ԿԱՐՃ ԼՈՒՐԵՐ

«ԵՐԲԵՔ ՉԵՄ ԴԻՄԵԼ ՍՈՐՈՍԻ ՀԻՄՆԱԴՐԱՄԻՆ` ՈՐԵՎԷ ԴՐԱՄԱՇՆՈՐՀ ՍՏԱՆԱԼՈՒ ԽՆԴՐԱՆՔՈՎ, ԴԱ ՀԵՐՅՈՒՐԱՆՔ Է»

11.02.2020 18:17 Հրապարակումներ
«ԵՐԲԵՔ ՉԵՄ ԴԻՄԵԼ ՍՈՐՈՍԻ ՀԻՄՆԱԴՐԱՄԻՆ` ՈՐԵՎԷ ԴՐԱՄԱՇՆՈՐՀ ՍՏԱՆԱԼՈՒ ԽՆԴՐԱՆՔՈՎ, ԴԱ ՀԵՐՅՈՒՐԱՆՔ Է»

Իշխանության վերին օղակներում սորոսականների ներմուծման վերաբերյալ վարչապետ Նիկոլ Փաշինյանին ուղղված «Իրավունքի» հարցը շարունակում է բուռն կերպով քննարկվել քաղաքական, քաղաքագիտական եւ քաղաքացիական տիրույթում: Թեմայի շուրջ հայտարարությամբ եւ ասուլիսով հանդես եկավ նաեւ Սորոսի հիմնադրամի գործադիր տնօրեն Լարիսա Մինասյանը: Այս մասին «Իրավունք TV»-ի տաղավարում զրուցել ենք ՍԻՄ կուսակցության նախագահ, «Իրավունք» թերթի խմբագրական խորհրդի նախագահ ՀԱՅԿ ԲԱԲՈՒԽԱՆՅԱՆԻ հետ:

«ՆՈՒՅՆ ՄԵՂԱԴՐԱՆՔՆԵՐԸ ՆՈՒՅՆ ԲԱՌԵՐՈՎ ՎԵՐԱԴԱՐՁՆՈՒՄ ԵՄ ՆԻԿՈԼ ՓԱՇԻՆՅԱՆԻՆ»

– Որպես Հայ-ռուսական համալսարանի գործնական ժուռնալիստիկայի ամբիոնի նախկին վարիչ, ըստ Ձեզ, ինչո՞վ էր արտառոց «Իրավունքի» լրագրողի հարցադրումը Ն. Փաշինյանին, որն այդքան մեծ արձագանք գտավ:

