Ինչպես ՔՊ-ն զոռբայությամբ Սիսիանում վերցրեց իշխանությունը

Սիսիանի ՏԻՄ համամասնական ընտրություններին, որքան էլ անհավատալի է, որ սեպտեմբերյան պատերազմից հետո սիսիանցիները կգնային ընտրելու իշխող «Քաղաքացիական պայմանագիր» կուսակցությանը՝ միեւնույն ժամանակ, հուսահատ ցույց տալով սարի գլխին ծածանվող ադրբեջանական դրոշը, բայց նույնքան էլ կանխատեսելի էր` հենց տեղում ուսումնասիրելով առկա տրամադրությունները:

Համակերպված դառը իրականության հետ, զզված քաղաքականությունից՝ պատրաստակամ գնում էին ընտրության քաղաքի մանկավարժները, բժիշկները… մի խոսքով՝ մտավորականները: Իսկ անգամ հարազատ քաղաքի իրավիճակի մասին վախենում էին որեւէ մեկնաբանություն տալ: Մեկն «Իրավունքի» հետ զրույցում ասաց, որ եթե խոսի, տանեցիները «սեւը կտան», մյուսը լաց եղավ, թե այնքան նեղված է, որ խոսելը չի գալիս, երրորդը վստահեցրեց, որ ով խոսի, աշխատանքից կազատեն, բայց աշխատանքից ազատվածներն ու նոր իշխանությունների օրոք գործ չգտածներն էլ «նավսյակի» լռում էին: Իսկ քանդուքարափ փողոցով անցնող քաղաքացին վստահեցնում էր, որ իրենց ՔՊ-ական քաղաքապետի ԺՊ-ն՝ Արմեն Հակոբջանյանը, շատ բան է արել իրենց համար:

Հաջորդ կատեգորիան, որոնք ակտիվություն էին դրսեւորում ընտրություններին, հոգեկան, առողջական խնդիրներ ունեցողներն էին ու մի ոտքը գերեզմանում տարեցները, որոնց քաշ-քաշ անելով՝ բերում էին ընտրության: Նրանցից մի քանիսը այդպես էլ չհասկացավ` ուր է եկել եւ ինչու, բայց չգիտես ինչպես՝ արթնացել էր հենց այս շրջանակի մեջ քաղաքացիական բարձր գիտակցությունն ու քաղաքացիական պարտքը կատարելու պատրաստակամությունը: Մինչդեռ ընտրող երիտասարդությունը սակավաթիվ էր, չհաշված՝ մի քանի հարսների, որոնք եկել էին ընտրելու ավագանու նախընտրական ցուցակում տեղ գտած հեռու-մոտիկ բարեկամներին:

Ուշագրավ է այն, որ նախորդ տարի սեպտեմբերի 25-ին կայացած ընտրությունների արդյունքերով Սիսիանում այդպես էլ ոչ մի ուժ չէր կարողացել հավաքել իշխանություն ձեւավորելու համար անհրաժեշտ 51 տոկոսը: Բայց ավագանու կազմ անցածների թվում, օրինակ, «Ապրելու երկիր» կուսակցությունն այս անգամ չմասնակցեց ընտրություններին` հավանաբար համարելով, որ Սիսիանն այլեւս իրենց համար նպաստավոր չէ ապրելու համար: Այս անգամ ընտրապայքարը ծավալվեց ՀՀԿ-ի, ՔՊ-ի եւ ՔՈ-ի միջեւ: Իշխանական «տասովշիկները» կուտակվել էին` ընտրատեղամասից 50 մետր հեռավորություն պահպանելով, բայց եւ ընտրություններին մասնակցողների «մոնիթորինգ» ու «ուղղորդող» առաքելություն իրականացնելով: Այո՛, նիկոլականները սերտել են ընտրական բոլոր արատավոր բարքերը, ինչի մեջ երբեմնի ընդդիմադիր ժամանակ մեղադրում էին նախորդ իշխանություններին:

ՀՐԱՆՏ ՍԱՐԱՖՅԱՆ