«Սեւանի ափին բիզնես չունեմ, չնայած` հողատարածք ունեմ». Հրանտ Մադաթյան

Սեւանի խնդիրների թոփ տասնյակում են նաեւ ափամերձ տարբեր շենք-շինությունները, որոնց առկայության պատճառով էլ ջրի մակարդակի բարձրացումը դառնում է գրեթե անհնար: Ճիշտ է, վերջին շրջանում բավականին կառույցներ ապամոնտաժվել են, բայց, իհարկե, ոչ խոշորներն ու առանցքայինները, որովհետեւ դրանք կապվում են նախկին եւ ներկա տարբեր պաշտոնյաների անունների հետ: Ե՞րբ հնարավոր կլինի դրանք ապամոնտաժել, եւ արդյոք սա խնդրի լուծման տարբերակ է, «Իրավունքը» հետաքրքրվեց ԱԺ ԲՀԿ խմբակցության պատգամավոր ՀՐԱՆՏ ՄԱԴԱԹՅԱՆԻՑ, ում անվան հետ եւս կապվում է Սեւանի ափամերձ որոշակի տարածք:

– Այդտեղ ահագին աշխատանքներ արել են, չի կարելի ասել, որ չի արվել: Այդ շենք-շինութուններից ահագին քանդվել է: Հիմա ինձ թվում է, որ եթե կառավարությունը ուզի, ո՞վ կարող է ռիսկ անել ու թույլ չտալ, որ ապամոնտաժեն: Բայց ուրիշ բան է, որ մարդկանց որոշակի գումար պետք է փոխհատուցել: Ժամանակին թույլատրել են, որ այդ շինությունները կառուցվեն, ո՞վ էր մտածում, որ ջուրն այդքան կբարձրացնեն: Դրա համար մարդկանց մի բան թող փոխհատուցվի, նոր թող գան, քանդեն: էդ էլ ճիշտ չէ, որ գան միանգամից քանդեն: Մարդիկ մի բան սարքել են եւ այդ բիզնեսով իրենց ընտանիքն են պահում կամ թեկուզ իրենց համար մի անկյուն են սարքել:

– Այս առումով Դուք ե՞ւս մտահոգություններ ունեք:

– Ես Սեւանի ափին բիզնես չունեմ, չնայած հողատարածք ունեմ, բայց ոչ մի աշխատանք չեմ տարել, բացի անտառը մաքրելուց, որը ջրի մեջ է մնացել: Որ չթողեմ ջրի մեջ մնա, տարիներ շարունակ վճարել եմ, որ մարդիկ մաքրեն, եւ այդ հատվածը միշտ մաքուր լինի: Այնպես որ, ես շահ չունեմ, շահագրգռված չեմ, ինչ ասում եմ, իմ ժողովրդի համար եմ ասում, եւ ինձ համար առաջնայինը Սեւանը փրկելու հարցն է, որը մեզ համար ռազմավարական նշանակություն ունի:

ՀՐԱՆՏ ՍԱՐԱՖՅԱՆ