– Նախ` շնորհակալություն այն ամենի համար, ինչ արել եք, որովհետեւ դուք` որպես լրագրող, կատարել եք հանրային շատ օգտակար աշխատանք` տալով հանրությանն անհանգստացնող հարց: Այսինքն` որպես լրագրող, կատարել եք այն, ինչ պետք է անեիք: Եթե հանրությունն այսօր անհանգստացած է սորոսականների այսպիսի խրախճանքով, ուրեմն` դուք փոխանցել եք այդ մտահոգությունը : Եվ փաստ է, որ թե՛ վարչապետի պաշտոնն օկուպացրած անձը, թե՛ այդ Սորոս կոչված չարիքի այստեղի ներկայացուցիչը շատ ցավոտ են ընդունել հարցը: Հարց է առաջանում` եթե մեղավոր չեն, եւ եթե իրենց մոտ ամեն ինչ լավ է, ազնիվ են, ինչո՞ւ են այդքան ցավոտ ընդունում հարցը: Կարող ես բացատրել, չհամաձայնել, ներկայացնել քո դիտարկումը կամ կարծիքը հարցի վերաբերյալ, բայց հարցը տվել եք հետեւյալ կերպ` ինչո՞ւ է այդքան մեծ ակտիվություն այն մարդկանց կողմից, ովքեր սորոսական են եւ այսօր գտնվում են իշխանական լծակների մոտ եւ իրականացնում հակազգային գործունեություն: Սա շատ ճիշտ հարց է, որովհետեւ` այո՛, այսօր հակազգային գործունեություն է ծավալվում կառավարությունը եւ Ազգային ժողովը զավթած մարդկանց կողմից: Նրանք փորձում են Հայ եկեղեցին ոչնչացնել, փոխել կրթական ծրագրերը եւ այդտեղից հանել «Հայ ժողովրդի պատմություն» առարկան, «Հայոց լեզուն» ավելի պակաս ծավալներով ուսումնասիրել կրթական ծրագրերում, մանավանդ` բուհական, ուզում են, որպեսզի փոխենք մեր արժեհամակարգը: Ընդհանրապես` հայկականը մեզնից դուրս հանել եւ դարձնել ինչ-որ ստանդարտ աշխարհաքաղաքացիներ, որոնք կկատարեն այդ նույն սորոսականների եւ Սորոսի հիմնադրամի ծրագրերը: Ի վերջո, խոշոր առումով ծրագիրը հենց դա է`  մարդկանց զրկել ազգային ավանդույթներից, պատկանելությունից եւ դարձնել աշխարհաքաղաքացիներ, որոնք կենթարկվեն այն կենտրոններին, որոնց սպասարկում է Սորոսի հիմնադրամը: Հոգեբանները նման դեպքում ասում են, որ դուք կպել եք ամենաթույլ տեղին, բացահայտել, թե ով, ինչպես, ինչ մեխանիզմով է քայքայում Հայաստանի Հանրապետությունը: Դուք բացահայտել եք այդ աքիլլեսյան գարշապարը, որ այդ վարչապետ կոչեցյալը կախվածության մեջ է սորոսականներից, քանի որ սորոսականներ կան Ազգային ժողովում, կառավարությունում: Ավելին` ի վերջո, իրենք են այն ժամանակ կազմակերպել հեղաշրջում: Եվ եթե Փաշինյանը հանկարծ փորձի կես քայլով ցույց տալ, որ նա իրենց նվիրյալը չէ, ապա մեկ րոպեի հարց է, ԱԺ-ում կքվեարկեն, կհանեն նրան վարչապետի պաշտոնից, կդնեն ուրիշին: Իրավիճակի իրական տերը, այո՛, սորոսական այդ կենտրոններն են, որոնք գտնվում են մեր երկրից դուրս: Նրանք են տերը Հայաստանում կատարվող իրավիճակի: Նրանք են, որ ասում են` Հայ Առաքելական եկեղեցականին եթե դպրոցում տեսնեք, հարձակվեք վրան, գնացեք կաթողիկոսի շորերը քաշքշեք եւ փորձեք նետել ձորը, հանեք «Հայ եկեղեցու պատմությունը» ձեր դասագրքերից եւ ընդհանրապես` հայի էությունը հանեք ձեր միջից: Սա է նրանց բաց գաղափարախոսությունը, ինչն անում են բացահայտ: Եվ դա արվում է ամենուրեք աշխարհում, որտեղ կա Սորոս, որտեղից նրանց վռնդել են, իհարկե, մարդիկ հասկացել են, որ իրենց ինքնիշխանությանը վնաս է: Ընդ որում` սա ասում եմ ոչ միայն ես, այլ` տասնյակ հազարավոր քաղաքական գործիչներ ամբողջ աշխարհում: Այս մասին ասում են նաեւ երկրների նախագահներ, ղեկավարներ: Վերջիվերջո, այդ մասին ասել է անգամ ՀՀ անվտանգության ծառայության նախկին պետ Արթուր Վանեցյանը` ընդամենը մի քանի շաբաթ առաջ, որ այո՛, այդ կազմակերպությունը վտանգ է ներկայացնում Հայաստանի պետականության համար: Հիմա ինչո՞ւ են այդքան բորբոքվել, ի՞նչ են ուզում, որ չասե՞նք այս մասին, բայց նոր չէ, որ ասում ենք, միշտ էլ ասել ենք:

– Ովքե՞ր են սորոսականները: Այս հարցի պատասխանը, պարզվեց, չգիտեր վարչապետը:

