o C     23. 10. 2019   : :

ԿԱՐՃ ԼՈՒՐԵՐ

«ՍՊԱՍՈՒՄՆԵՐԻՑ ԳՈՆԵ ՄԵԿԸ, ՈՐՈՆՔ ՈՒՆԵՐ ՀԱՍԱՐԱԿՈՒԹՅՈՒՆԸ, ԻՐԱԿԱՆՈՒԹՅՈՒՆ ՉԻ ԴԱՐՁԵԼ»

01.05.2019 20:50 ՀԱՆԴԻՊՈՒՄ
«ՍՊԱՍՈՒՄՆԵՐԻՑ ԳՈՆԵ ՄԵԿԸ, ՈՐՈՆՔ ՈՒՆԵՐ ՀԱՍԱՐԱԿՈՒԹՅՈՒՆԸ, ԻՐԱԿԱՆՈՒԹՅՈՒՆ ՉԻ ԴԱՐՁԵԼ»

Ի՞նչ ձեռքբերումներ եւ բացթողումներ ունեցանք իշխանափոխությունից մեկ տարի անց, ինչո՞ւ է դատաիրավական համակարգը շարունակում ընտրովի արդարադատություն իրականացնել: Այս ամենի, ինչպես նաեւ Արցախի հարցի հետ կապված տարատեսակ քննարկումների վերաբերյալ  «Իրավունք TV-ի» տաղավարում զրուցեցինք «Ազգային անվտանգություն» կուսակցության ղեկավար ԳԱՌՆԻԿ ԻՍԱԳՈՒԼՅԱՆԻ հետ, ով, նախ ամփոփելով իշխանփոխության մեկ տարին, ասաց.

«Վանեցյանին պարտադրել էին ուղիղ պահանջել Հրայր Թովմասյանի եւ Բակո Սահակյանի հրաժարականը»

Ուղիղ մեկ տարի առաջ ասում էին, որ մարդկանց դեմքին ժպիտ է հայտնվել, մարդիկ ուրախ են: Հիմա պարզվեց, որ 365 օրից մեկ օրը տվեցին քաղաքացուն, եւ հետաքրքիր է՝ այդ օրը ժպտացող քանի՞ մարդ կար Երեւանի փողոցներում: 124 միլիոն դրամ էլ ծախսել էին այդ օրվա համար, որի հետ կապված հարկավոր է նախ` կոպեկ առ կոպեկ հաշվետվություն պահանջել, թե այդ գումարը ուր է գնացել: Թող ժողովրդին ներկայացնեն, թե ինչքան խորոված են արել, ով է այդ խորովածը կերել եւ ուրիշ էլ ինչ տեղեր են ծախսվել: Բայց հետաքրքիր է, որ այդ օրը նույնիսկ խորոված ուտողների մեջ ժպտացողներ չկայինԱյսինքն, դրական առումով կարծես ոչինչ չի փոխվել: Բացասական առումով, կարծում եմ, այս եթերային ժամանակահատվածը չի բավականացնի՝ դրանք թվարկելու համար: Որովհետեւ այն սպասումներից գոնե մեկը, որոնք ուներ հասարակությունը, իրականություն չի դարձել: Իսկ սպասումները բավականին շատ էին, բավականին ցանկալի էին, մարդկանց մեջ հույս կար, բայց...

«Բադասյանի ֆանտազիան կարող է հերիքի նաեւ Դոնալդ Թրամփին փոխելու հարցը բարձրացնել»

Ամեն դեպքում, կարող եմ ասել, որ թե՛ սոցիալ-տնտեսական, թե՛ քաղաքական առումով որեւէ առաջընթաց չունենք, իսկ որոշ տեղերում անգամ հետընթաց ենք արձանագրել: Այս մեկ տարվա ընթացքում միակ դրական բանն այն է, որ մեզանից յուրաքանչյուրը ճանաչեց իր դիմացինին. այդ առումով թավշյա հեղափոխության եւ անձամբ Նիկոլ Փաշինյանի դերակատարությունը անչափ մեծ է: Հիշում եմ բոլոր մարդկանց այն քանակը, ովքեր իրենց քաղաքական կենսագրության առումով բացառապես պարտական են եղել Սերժ Սարգսյանին: Եվ եթե Սերժ Սարգսյանն այցելում էր մի տեղ, նման մարդկանց նպատակն էր՝ անպայման երեւալ նրա աչքին: Հիմա էլ այդ մարդկանցից շատերն իրենց ապահով են զգում թե՛ քաղաքական կենսագրության, թե՛ ֆինանսական առումով: Միայն թե դարձել են Նիկոլ Փաշինյանի ամենաերդվյալ պաշտպանները՝ հարձակվելով նրանց վրա, ովքեր քննադատում են: Այ, այդ կարգի մարդկանց դեմքը բացահայտվեց, եւ նրանք շատ-շատ են: Այդ առումով ես շնորհակալ եմ Նիկոլ Փաշինյանին, որ թույլ տվեց ճանաչել մեր դիմացիններին: Որովհետեւ, եթե կյանքը շարունակվեր ինչպես որ կար, մենք չէինք ճանաչի եւ մեզ միշտ կթվար, որ այդ մարդիկ նվիրված են, հավատարիմ են: Այսինքն` մենք քաղաքական, սոցիալ-տնտեսական, դեմոգրաֆիկ, արժեհամակարգային բոլոր բնագավառներում ունենք սարսափելի նահանջ, բայց մարդկանց ճանաչողության առումով այս տարին բավականին հարուստ էր:

