​​​​​​​Խիստ նկատողություն է հայտարարվել Տ. Տիրատուր քահանա Հակոբյանին

Գեղարքունյաց թեմի առաջնորդարանում օգոստոսի 22-ին` նախագահությամբ Առաջնորդական տեղապահ Տ. Պարթեւ վարդապետ Բարսեղյանի, տեղի ունեցավ քահանայից հերթական ժողովը։

Այն սկսվեց Տերունական աղոթքով, որից հետո կատարվեց Սուրբ Գրքի ընթերցում։ Ապա հոգեշնորհ հայր սուրբը ողջունեց քահանա հայրերին և ներկայացրեց ժողովի օրակարգը, որում ընդգրկված էին թեմի տնտեսական կացության, քահանաների սոցիալական վիճակի, մշտական հսկողություն չունեցող սրբավայրերի պահպանման և ծիսական այլ հարցեր:

Հայր սուրբը ներկայացրեց թեմի ներկայիս տնտեսական կացությունը` անդրադառնալով վերջին ամիսներին համաճարակի հետևանքների բացասական ազդեցությանը և դրա հետևանքները հաղթահարելուն ուղղված քայլերին: Նշվեց, որ Մայր Աթոռ Սուրբ էջմիածնի, Ֆրանսիայի հայոց թեմի ազնիվ հայորդիների, Գեղարքունյաց թեմի անհատ բարերարների և համայնքապետերի կողմից ցուցաբերված ֆինանսական օգնությունը կազմել է շուրջ 9,4 մլն. դրամ:

Անդրադառնալով թեմին կատարած նվիրատվություններին` հայր սուրբն իր գնահատանքն ու գոհունակությունը հայտնեց բոլոր նվիրատուներին: Վերջին նվիրատվությամբ ֆրանսահայ ազնիվ հայորդիների կողմից գումար է տրամադրվել ` ի նպաստ Գեղարքունյաց թեմի քահանաների:

Քահանայից դասի սոցիալական կացության առնչությամբ հայր սուրբը կարևորեց վերջիններիս ամենամսյա աշխատավարձի ապահովումը և բժշկական ապահովագրության անհրաժեշտությունը` նշելով որ այս ուղղությամբ քայլեր են ձեռնարկվում:

Հաջորդիվ քննության առնվեց թեմի այն սրբավայրերի և եկեղեցիների պահպանության հարցը, որոնք մշտական հսկողություն չունեն և վերջին շրջանին պարբերաբար ենթարկվում են ոտնձգությունների հակաեկեղեցական խմբերի կողմից: Քահանա հայրերը կարևորելով խնդիրը` անհրաժեշտ նկատեցին խստացնել հսկողությունը այդ սրբավայրերի հանդեպ` սույն հարցով ակնկալելով իրավապահ մարմինների աջակցությունը:

Ժողովի ավարտին առաջնորդական տեղապահ հայր սուրբը անդրադարձավ նաև կարգապահական հարցերին` կարևորելով հավատացելոց շրջանում հոգևորականի կեցվածքը, վարքը և պահվածքը: Խիստ նկատողություն հայտարարվեց Գեղարքունյաց թեմի Վանևանի հոգևոր հովիվ` Արժանապատիվ Տ. Տիրատուր քահանա Հակոբյանին:

Ժողովը փակվեց Տերունական աղոթքով: Այս մասին տեղեկանում ենք Հայ Առաքելական եկեղեցու Գեղարքունյաց թեմի պաշտոնական էջից:

Այս թեմայով Չի բացառվում հասարակական մեծ լարումներ եւ նույնիսկ քաղաքացիական պատերազմ. Մհեր Հակոբյան Ինչ արել ենք, արել ենք` բացառապես ելնելով մեր խղճից. Անի Սամսոնյան Իսկ մեզ դարձյալ շեղում են... Այժմ էլ ռետրո մեքենաներով. Ալլա Հակոբյան Տարածքների նվիրումն Ադրբեջանին հանցավոր գործողություն է, որը կբերի նաեւ էներգետիկ եւ լոգիստիկ վտանգների. Մանվելյան Լքված հայեր, միացե՜ք. Ալլա Հակոբյան