– Երեւի, եթե հայոց լեզվի դասերին լավ մասնակցեր եւ ուշադիր լիներ այն անձը, որին դուք համարում եք վարչապետ, իսկ ես անվանում եմ վարչապետի պաշտոնն ապօրինաբար զավթած անձ, կսովորեր, որ ական վերջածանցը հայոց լեզվում պատկանելիության վերջածանց է: Եթե նա գիտի ՀՀԿ-ականն ինչ է, այսինքն` մարդ, որը պատկանում է Հանրապետական կուսակցությանը, ապա հայոց լեզվի տարրական գիտելիքներ ունեցող մարդը պետք է իմանա, որ սորոսական նշանակում է պատկանելություն Սորոսի գաղափարներին: Այսինքն` այդ գաղափարների հետեւորդ, նվիրյալ լինելն ու իրականացնողը: Թեեւ Դուք էլ մի քանի անգամ փորձեցիք բացատրել վերոնշյալ անձին, բայց, կարծես, չհասկացավ: Պատճառը երեւի այն էր, որ այնքան բուռն էր իր հոգեվիճակի խառնաշփոթը եւ անկառավարելի ջղային հիստերիան, որ ընթացքում անգամ ինչ-որ անկապ մեղադրանքներ էր շռայլում: Այդպես էլ չհասկացանք` ո՞ւմ էին ուղղված այդ մեղադրանքները: Եթե, ինչպես նա էր ասում, «Իրավունք» թերթի քաղաքական ղեկավարությանն էր վերաբերում, ապա նույն մեղադրանքները նույն բառերով, նույնությամբ վերադարձնում եմ իրեն` հատկապես սրբություններ չունենալու առումով: Եթե դա վերաբերում էր  ինչ-որ վերացական կոռուպցիոներների, դավաճանների եւ այլն, ապա ճիշտ կլինի, որ սույն անձը կարողանա հանգստանալ, վերաշարադրել իր մտքերը եւ հրապարակայնորեն ճշգրտել, թե ում էր  մեղադրում պետական դավաճանության մեջ, եւ վերջապես` ում էին ուղղված այդ բացահայտ վիրավորանքները: Դուք ասում եք` վարչապետ, բա վարչապետն այդպե՞ս է իրեն պահում, նայում ես ու ամաչում ես, որ քո երկրի վարչապետը նա է: Մեր շատուշատ քաղաքացիներ ասում են` արթնանում ենք, ինչպես գժանոցում, որովհետեւ տպավորությունն այդպիսին է: Բոլոր դեպքերում,  եթե այդ անձը չվերակողմնորոշվի եւ չհստակեցնի, թե ում էին ուղղված այդ վիրավորանքները եւ մեղադրանքները, ապա հարցը կքննարկենք իրավական դաշտում:

«ԼԱՐԻՍԱ ՄԻՆԱՍՅԱՆՆ ՈՒՇՔԸ ԿՈՐՑՐԵԼ Է, ՄԻԱՅՆ ԻՄ ԱՆՈՒՆՆ Է ՏԱԼԻՍ»

– Սորոսի հիմնադրամի գործադիր տնօրեն Լարիսա Մինասյանն արդեն երկրորդ անգամ իր ասուլիսի ժամանակ հնչեցնում է Ձեր անունը, թե Դուք գրանտ եք ստացել, ավելին` այս անգամ տվեց նաեւ Հայ Առաքելական եկեղեցու անունը:

