o C     18. 09. 2019   : :

ԿԱՐՃ ԼՈՒՐԵՐ

Վահե Գրիգորյանի ինքնահռչակումը ոտնձգություն է դատական իշխանության անկախության նկատմամբ. «Ազգային օրակարգ»

24.06.2019 10:31 ԻՐԱՎՈՒՆՔ
Վահե Գրիգորյանի ինքնահռչակումը ոտնձգություն է դատական իշխանության անկախության նկատմամբ. «Ազգային օրակարգ»

Վահե Գրիգորյանի ինքնահռչակումը դատական իշխանության անկախության նկատմամբ հերթական ոտնձգությունն է՝ իշխանության անթաքույց աջակցությամբ: Այս մասին հայտարարություն է տարածել «Ազգային օրակարգ» կուսակցության խորհուրդը:

Սկսվել է Ռոբերտ Քոչարյանին ազատելու միջնորդությամբ դատական նիստը

Հայտարարությունում, մասնավորապես, ասվում է.

«Հունիսի 18-ին ՀՀ Ազգային ժողովը Վահե Գրիգորյանին ընտրեց ՀՀ Սահմանադրական դատարանի դատավոր։ Ընտրությանը հաջորդած երդման արարողության ընթացքում վերջինիս ինքնահռչակումը Սահմանադրական դատարանի նախագահ, ինքնիրավչության վտանգավոր դրսեւորում էր, քանի որ Սահմանադրության 213 հոդվածը կարգավորում է Սահմանադրական դատարանի անցումային շրջանում գործունեության հարցը, իսկ «անդամ» ու «դատավոր» եզրերի միջեւ գոյություն ունեցող զուտ պայմանական տարբերությունը որեւէ կերպ չի ենթադրում փաստացի լիազորությունների տարբերություն, եւ մինչ այժմ չի խոչընդոտել Սահմանադրական դատարանի գործառնությունների արդյունավետ իրականացմանը։

Ավելին, թեեւ Սահմանադրության անցումային դրույթները կարող են որոշակի տարընթերցման առիթ տալ, գործող Սահմանադրության 168 հոդվածը նրա դրույթների մեկնաբանության բացառիկ իրավունքը եւս վերապահում է Սահմանադրական դատարանին, եւ ոչ թե նրա առանձին դատավորին, ուստի նրա կողմից հնչեցրած ցանկացած կարծիք իրավական ուժ չի կարող ունենալ առանց Սահմանադրական դատարանի պաշտոնական որոշման։

Այս պայմաններում, Սահմանադրության անցումային դրույթների կամայական մեկնաբանությունը, եւ դրանց շահարկմամբ կատարված ինքնահռչակումը Վահե Գրիգորյանի կողմից հանդիսանում է դատական իշխանության անկախության նկատմամբ հերթական ոտնձգություն՝ այսօրվա կառավարող մեծամասնության անթաքույց աջակցությամբ, որը, ըստ էության, փորձում է սահմանադրական իրավունքը փոխարինել հեղափոխական նպատակահարմարությամբ` այս անգամ թիրախավորելով Սահմանադրական դատարանը:

Սա արկածախնդիր գործելաոճ է, եւ ի վերջո, հանգեցնելու է երկրում օրինականության ու իրավակարգի տապալմանը, դրանից բխող վտանգավոր եւ անկանխատեսելի հետեւանքներով։

«Ազգային օրակարգ» կուսակցության խորհուրդը դատապարտում է Վահե Գրիգորյանի ինքնահռչակումը Սահմանադրական դատարանի գործող նախագահ, եւ դրանից բխող ցանկացած ապօրինի գործունեություն, կոչ է անում գործող Սահմանադրության անցումային դրույթների մեկնությունը անհրաժեշտության դեպքում իրականացնել նույն Սահմանադրության 168 եւ 169 հոդվածներով նախատեսված հստակ ընթացակարգով, եւ նաեւ կոչ է անում Հայաստանի Հանրապետության պետական իշխանության բոլոր մարմիններին՝ խստագույնս պահպանել Սահմանադրությունը, թույլ չտալով նրա խախտման միջոցով երկրում գործող իրավակարգի տապալում»։

Հիշեցնենք, որ Վահե Գրիգորյանը հունիսի 20–ին Ազգային ժողովում հայտարարեց, որ Սահմանադրական դատարան մուտք գործելիս, որպես Սահմանադրական դատարանում միակ դատավոր, որովհետեւ մյուս դատավորը այս օրերին բացակայում է, ստանձնելու է Սահմանադրական դատարանի նախագահի լիազորությունների եւ պարտականությունների կատարումը։  Ավելի ուշ ԱԺ «Իմ քայլը» խմբակցության պատգամավոր Նիկոլայ Բաղդասարյանը հայտարարեց, որ Հրայր Թովմասյանը այլեւս Սահմանադրական դատարանի դատավոր չէ եւ չի էլ եղել այդպիսին:

Ըստ պատգամավորի՝ ոստիկանությունը չպետք է թույլ տա ոչ դատավորին մուտք գործել ՍԴ–ի վարչական տարածք։

 

 

КОМСОМОЛЬСКАЯ ПРАВДА