Հակառուսական տրամադրությունների դիտավորյալ գեներացումն ուղղակի սպառնալիք է մեր պետականությանը. Արման Ղուկասյան

Հայաստանում վերջին շաբաթների ընթացքում կրկին ակտիվ քննարկումներ են սկսվել Հայաստանի արտաքին քաղաքական վեկտորին վերաբերող հարցերի շուրջ։ Այս ամենը կապված է հայ-ադրբեջանական սահմանին վերջերս սրված իրավիճակի հետ։ Այս մասին լրագրողների հետ հանդիպմանն ասաց «Ժողովրդի ձայնը» փորձագիտանան ակումբի անդամ Արման Ղուկասյանը:

Նրա խոսքով, Հայաստանի լրատվական տարածքում սկսեցին տարածվել տարբեր տեղեկատվական հոսքեր, որոնք հաճախ ուղեկցվում էին մանիպուլյացիաներով։ Ամբողջ իմաստը կայանում էր նրանում, որ, իբր, Ռուսաստանը ոչ մի կերպ չարձագանքեց Հայաստանի և Ադրբեջանի միջև հակամարտության սրմանը։

«Նույնիսկ այն բանից հետո, երբ Հռոմի պապը հայտարարեց, որ հենց Ռուսաստանն է առանցքային դեր խաղացել Երևանի և Բաքվի միջև ռազմական գործողությունների կասեցման գործում, շատ չարակամներ շարունակեցին իրենց ապակառուցողական հռետորաբանությունը։ Ակնհայտ է, որ արտաքին արևմտյան ուժերը ակտիվորեն աջակցում են Հայաստանի ներսում այն ուժերին, որոնք դեմ են հայ-ռուսական հարաբերություններին և Հայաստանի մասնակցությանը ՀԱՊԿ-ին։ Նրանք խնդիր ունեն անընդհատ յուղ լցնել կրակի վրա»,- ասաց փորձագետը։

Ղուկասյանի կարծիքով, այդ ուժերի կողմից արհեստականորեն բանավեճ է ձևավորվում ՀԱՊԿ-ից Հայաստանի դուրս գալու վերաբերյալ, սակայն հասարակական մակարդակով նման քննարկումներ չկան։ Նաև մատնանշեց՝ վերջին շրջանում Հայաստանի Հանրային հեռուստատեսությունով հաճախ հանդես են գալիս արևմտամետ հասարակական-քաղաքական շրջանակների մոլի ներկայացուցիչներ։

«Ակտիվորեն տարածվում է միակողմանի տեղեկատվության փոխանցման մանիպուլյացիոն աշխատանք ոչ միայն արևմտամետ ալիքներով, այլև պաշտոնական իշխանամետ ռեսուրսների կողմից։ Այդպես, սեպտեմբերի 17-ին և 18-ին ԱՄՆ Ներկայացուցիչների պալատի խոսնակ Փելոսիի Հայաստան կատարած այցի կապակցությամբ անցկացվել են երախտագիտության տարբեր ակցիաներ այն քողի ներքո, թե, իբր, ամերիկացիները դադարեցրել են ռազմական գործողությունները, ինչպես նաև ՀԱՊԿ-ից դուրս գալուն միտված ակցիաներ: Դրանց մասնակցել են նաև «Տապան» նախագծի ներկայացուցիչները, որը ֆինանսավորվում է ռուս գործարար Միխայիլ Խոդորկովսկու կողմից։ Այս օրերին բազմիցս նման ակցիաներ են տեղի ունեցել, իսկ ԱԺԲ ներկայացուցիչները նախատեսում են մշտական ակցիաներ սկսել ՀԱՊԿ-ից դուրս գալու և Ռուսաստանի հետ դաշնակցային հարաբերություններից հրաժարվելու համար»,- ասաց բանախոսը։

Արման Ղուկասյանը նշեց, որ Հայաստանում արևմտամետ շատ ուժեր Փելոսիի այցը ներկայացրեցին այնպես, թե, իբր, ամերիկացիները շտապում են օգնության հասնել հայ ժողովրդին հենց Բաքվի հետ հարաբերությունների սրման պատճառով, սակայն իրականության հետ դա ոչ մի աղերս չունի: Եվ այս այցը, ընդգծեց, նախատեսված էր հակամարտության էսկալացիայից շատ առաջ։

«Ակնհայտ է, որ ամերիկացիներն ու նրանց աջակցության խումբն ամեն ինչ արել են ստեղծված իրավիճակից օգտվելու նպատակով հանրությանը մոլորության մեջ գցելու համար։ ԱՄՆ-ն միշտ խաղացել և խաղում է տարբեր երկրների միջև հակասությունների վրա և փորձում է իր համար դիվիդենտներ քաղել։ Դա բնորոշ է ամերիկյան քաղաքականությանը»,-շեշտեց նա։

Փորձագետի խոսքով, Արևմուտքի ակտիվությունն ակնհայտ է, իսկ դրա բացատրությունը շատ պարզ է՝ Ռուսաստանի հատուկ ռազմական գործողությունն Ուկրաինայում։ Հիմա Արևմուտքն այնպես է անում, որ Ռուսաստանի սահմանները մերկացնի և Մոսկվայի համար տարբեր նոր ճակատներ բացի։ Հաշվի առնելով, որ Հայաստանը Ռուսաստանի դաշնակիցն է Հարավային Կովկասում, իսկ տարածաշրջանը բավականին բարդ է, ապա այստեղ ԱՄՆ-ի հետաքրքրությունը Հայաստանի նկատմամբ զգալիորեն աճել է։ Սակայն հարկ է հիշել ու ընկալել, որ ԱՄՆ–ի նպատակը ոչ թե Հայաստանի բարեկեցությունն ու անվտանգությունն է, այլ տարածաշրջանից ռուսական շահերի դուրս մղումը։