– Լարիսա Մինասյանն այս կես տարում արդեն երկրորդ անգամ է իմ անունը տալիս, մինչդեռ մենք երբեք իր հետ որեւէ շփում չենք ունեցել, իմ շրջապատում ընկերներս անգամ ծիծաղում են` ասելով, որ ուշքը կորցրել է, միայն իմ անունն է տալիս: Հոգեբանների տեսանկյունից կա հանցագործի սինդրոմ, որը հետեւյալն է` նարկոմանները, օրինակ, անընդհատ ուզում են մեկին էլ, այսպես ասած, նստեցնել ասեղին, մարդասպաննները այն մեկին, որը չէր մասնակցում սպանությանը, դանակը տալիս են ձեռքը, ասում` անպայման դու էլ խոցիր, անբարոյականներն էլ ուզում են եւս մեկին բերել իրենց դաշտ ու համոզում, թե դու էլ զբաղվիր անբարոյականությամբ: Հիմա նույնն այս դեպքում է:  Առաջին անգամ, երբ այդ տիկինն ասաց. «Բաբուխանյանը սորոսական է», անմիջապես դատական հայցով մտա դատարան, եւ այսօր դատավարություն է ընթանում: Այս անգամ, իհարկե, նա ավելի մեղմ փորձեց խոսել, բայց էլի իմ անունը տվեց: Երբ դատարանում ասացինք` Ձեր ուզածն ի՞նչ է, ի՞նչ հիմքով եք ինձ վիրավորում, որովհետեւ ինձ համար սորոսական ասածը վիրավորանք է (ի դեպ, Փաշինյանը նույն բանն ասաց,  թե` թույլ չեմ տա Հայաստանի ոչ մի քաղաքացու անվանել սորոսական, որովհետեւ դա քամահրանք է, արհամարհանք է, չգիտեմ ինչ է եւ այլն: Այսինքն` նա էլ է  հասկանում, որ սա վիրավորական է: Սա միակ հարցն է, որում մենք միակարծիք ենք), պարզվեց,  իր ասուլիսի ժամանակ էլ մանրամասն Լարիսա Մինասյանը ասաց, որ խոսքն ուղիղ 20 տարվա վաղեմության մի պատմության մասին է, որի, իրենց ասելով, դրամաշնորհի գինը եղել է ընդամենը 460 դոլար: Իրականում, որպես ԱԺ պատգամավոր, Ազգային ժողովի ղեկավարության կողմից ստացել էի առաջարկ մեկնել գործուղման` Բուդապեշտ քաղաք, որտեղ պետք է անցկացվեր գիտաժողով, որը նվիրված էր միջազգային քրեական դատարանի գործունեությանը: Այն ժամանակ` 2000 թվականին, ես եւ լուսահոգի պատգամավոր Աղասի Արշակյանը ԱԺ պետաիրավական հանձնաժողովի անդամ էինք: Բնականաբար, ճշտվեց, որ բոլոր ծախսերը հոգում է հրավիրող կողմը եւ նույն օրը, երբ ես համաձայնությունս տվեցի, ստացա հրավեր այդ կազմակերպության կողմից, որը կոչվում էր «Սահմանադրական եւ իրավական քաղաքականության ինստիտուտ», որը ոչ մի կապ չունի սորոսականների հետ: Այսինքն` սա առանձին կազմակերպություն է, ինչը գրված է 2000 թվականի սեպտեմբերի 20-ի այդ փաստաթղթում: Այդ հրավերի մեջ, որը կարող ենք ներկայացնել եւ դատարանն արդեն ունի, գրված է, որ իմ կեցության եւ ճանապարհորդության բոլոր ծախսերը իր վրա է վերցնում հրավիրող կողմը: Բայց հիմա հանկարծ Լարիսա Մինասյանը հայտարարում է, որ տոմսը գնել են իրենք իրենց միջոցներով եւ ինչ-որ թղթեր է ուղարկել դատարան, որտեղ ասվում է, թե 460 դոլարը տվել են նրանք: Ճիշտն ասած, թե ով է «Սահմանադրական եւ իրավական քաղաքականության ինտիստուտի» ենթակապալառուն, ինձ համար միեւնույնն է: Գուցե գնամ մի 100 այլ կոնֆերանս, որտեղ հանքային ջուրը գնած լինի Սորոսը, եւ ես այդ հանքային ջրից խմեմ, հետո ասեն` բա խմեցիք այդ ջրից, դա մեր դրամաշնորհն էր, ուրեմն` դուք սորսական եք: Հոգեկան հիվանդի տրամաբանություն կամ միտումնավոր հանցագործի սինդրոմ, որի մասին արդեն ասացի: Բոլոր դեպքերում, եթե անգամ այդ մարդիկ են տոմսը գնել, շատ լավ է, որովհետեւ դատարանում նաեւ մենք տալիս ենք ապացույց, ասում ենք` խնդրեմ, սա տոմսն են, որով ես Երեւանից մեկնել եմ Մոսկվա, Մոսկվայից` Բուդապեշտ 2000 թվականին եւ մասնակցել եմ այդ բոլոր միջոցառումներին: Բացի այդ գումարից, որ նշվում է, այլ ծախսեր եմ ունեցել, որովհետեւ, բնականաբար, 460 դոլարով չես գնա Բուդապեշտ ու հետ գաս Երեւան: Ի դեպ, տեղի են ունեցել դատավարական նիստեր, որտեղ նաեւ պահանջել եմ փորձաքննության տալ այն փաստաթղթերը, որոնք սորոսականները ներկայացրել են:

