Ես քեզի համար խելագարվիմ գը. կայացավ Նարեկի ու Մարգարիտայի հարսանիքը

Մեր օրերում դառն իրականությունից կորզված երջանիկ ակնթարթներ էլ են լինում: Զորավոր Սուրբ Աստվածածին եկեղեցում խորանի առաջ «Խեղափոխություն» նախագծի հեղինակ ՆԱՐԵԿ ՄՈՒԹԱՖՅԱՆԸ խոստացավ տեր լինել 44 օրյա պատերազմում անմահացած կապիտան Իշխան Պետրոսյանի դստերը՝  Նաիրի խոշորացված համայնքի «Իմ հզոր համայնք» խմբակցության ավագանու անդամ ՄԱՐԳԱՐԻՏԱ ՊԵՏՐՈՍՅԱՆԻՆ, իսկ նորահարսը վստահեցրեց, որ կլինի հնազանդ:

Անդառնալի կորուստների ցավը ու քաղաքական թոհուբոհի բոլոր հարվածները սեփական մաշկի վրա զգացած Պետրոսյանների եւ Մութաֆյանների ընտանիքները պաշտոնապես դարձան խնամիներ: Կայացավ երջանիկ զույգի երկար սպասված հարսանեկան արարողությունը, որը լի էր թաց արցունքներով, ընդ որում՝ ոչ միայն երջանկության, այլ նաեւ Մարգարիտայի պատերազմում նահատակված հայրիկի եւ Նարեկի լուսահոգի ծնողների բացակա, բայց հավերժ ներկա իրողությամբ պայմանավորված:

Հույզերն էլ ավելի անասելի դարձան, երբ պարզվեց, որ 44 օրյա պատերամում զոհված Հենրի Հարությունովի ծնողներն են ստանձնել քավորի եւ քավորկնոջ դերակատարությունը:

Նշենք, որ հարսանեկան արարողությանը ներկա էին փաստաբան Վահե Եփրիկյանը, ազատամարտիկ Դավիթ Մկրտչյանը, «Հայկական շարժում» նախաձեռնության հիմնադիր Տաթեւ Արցախը (Վիրաբյան), «Ազգային արժեքների պահպանման ճակատ» ՀԿ նախագահ Սեւան Աղաջանյանը, մոդել Անիտա Հարությունյանը, երգիչ Վիգեն Ահարոնյանը, DJ-Elf-ը՝ Արթուր Հովհաննիսյանը, եւ այլք: Նորապսակներին հատուկ շնորհավորելու էր եկել նաեւ ՀՀ երկրորդ նախագահ Ռոբերտ Քոչարյանի որդին՝ Լեւոն Քոչարյանը: Իսկ հարսանեկան արարողությունը վարեց Սունդուկյանի անվան ազգային ակադեմիական թատրոնի դերասան Արմեն Քուշկյանը:

Ուրախության հետ մեկտեղ՝ հերոսների հիշատակության ու պայքարի իսկական կոմպոզիցիա դարձավ հարսանեկան հանդեսը: Եվ, իհարկե, ներկաները չմոռացան նաեւ «Դիմադրության» շարժման հայտնի երգերի ներքո միաբերան վանկարկել. «Առանց Նիկո՛լ, Հայաստա՜ն»:

Հատկանշական էր այն, որ նորափեսան եւ նորահարսը կոտրեցին բոլոր կարծրատիպերը եւ ամենաշատ երգող ու պարողը հենց նրանք էին: Նախ զուգերգով հանդես եկան՝ Նարեկ Մութաֆյանի հայրենի բարբառով երգելով. «Ես քեզի համար խելագարվիմ գը», իսկ հետո եւս մի երգ եւ պար Մարգարիտա Պետրոսյանը նվիրեց սիրելիին: Հարսի քույրը՝ կապիտան Իշխան Պետրոսյանի մյուս դուստրը՝ Թագուհի Պետրոսյանն էլ մի երգ նվիրեց նորապսակներին: Իսկ փեսայի քույրը՝ դերասանուհի Անահիտ Մութաֆյանը, միանգամից մի քանի դերակատարություն էր ստաձնել՝ լինելով սիրասուն քույր, արդեն նաեւ տալ, ում ուսերին է լինելու սկեսրոջ պարտականությունները: Դրա համար էլ երեկոյի վերջին երգը նվիրվեց հենց նրան:

Մեզ մնում է անսահման երջանկություն մաղթել նորապսակներին, խաղաղություն ու անամպ երկինք՝ ամենքին:

ՀՐԱՆՏ ՍԱՐԱՖՅԱՆ

Այս թեմայով Մեզ համախմբողը մեր բարոյական արժեքները կոնսոլիդացնող Հայ Առաքելական եկեղեցին է. Մարինա Խաչատրյան Հայաստանը կարճ ժամանակ անց վերածվելու է օտարերկրյա գործակալական ցանցի աշխատասենյակի. զգուշացում Եթե ընդդիմությունը մանդատները դնում է, խորհրդարանական ճգնաժամ չի ստեղծվում. Տիգրան Քոչարյան Ինչ տեղի կունենա, եթե էմպիչմենթի գործընթացը ձախողվի. Տիգրան Քոչարյանը փակագծեր է բացում Բագրատ սրբազանը շատ լավ տիրապետում է այն գործիքներին, որով ժամանակին Փաշինյանն էր հաջողության հասել. Քոչարյան