 

«ՓԱՇԻՆՅԱՆԸ ՏԱՌԱՊՈՒՄ Է ՇՐՋԱՊԱՏԻ ՎԱՐԱԿԻՉ ՀԻՎԱՆԴՈՒԹՅԱՄԲ»

Բազմաթիվ քրեական գործեր են հարուցվել իշխանափոխությունից: Սակայն շատերը մեծ գումարներ տալով` կա՛մ ազատվեցին, կա՛մ խափանման միջոցներ փոխվեցին: Իսկ Ռոբերտ Քոչարյանը եւ Մանվել Գրիգորյանը շարունակում են մնալ անազատության մեջ:

- Մարդիկ ուզում են հասկանալ՝ իրենք Քաջ Նազա՞րն են, թե՝ չէ, որ իրենք ում ուզենան, կարող են նստեցնել, ում չուզենան՝ ոչ: Այսօր մարդասպանին կարող են արդարացնել, անմեղին՝ մարդասպան դարձնել: Այսինքն, սա պետական մտածողություն չունեցող մարդկանց դրսեւորումն է իրական կյանքում: Այսօր մարդիկ մտածում են, որ եթե իրենք իշխանություն են, ուրեմն ամենակարող են: Այնպես որ, խոսել արդարադատության մասին կամ ասել, թե ինչու այս դեպքում այսպես վարվել, մյուս դեպքում՝ ոչ, անիմաստ է: Փաշինյանն էլ տառապում է շրջապատի վարակիչ հիվանդությամբ:

 

«ԱՐՑԱԽԸ ՄԵՐ ՏԱՐԱԾԱՇՐՋԱՆՈՒՄ ԱՄԵՆԱԺՈՂՈՎՐԴԱՎԱՐԱԿԱՆ ՊԵՏՈՒԹՅՈՒՆՆ Է»

Անդրադառնանք նաեւ Արցախի հարցին, հաշվի առնելով, որ վերջին շրջանում շատ է շահարկվում հող հանձնել-չհանձնելու թեման:

- Արցախի հարցին ես ընդհանրապես խուսափում եմ անդրադառնալ, որովհետեւ դե ֆակտո գոյություն ունի կայացած պետություն՝ իր բոլոր պետական ինստիտուտներով: Այդ պետությունն ունի քաղաքացիներ, որոնք հարգում են իրենց սահմանադրությունը, օրենքները, ունեն իրենց պետական կառուցները, որոնք այսօր իրենց օրվա հացը վաստակում են իրենց հայրենիքում` Արցախ աշխարհում: Ժողովուրդն իր խոսքը ասել է դեռեւս 1988-89թթ.ին, ապա նաեւ՝ պատերազմի տարիներին, եւ մի քանի օր հետո էլ նշելու ենք Մայիսյան եռատոնը Արցախում: Այսինքն, ժողովուրդն իր անելիքը արել է, այլեւս մնում է, որ դե ֆակտո մեր իշխանությունները կարողանան դե յուրե ֆիքսել այդ արածը, եւ այդ ֆիքսումը տարածել ամբողջ աշխարհով: Ես դեռեւս 2009 թվականին «15 հարց, 15 պատասխան. ո՛չ պատերազմ, ո՛չ խաղաղություն» վերնագրով գրել եմ փոքրիկ հարցերի եւ պատասխանների ժողովածուն: Արդեն երեք անգամ տարբեր մարդկանց միջոցով ուղարկել եմ ՀՀ վարչապետ Նիկոլ Փաշինյանին, չգիտեմ հասել է, թե՝ ոչ: Պարտավորվում եմ ինչ-որ առիթով անձամբ իրեն տալ այդ գիրքը, որտեղ Արցախին վերաբերող բոլոր հարցերի պատասխանները կան: Մասնավորապես՝ զիջե՞լ, թե չզիջել, փոխզիջումը ո՞րն է, կարելի՞ է դրան գնալ, թե՝ ոչ: Այդ բոլոր հարցերի պատասխանները հայերեն, ռուսերեն, անգլերեն: Այդտեղ ասված է ամեն ինչ, ավելացնելու ոչինչ չկա: Արցախը կայացած պետություն է, Արցախը մեր տարածաշրջանում ամենաժողովրդավարական պետությունն է, եւ միակը, որը ոչ թե անվտանգություն սպառող է, այլ անվտանգություն արտադրող է: Այսինքն, ինքն իր գոյությամբ կայունություն է ապահովում մեր տարածաշրջանում ամբողջությամբ: Հիմա ոնց կարելի է այս կայունությունն ապահովող այս տարածաշրջանային միավորի հետ կապված որեւէ փոփոխության գնալ, որի հետեւանքները դժվար է հետո պատկերացնել: Իհարկե, մենք հայ իրականության մեջ ունենք մարդիկ, ովքեր ինչ-որ հողեր տալու մասին են խոսում, որոնք քնել ու զարթնել եւ նման բան են մտածել: Բայց ամեն ինչ լավ կլինի, Արցախը կայացած պետություն է, գնալով շատ ավելի է կայանալու:

Զրույցը` ԻԼՈՆԱ ԱԶԱՐՅԱՆԻ

 

КОМСОМОЛЬСКАЯ ПРАВДА