– Եվս մեկ անգամ հստակեցնենք` փաստորեն, Դուք անհատապես որեւէ դրամաշնորհ չե՞ք ստացել Սորոսի հիմնադրամից, ինչը պնդում էր Լարիսա Մինասյանը:

– Կրկնում եմ` երբեք չեմ դիմել այդ հիմնադրամին` որեւէ դրամաշնորհ ստանալու խնդրանքով, դա հերյուրանք է: Եթե նրանք այն մյուս կազմակերպության հետ ունեն ինչ-որ պայմանագրային հարաբերություններ, աշխատանքի բաժանում, եւ եթե իրենք իսկապես այդ տոմսը գնել են, թեեւ ինձ համար ոչ մի տարբերություն, թե ով է գնել այդ տոմսը, միեւնույնն է, գիտեմ, որ ԱԺ-ից գնացել եմ գործուղման ու, ըստ պաշտոնական նամակի, բոլոր ծախսերը հրավիրող կողմն իր վրա է վերցրել: Իսկ թե հրավիրող կողմը հետո ում է խնդրել, ում է դիմել, ինչպես է ձեւակերպել, այլ հարց է: Հարցն ըստ էության այնքան անկարեւոր է: Եթե անգամ այդ տոմսը գնել է այդ հիմնադրամը, ապա այդ տոմսից որեւէ մեկ լումա գումար ո՛չ գրպանվել է, ո՛չ էլ այդ միջոցառման մասնակցելը որեւէ հակազգային գործունեություն է իր մեջ պարունակում: Այդ ամենը կարծում եմ` քիչ, թե շատ պլինտուսից բարձր ինտելեկտ ունեցող անձնավորությունը կհասկանա: Հիմա ինչո՞ւ են Լ. Մինասյանը եւ այլ սորոսականներ բորբոքված, ոգեւորված այդքան, որովհետեւ ուզում են ասել, թե տեսեք, ինքն էլ է մեզ նման, ինչ լավ է: Հարցս հետեւյալն է` տիկին Մինասյան, 20 արվա ընթացքում, երեւի, տասնյակ հազարավոր մարդիկ ստացել են տարբեր տեսակի դրամաշնորհներ, հազարավոր մարդիկ կրկնակի, եռակի, քառակի ավել անգամ են ստացել այդ գումարները: Էդ ի՞նչ պատահեց, որ Դուք հանկարծ քչփորեցիք գտաք, որ 20 տարի առաջ մի տոմս եք առել կամ չեք առել, որը օգտագործվել է, չի վերավաճառվել: Սա նշանակում է, որ փորձել են իմ քաղաքական գործունեության վրա գտնել մի բան, փնտրել են ու չեն գտել: Բայց գտել են ինչ-որ մի տոմսի պատմություն եւ արդեն երկու անգամ ասում են այդ մասին: Դրա փոխարեն, խոսեք Ձեր հարյուր հազարավոր դոլարների մասին, որոնք ուղղված են մեր երկրի քայքայմանը: Մենք դրա մասին ենք բարձրաձայնում:

ՀՐԱՆՏ ՍԱՐԱՖՅԱՆ

Հարցազրույցն ամբողջությամբ դիտե՛ք Iravunk.com-ում` անցնելով հետեւյալ կարճ հղումով` https://clck.ru/M7MNw

 

 

КОМСОМОЛЬСКАЯ ПРАВДА