ԿԱՐՃ ԼՈՒՐԵՐ

«Այբ» դպրոցի համահիմնադիր Դավիթ Յանը պատասխանել է ԿԳ նախարարին

26.05.2018 17:30 ՀԱՆՐՈՒԹՅՈՒՆ
«Այբ» դպրոցի համահիմնադիր Դավիթ Յանը պատասխանել է ԿԳ նախարարին

Օրերս Կրթության եւ գիտության նորանշանակ նախարար Արայիկ Հարությունյանը անդրադառնալով «Այբ» դպրոցին, հայտարարել էր, թե հանձնարարել է, որպեսզի այնտեղ կազմակերպեն Արարատյան բակալավրիատի ֆինանսական աուդիտ: ԿԳ նախարարը նաեւ ասել էր, թե իբր «Այբ»-ի հիմնադիրներից մեկը` Տեր Մեսրոպ քահանա Արամյանը հանրակրթության ոլորտին ամենամեծ վնաս հասցրած անձանցից է:
«Այբ» դպրոցի համահիմնադիր, «Այբ» կրթական հիմնադրամի համահիմնադիր, FAST-ի (Հայաստանի գիտության եւ տեխնոլոգիաների հիմնադրամ) խորհրդատվական խորհրդի անդամ UWC Դիլիջանի նվիրատու ABBYY ընկերության հիմնադիր եւ նախագահ ԴԱՎԻԹ ՅԱՆԸ ԿԳ նախարարի այս հայտարարությունից հետո բաց նամակ է հղել Ա. Հարությունյանին: Նամակը ներկայացնում ենք ամբողջությամբ.

ԱԱԾ-ն փնտրում էր Արմեն Սանթրոսյանին. դիմակավորված անձինք ՊՀԹ-ում (Տեսանյութ)

Հարգելի Արայիկ Հարությունյան,

Հպարտ եմ, որ ծնվել եմ Հայաստանում: Մայրս հայ է, հայրս`չինացի: Կյանքիս առաջին 17 տարիներն անցկացրել եմ Հայաստանում։ Հայաստանն ինձ տվել է կյանքիս ամենակարեւոր բանը՝ կրթություն։ Այնուհետեւ ընդունվել եմ Մոսկվայի ֆիզիկատեխնիկական ինստիտուտ (ֆիզտեխ)՝ ԽՍՀՄ-ի լավագույն համալսարանը, որտեղ ընդունվել եմ ոչ միայն ծնողներիս շնորհիվ, որոնք երկուսն էլ ֆիզիկոսներ են, ոչ միայն Երեւանի ֆիզիկայի ինստիտուտի (ԵրՖի) եւ Ֆիզիկամաթեմատիկական (ֆիզմաթ) դպրոցի իմ ուսուցիչներ Գագիկ Գրիգորյանի, Արշավիր Ստեփանյանի եւ շատ այլ փայլուն ուսուցիչների շնորհիվ, այլ նաեւ շնորհիվ իմ ավագ դասընկերներ եւ օլիմպիադայի հաղթողներ Մաթեւոս Արամյանի եւ Աշոտ Ասլանյանի, որոնք մեզ ֆիզիկա էին սովորեցնում։

Այսօր իմ առաջին ընկերությունը՝ ABBYY-ն, համաշխարհային առաջատար է արհեստական բանականության ոլորտում եւ գրասենյակներ ունի աշխարհի 11 երկրում, ունի ավելի քանի 1000 աշխատակից, 400 պատենտ եւ 50 միլիոն օգտատեր աշխարհի 200 երկրում։

2006 թվականին Ֆիզմաթի/Ֆիզտեխի 8 շրջանավարտներով, այդ թվում՝ Արամ Փախչանյանը, Արթուր Բերդը, Աշոտ Ասլանյանը, Դավիթ Փախչանյանը, Կարեն Մուսայելյանը, Կարո Սարգսյանը և տեր Մեսրոպ (Մաթեւոս) քահանա Արամյանը՝ մարդիկ, որոնք զգալի մասնագիտական եւ բիզնես հաջողություններ էին գրանցել իրենց կյանքում, հավաքվեցինք մեր տանը եւ որոշեցինք մեր ներդրումն ունենալ Հայաստանի եւ հայկական կրթության զարգացման գործում՝ հավատալով, որ կրթությունը աշխարհը վերափոխելու եւ ավելի լավ տեղ դարձնելու միակ միջոցն է։ Այս նպատակով մենք հանձն առանք նվիրաբերել գումարներ եւ աշխարհի տարբեր ծայրերից ներգրավել ավելի շատ մարդկանց՝ ստեղծելու՝

