Կոյուղաջրերը լցվել են «Դատալեքս»

Դատական իշխանության «Դատալեքս» տեղեկատվական համակարգի խափանումները տարակուսելի են: Վերջերս հաճախ ենք ստանում բողոքներ փաստաբաններից եւ ոչ միայն, որ «Դատալեքս» տեղեկատվական համակարգը երկու ամիս է, ինչ չի աշխատում՝ տարբեր պատճառաբանություններով: Հասկանալու համար առկա խնդիրը «Իրավունք»-ը խոսեց փաստաբան ԱՇՈՏ ՆՈՒՐԻՋԱՆՅԱՆԻ հետ: Նա նշեց, որ տեւական ժամանակ է, ինչ չի թարմացվում ծրագիրը, ինչն էլ իր հերթին անհարմարություն է պատճառում ոչ միայն փաստբաններին, այլ նաեւ լրագրողներին եւ անհատների:

- Վերջերս իրավաբանների կողմից բազմաթիվ դժգոհություններ են արտահայտվում դատական համակարգի datalex.am կայքի աշխատանքից, ի՞նչ կասեք այդ մասին:

- «Դատալեքս» տեղեկատվական համակարգը, որի միջոցով կարելի է ծանոթանալ ոչ միայն դատական ակտերին, այլ նաեւ հետեւել գործերի ընթացքին եւ մակագրություններին, առհասարակ չի թարմացվում: Ըստ Դատական դեպարտամենտի տարածած հայտարարության, Դատական դեպարտամենտի շենքում տեղի է ունեցել վթար՝ ջրի արտահոսք, որի արդյունքում վնասվել են համակարգերը սպասարկող սերվերները: Վթարից սերվերների նման վնասումը, ըստ նույն հայտարարության, պայմանավորված էր այն հանգամանքով, որ դեռեւս 2017-2018 թվականներին սերվերային տարածքի նախագծումը եւ կառուցումը իրականացվել է թերացումներով, առնվազն` առանց անվտանգային լիարժեք կահավորման, եւ պատշաճ հաշվի առնված չէր կոյուղաջրի ջրագծերի տեղադրման մանրամասն սխեման: Նշվածից կարելի է եզրակացնել, որ կարեւորագույն այդ սերվերները վնասվել են կոյուղաջրերից կամ ջրի այլ արտահոսքից:

- Պարոն Նուրիջանյան, ի՞նչ եք կարծում՝ ներկա պահի դրությամբ հնարավոր չէ՞ր խնդրին արդեն իսկ լուծում տալ:

- Ես ծրագրավորող չեմ եւ հաստատապես չեմ կարող իմանալ, թե որքան ժամանակ կարող է պահանջվել ծրագրային խնդիրները շտկելու համար: Ըստ Դատական դեպարտամենտի հայտարարության, Հայաստանի տեղեկատվական համակարգերի գործակալությունը ներկայացրել է խնդրի լուծման իր տեսլականը եւ հավաստիացրել, որ երկու ամսվա ընթացքում ժամանակակից տեխնոլոգիաների եւ անվտանգային բարձր երաշխիքների կիրառմամբ հնարավոր կլինի ամբողջությամբ լուծել առկա խնդիրները, ինչպես նաեւ դատական համակարգը զերծ պահել հետագա նմանատիպ իրավիճակների առաջացումից:

- Հնարավո՞ր է՝ համակարգի խափանումը կապված լինի արտաքին ազդեցության հետ, թե՞ ջրագծերի վթարի պատճառն արժանահավատ է Ձեզ թվում:

- Ոչինչ չեմ բացառում: Մեր օրերում ամեն վարկած իրավունք ունի գոյություն ունենալու: Ընդ որում, եթե խոսենք կողմնակի ազդեցությունից, ոչ միայն արտաքին, այլ նաեւ ներքին ազդեցությունը եւս պետք չէ բացառել: Ինձ համար «Դատալեքս» տեղեկատվական համակարգի՝ այդքան հաճախակի եւ այդքան երկարատեւ խափանումները տարակուսելի են: «Դատալեքս» տեղեկատվական համակարգի միջոցով իրավաբանները, լրագրողները եւ, առհասարակ, անաչառ դիտորդները կարող են, ի թիվս այլի, հետեւել նաեւ գործերի բաշխմանը եւ մակագրումներին: Լինում են դեպքեր, երբ աղմկահարույց եւ քաղաքական ենթատեքստ ունեցող քրեական գործերի մակագրման օրինականության վերաբերյալ կասկածներ են առաջանում հատկապես տվյալ քրեական գործերով պաշտպանական կողմի մոտ: Բոլոր դեպքերում, իրավիճակը խնդրահարույց է: Հուսով եմ, որ խնդիրը կկարգավորվի վերջնական:

ՆԱՆԱ ՍԱՐԳՍՅԱՆ

Այս թեմայով Պետք էր ուշքի բերել, ապտակը սթափեցնող էր. Աշոտ Սարգսյանը՝ հայտնի միջադեպի մասին ՀՐԱՏԱՊ. Աղմկահարույց գործերով հայտնի փաստաբանը բաց նամակով դիմել ՀՀ վարչապետ Նիկոլ Փաշինյանին ՀՐԱՏԱՊ . Ինչու հետաձգվեց Վարդան Ղուկասյանի գործով նիստը եւ ԱՄՆ-ի փաստաբանական խմբի վերաբերյալ հնչող քննադատությունների մասին. Հայտնի փաստաբանը հայտարարությամբ է հանդես եկել ՀՐԱՏԱՊ. Լաս Վեգասի դատավարությունից ժամեր առաջ հայտնի փաստաբանը բացառիկ մանրամասներով հարցազրույց է տվել Թեժ է լինելու. քոչարյանականների կեղծ թեզերի, հետաքրիր բացահայտումների եւ Նիկոլից Նիկոլ լինելու մասին