Այսինքն` խոշոր չափերի հափշտակություն են արել: Իսկ եթե մի գործ սկսվում է հափշտակումից ու թալանից, ապա այդպես էլ շարունակվում է ( այս ամենի մասին ես ժամանակին խոսել եմ): Համոզված եմ` աուդիտը կգա կհասնի  ակունքներին: Հիմա բոլոր այն ուժերը, որոնց խոսքը կշիռ ունի ոչ միայն Հայաստանում, այլեւ ՌԴ-ում, նրանց շուրջը փորձում են այսպիսի ինտրիգներ  ստեղծել եւ ապուշ հերյուրանքներ տարածել:

Մանրամասները`«Իրավունք» թերթի 15.05.2015-ի  համարում:

ՍՈՆԱ ԴԱՎԹՅԱՆ