Արվեստը եկել է փրկելու գիտությանը. ինչ է սպասվում Sensor փառատոնին

Արագածոտնի մարզի Օրգով համայնքում գտնվող Պարիս Հերունու աստղադիտարանի տարածքում այս օրերին աշխատանքային եռուզեռ է: Հայերն ու ռուսները միավորվել ու օրնիբուն աշխատում են, որպեսզի հասցնեն սեպտեմբերի 10-12-ն այդ տարածքում անցկացնել Sensor երաժշտության եւ ժամանակակից արվեստի միջազգային փառատոնը:

Sensor-ն իր մասշտաբներով ու բովանդակությամբ տարբերվելու է հայաստանյան փառատոններից ու բավականին լուրջ մրցակից դառնալու հավակնություններ ունի ամբողջ տարածաշրջանում: Այս մասին է հուշում այն, որ փառատոնին պատրաստվում են հյուրընկալել աշխարհահռչակ արտիստներ շուրջ 15 երկրներից, այդ թվում՝ Ավստրիայից, Բելգիայից, Մեծ Բրիտանիայից, Գերմանիայից, Հունաստանից, Վրաստանից, Իսրայելից, Իտալիայից, Նիդերլանդներից, Ռուսաստանից, Ռումինիայից, ԱՄՆ-ից, Թայվանից, Ֆրանսիայից, Շվեդիայից, Ճապոնիայից, Սինգապուրից, ԱՄԷ-ից եւ նույնիսկ Թուրքիայից: Իսկ Հայաստանից փառատոնին կներկայանա «ԹմբաԹա» հայտնի երաժշտական խումբը:

Ընդհանուր առմամբ՝ փառատոնին ներկա կլինեն ավելի քան 80 արտիստ, որոնց ունկնդրելու հնարավորություն կունենա շուրջ 3500 մարդ: Ընդ որում՝ նրանք ոչ միայն կվայելեն լավ երաժշտություն եւ կհիանան Հերունու գիտական միջավայրը տեսնելով, այլեւ կունենան վրանային հանգիստ անցկացնելու եւ, իհարկե, սնվելու հնարավորություն՝ սննդի վճարովի կետերից: Ընդ որում՝ մի հատված էլ փառատոնային տարածքում կոչվելու է Արցախ, որտեղ տեղահանված արցախցիները հնարավորություն կունենան արցախյան բարիքներ վաճառել այցելուներին, որի գումարն ամբողջովին մնալու է հենց իրենց: Սա կազմակերպիչները միաձայն որոշումն է:

Իսկ թե ինչպես է գիտական տարածքը սինթեզվելու արվեստի հետ՝ չվնասելով մեկը մյուսին ու ինչ է սպասվում փառատոնային օրերին, «Իրավունքը» պարզեց հենց տեղում: Ընդամենը 3 օրվա համար կազմակերպիչներն իրականացնում են ոչ միայն ամբողջ տարածքի մաքրման աշխատանքներ, այլ նաեւ վերանորոգում են տարածքում եղած ենթակառույցները, տանիքները, տնակները, կառուցում ոչ ժամանակավոր բեմահարթակներ, ապահովում լուսավորությամբ: Այո՛, Պարիս Հերունու աստղադիտարանի տարածքը մի նոր շունչ է ստանում՝ այն էլ մշակութային: Համենայնդեպս, փառատոնի համակազմակերպիչ ՆԱՏԱՇԱ ԱԲԵԼԸ վստահեցրեց, որ արվեստը եկել է փրկելու գիտությանը եւ ոչ թե վնասելու ու կարելի է ասել, որ մեկը մյուսին լրացնում են: Ի դեպ, այս գործում փառատոնի թիմը բավական լուրջ փորձ ունի: Նրանք մասշտաբային միջոցառումներ են կազմակերպել Նյու Յորքում, Բեռլինում, Բարսելոնայում, Մոսկվայում, ինչպիսին օրինակ բազմօրյա երաժշտական փառատոնն է եղել Բեռլինի ռադիոհեռարձակման կենտրոնի շենքում, որը մշակութային լուրջ նշանակութուն ունի։