«Փելոսին Երևանում հայտարարեց, որ եթե հայերը դժգոհ են ՀԱՊԿ-ից, ապա պետք է ընտրություն կատարեն, այսինքն՝ դուրս գան ՀԱՊԿ-ից, թե ոչ։ Հարցն ինքնին ոչ կոռեկտ է ամերիկյան բարձրաստիճան պաշտոնյայի կողմից։ Ամերիկացիները ցանկանում են Հարավային Կովկասը վերածել ռազմական թատրոնի, որտեղ բախվում են տարածաշրջանային խաղացողների շահերը, և հենց դրանով էլ ամերիկացիները կիրագործեն իրենց նպատակները, ինչպես նրանք են սիրում և փայլուն կարողանում են դա անել։ Շատ արևմտամետներ լռում են այն մասին, որ ԱՄՆ-ն Հարավային Կովկասի տարածաշրջանում արդեն ունի դաշնակից ի դեմս Թուրքիայի, որը ՆԱՏՕ-ի անդամ է։ Ինչպե՞ս է ԱՄՆ-ն զինելու Հայաստանին իր դաշնակցի դեմ, ինչպես է ԱՄՆ-ն տեղակայելու ՆԱՏՕ-ի բազաները Գյումրիում տեղակայված 102-րդ ռուսական ռազմաբազայի փոխարեն, որը պաշտպանում է Հայաստանը, եթե դա հնարավոր չէ ՆԱՏՕ-ի շրջանակներում: Հայաստանը չմտածված գործողությունների արդյունքում կարող է կրկին դեմ առ դեմ հայտնվել թուրքական սպառնալիքին։ Հենց այդ ելքին են տանում Հայաստանում որոշ հասարակական-քաղաքական ուժերի արևմտյան հովանավորները»,- վստահ է նա։

Մեզ ասում են, շարունակեց Ղուկասյանը, որ եթե ուզում եք, որ մենք ձեզ օգնենք, դուրս եկեք ՀԱՊԿ-ից, իսկ հետո հրաժարվեք Ռուսաստանի հետ դաշնակցային հարաբերություններից.

«Ես ուզում եմ հարցնել՝ ի՞նչ կլինի թուրքական գործոնի հետ, եթե Թուրքիան և Ադրբեջանը հենց հիմա տասնյակ հազարավոր զորքեր և շատ ռազմական տեխնիկա են կուտակում (խոսքը Նախիջևանի մասին է)։ Թուրքիան անմիջապես կօգտվի Ռուսաստանի հետ դաշնակցային հարաբերություններից հրաժարվելու Հայաստանի անհեռատես որոշումից։ Անկարան այսօր խոսում է Սյունիքի և, այսպես կոչված, Զանգեզուրի միջանցքի մասին, իսկ Ալիևը հայտարարում է, որ Երևանը, Վարդենիսը և Սևանը Ադրբեջանի բնօրրաններն են։ Փելոսին Երևանում մի շարք հայտարարություններ է արել, բայց, մեծ հաշվով, պետք է հասկանալ, որ հայտարարություններ կարող են անել բոլորը, իսկ իրական գործերը կատարվում են հողի վրա։ Գյումրիում այսօր 102-րդ ռուսական ռազմաբազան է, իսկ Ղարաբաղում իրենց առաքելությունն իրականացնում են ռուս խաղաղապահները։ Պետք է նայել, թե հատկապես ով է ազդում տարածաշրջանում իրավիճակի կայունացման վրա։ Հայտարարությունները զուտ որպես հայտարարություն ուղղակի պոպուլիզմ են և ոչ ավելին»,- ասաց նա, ավելացնելով՝ որոշ հասարակական-քաղաքական ուժերի կողմից հակառուսական քաղաքականությունը սպառնալիք է Հայաստանի և հայոց պետականության համար։

Ղուկասյանն ընդգծեց, որ Հայաստանում արևմտամետ շրջանակների հովանավորներն ուզում են, որ այսօր այնպիսի տպավորություն ստեղծվի, թե երկրում ակտիվորեն աճում են հակառուսական տրամադրությունները, սակայն դա այդպես չէ։ Հանրապետության շարքային քաղաքացիների մեջ շատ քիչ մարդիկ կան, ովքեր հավատում են, որ Արևմուտքը կարող է Ռուսաստանի այլընտրանքը դառնալ Հայաստանի համար.

«Արտաքին ուժերի հակառուսականություն տարածելու ջանքերը հակառակ արդյունքն ունեն շարքային քաղաքացիների շրջանում, որոնք կարող են սթափ գնահատել իրավիճակը։ Հայաստանում հակառուսական քարոզչության իրական նպատակը Ռուսաստանին տարածաշրջանից դուրս մղելն է, բայց դրանից կտուժի միայն Հայաստանը»,- հավելեց Արման Ղուկասյանը։

Այս թեմայով ՀՐԱՏԱՊ. Ապրիլի 25-ը պետք է լինի բեկումնային օր, լուսաբացը պետք է սկսվի համազգային շարժմամբ. Վարդան Ղուկասյան Զարուհի Փոստանջյանը ջահակիր էր Հայի ոգին դեռ վերջնական չի վերացել, Տավուշից կարող է սկսվել ամենամեծ պայքարը. Գրիգոր Հարությունյան Իշխող թեւը ամեն ինչ անում է նեղացնելու ընդդիմադիրների օղակը. անկախ ավագանիներին դուրս են թողել հանձնաժողովներից Ես կզող չե՛մ. Ավինյանի հրահանգով աշխատանքից ազատել են ավագանու անդամին