«15 ՀՈԳԱՆՈՑ ՋՈԿԱՏՈՎ, ՕՐԵՐ ՇԱՐՈՒՆԱԿ ՀԵՏ ԵՆ ՇՊՐՏԵԼ ԹՇՆԱՄՈՒ ԳՐՈՀԱՅԻՆՆԵՐԻՆ, ԶՈՀՎԵԼ Է ԱՐԿԻ ՀԱՐՎԱԾԻՑ».ԳՈՌ ՍԱՐԿԻՍՅԱՆ
Հասարակություն2020 թվականի սեպտեմբերի 27-ին սկսված Արցախյան 44-օրյա դաժան պատերազմի ժամանակ, ցավոք կորցրեցինք բազմաթիվ լուսավոր երիտասարդների, նրանցից մեկն էլ ԳՈՌ ՆՈՐԻԿԻ ՍԱՐԿԻՍՅԱՆՆ էր։ Մարտի 23-ը, նրա ծննդյան օրն է, կդառնար 22 - տարեկան։Անմահ հերոսի շիրիմին են այցելել հարազատներ, ընկերներ, ծաղիկներ խոնարհել ու խնկարկել ։Գոռի մանկության ընկերը, Iravunk. com -ի հետ բացառիկ զրույցում նշեց. «Գոռը 6 տարեկանից զբաղվել է սամբո և ձյուդո մարզաձևերով, նա երիտասարդական հավաքականի անդամ էր։ Սպորտի ասպարեզում, նրան շատ մեծ ապագա էր սպասվում։ Արմատներով Արցախից էր,բայց Երևանում էր բնակվում, ամեն անգամ Շուշի այցելելուց առաջ, միշտ ոգևորված պատմում էր, որ անպայման տեսնել է պետք, էսպես չենք պատկերացնի ։Նա շատ ընկերասեր էր, նվիրվող, շփվող ու անսահման բարի։ Ընկերների հաջողություններով ավելի շատ էր ուրախանում, քան սեփական։ Նույնիսկ դեպքեր էին լինում, որ ուրախությունից չէր կարողանում զսպել հուզմունքը։ Գոռը սովորել է Երևանի թիվ 119 ավագ դպրոցում, որից հետո ընդունվել էր Հայաստանի ֆիզիկական կուլտուրայի և սպորտի պետական ինստիտուտի կինեզոլոգիա բաժինը, ցավոք այդպես էլ չհասցրեց սովորել, չվայելեց ուսանող լինելու բերկրանքը, նա տարկետում էր վերցրել ու մեկնել բանակ։ Շանս ուներ չծառայելու, սակայն իր կամքով մեկնեց ծառայության։ Ընդամենը 2 ամսվա ծառայող էր, երբ սկսվեց դաժան պատերազմը։ Գոռը ծառայում էր ԼՂՀ Մարտակերտի շրջանում։ Պատերազմի առաջին օրերին բոլորիս ստել էր ասելով, որ իրենք շատ հեռու են, ոչ մի ձայն չեն լսում ու մասնակից չեն մարտական գործողություններին, բայց հետո միայն պարզ դարձավ, որ հենց առաջին օրերից կռվել է պատերազմի ամենաթեժ կետերում։ 15 հոգանոց ջոկատով, օրեր շարունակ հետ են շպրտել թշնամու մի քանի անգամ ավելի քանակով գրոհայինների։ Սակայն, հերթական մարտական առաջադրանքը կատարելուց հետո, երբ նորից հաղթանակ են տարել ու հավաքվել են գնալու հերթափոխության, հերոսաբար զոհվել է հոկտեմբերի 18-ին, արկի հարվածից, 15 հոգուց միայն 2֊ն են ողջ մնացել։ Արկի բեկորը հարվածել է Գոռի սրտին, նա հեռու է եղել խմբից, մի քանի քայլ մնացած տղաները անճանաչելի են դարձել։ Հետմահու արժանացել է «Մարտական ծառայության» մեդալի։ Երևանի թիվ 119 դպրոցում, որտեղ Գոռը սովորել է, կա նրա անվան դասարան, առաջիկայում կլինի նաև նրա անվամբ մարզադահլիճ։
ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ ԱՆՄԱՀ ՀԵՐՈՍ ։ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ...
Պատրաստեց ՀՈՎՀԱՆՆԵՍ ՍԱՐԳՍՅԱՆԸ