«Այն պահից, երբ մեզ ցույց տվեցին մեր հայ գործընկերներն այս տարածքը, արդեն մոտ երկու տարի է երազում էինք, որ այստեղ անենք նմանատիպ փառատոն: Այս տարի ամեն ինչ դասավորվեց այնպես, որ կարողացանք իրականություն դարձնել այն: Հենց վայրի առանձնահատկություններից ելնելով` որոշվեց փառատոնի մի փոքր տիեզերական, գիտաֆանտաստիկ թեմատիկան եւ անվանումը: Լինելու են էլեկտրոնային երաժշտություն, երաժշտական խմբերի կենդանի կատարումներ, նկարիչներն աշխատելու են մեդիա, լուսային ինտերակտիվ ինստալյացիաների ժանրում: Մենք կուզեինք այս փառատոնը դառնար ամենամյա»,-  անդրադառնալով Sensor-ի գաղափարին՝ ասաց Նատաշա Աբելը:

Փառատոնի համակազմակերպիչ, «Արմատ Քոմմյունիթի ժամանակակից արվեստ» ՀԿ հիմնադիր-նախագահ ԼԵՎՈՆ ՀՈՒՆԱՆՅԱՆՆ էլ ուրախությամբ նշեց, որ իրենց թիմն արդեն փորձ ունի գտնել միջավայր ու փորձել բովանդակություն մտցնել այդտեղ՝ ձեւավորել սոցիալական միջավայր ու զարգացնել այն:

«Մենք տեղանքը ներկայացրինք մեր լավ ընկերներին, որ Արագածի լանջին այսպիսի մի հետաքրքիր տեղ կա: Տարբեր ժամանակահատվածներում այստեղ ուսումնասիրել ենք, հետազոտել եւ հասկացել, որ հնարավոր է այստեղ լինի փառատոն: Ապահովելու ենք ինչպես տարածքի կարեւոր նշանակության օբյեկտների անվնաս մնալը, այնպես էլ մարդկանց անվտանգությունը: Այստեղ կլինեն հսկիչներ, որոնք մարդկանց տեղաշարժին կհետեւեն: Այս առումով համագործակցում ենք ԱԻՆ-ի հետ, որպեսզի փառատոնի օրերին այստեղ լինեն փրկարարներ, հրշեջներ, բուժաշխատողներ եւ լեռնագնացներ: Ասեմ, որ այս օրերին վերանորոգվել են կառույցների տանիքները, աստիճանները, ենթակառուցվածքների վերականգնման աշխատանքներն էլ իրականացվում են «Ստանդարտացման եւ չափագիտության ազգային մարմին» ՓԲ-ի հետ քննարկման արդյունքում», - շեշտեց Լեւոն Հունանյանը:

«Արմատ Քոմմյունիթի ժամանակակից արվեստ» ՀԿ  հիմնադիր-նախագահը նաեւ ընդգծեց, որ իրենց ջանքերի շնորհիվ տարածքում այնպիսի լավ պայմաններ են ստեղծվել, որ գիտությամբ զբաղվող մարդիկ ցանկության դեպքում կկարողանան էլ ավելի մեծ սիրով իրենց գործն անել: Նա նաեւ ընդգծեց, որ խստորեն պահելու են ձեռք բերված պայմանավորվածությունները եւ աստղադիտակի ներսի հատված մուտքն արգելված է լինելու՝ ինչպես կազմակերպիչների, այնպես էլ մասնակիցների համար:

Նշենք, որ աստղադիտարանի կենտրոնական օբյեկտը 54 մետրանոց ռադիոօպտիկական աստղադիտակն է՝ միջոցառման խորհրդանիշը եւ լազերային մեդիա ինստալյացիա հարթակը, իսկ փառատոնի երաժշտական չորս բեմերը տեղակայված են աստղադիտակի հարակից տարածքներում։ 

Նյութը եւ լուսանկարները՝ ՀՐԱՆՏ ՍԱՐԱՖՅԱՆԻ

Հ.Գ.- Հիշեցնենք, որ փառատոնի անցկացման վայր Երեւանից եւ հակառակ ուղղությամբ կարելի է հասնել Sensor-ի՝ 30 րոպեն մեկ գործող տրանսպորտային ուղերթներով:

Այս թեմայով Սպանություն էր, ոչ թե պատահականություն. ինչ էր նախորդել ուղղաթիռի կործանմանը.Բալասանյան Ի՞նչ է հայտարարել Ռաիսին` ավիավթարից առաջ Բանակցություն չկա. Ալիեւը պահանջում է, Երեւանը տալիս, իսկ որտե՞ղ է ԵԱՀԿ-ն. Բալասանյան Միջազգայնագետը բաց նամակ է հղել Բագրատ սրբազանի գլխավորած շարժմանը Ստիպված էի պատմել իմ պատմությունը՝ թույլ տալով հանդիսատեսին կարեկցել իմ պայքարին. Իբրահիմ Միարի