ա) «ապագայի դպրոց» եւ

բ) կրթական հիմնադրամ, որը զգալիորեն կբարելավի կրթության որակը Հայաստանի հարյուրավոր դպրոցներում։

Մենք հավատում ենք, որ վերջին 12 տարում այն շարունակական ջանքերը, որոնք ներդրել են «Այբ» համայնքի անդամները, այդ թվում՝ Դավիթ Սահակյանը, Գագիկ Գրիգորյանը, Անահիտ Ադամյանը, Աշոտ Ասլանյանը, Աշոտ Թումասյանը, Աշոտ Մկրտչյանը, Ավետիք Չալաբյանը, Արամ Արամյանը, Արամ Փախչանյանը, Արեգ Զաքոյանը, Արթուր Ալավերդյանը, Արթուր Բերդը, Արթուր Թովմասյանը, Արթուր Ջանիբեկյանը, Արմեն Խեչոյանը, Արմեն Կազարովը, Արմինե Առուստամյանը, Արսեն Գալստյանը, Արսեն Ղազարյանը, Արսեն Մամիկոնյանը, Արտակ Օգանեսյանը, Արտաշես Շիրիկյանը, Արտյոմ Գրիգորյանը, Դավիթ Յանը, Դավիթ Փախչանյանը, Լևոն Ղազարյանը, Լևոն Ֆրնջիբաշյանը, Կարեն Մուսայելյանը, Կարո Սարգսյանը, Մանուկ Հերգնյանը, Մարտիրոս Մինասյանը, Յուլիա Դանիելյանը, Նատալյա Ռիժկովան, Ռուբեն Հարությունյանը, Ռուբեն Սիմոնյանը, Սահակ Պետրոսյանը, Սամվել Դովլաթյանը, Սարգիս Բադալյանը, Սերգեյ Ստեփանյանցը, Սուրեն Հարությունյանը, Վահե Ամիրբեկյանը, Վարդան Բաբիկյանը, Վիկտոր Ակուլյանը, Արմեն Մելքումյանը, Արմեն Շահինյանը, Արսեն Աղաջանյանը, Արտեմ Կոնստանդյանը, Ղարիբ Մովսիսյանը, Սերգեյ Համբարձումյանը, Ալյոնա Յանը, Սիլվա Յանը, Յան Շին եւ այլ ընկերներ, մեզ այսօր ավելի են մոտեցրել մեր սկզբնական նպատակին։

«Մեկ սերը տարիք չի հարցնում, մեկ էլ՝ բեմը». Արմեն Սանթրոսյան (Տեսանյութ)

Իմ երեխաները հաճախում են Սիլիկոնյան հովտի լավագույն դպրոցներից մեկը, իսկ Սիլիկոնյան հովտի միջին եւ ավագ դպրոցները համարվում են լավագույնը ողջ ԱՄՆ-ում։ Եվ ես Ձեզ կարող եմ վստահությամբ ասել, որ «Այբ» դպրոցը որեւէ կերպ չի զիջում այդ դպրոցներին։ «Այբ» դպրոցի եւ նրա տված կրթության մասին չեմ խոսի. դրա մասին կփաստեն մյուսները: Իրականությունն այն է, որ «Այբ» դպրոցը շատ ավելի հզոր է, քանի ԱՄՆ-ի՝ լավագույնը համարվող դպրոցներից շատերը։

Մեր նպատակը ՉԻ ԵՂԵԼ ՄԵԿ ԼԱՎ ԴՊՐՈՑ ՍՏԵՂԾԵԼԸ։ Մենք ցանկանում էինք զգալիորեն բարձրացնել կրթության նշաձողը Հայաստանում։ Դա նշանակում է լուսավորել եւ զարգացնել ուսուցիչներին՝ նրանց փոխանցելով դասավանդման նոր հմտություններ ու մեթոդներ, բարձրացնել նրանց աշխատավարձերը՝ ամսական 150 ԱՄՆ դոլարից հասցնելով 1000-ի, բարելավել սարքավորումներով հագեցվածությունն այն դպրոցներում, որոնք ձգտում են բարձրացնել կրթության նշաձողը, եւ ամենակարեւորը՝ ժամանակակից պահանջներին համապատասխանեցնել կրթական բովանդակությունը եւ այն դարձնել առաջատար։

Ահա, թե ինչու ենք ստեղծել «Այբ» կրթական հիմնադրամը, սկսել «Արարատյան բակալավրիատ» ծրագիրը, «Կենգուրու» մաթեմատիկական մրցույթը եւ այլն։

Ես գիտեմ, որ Դուք իսկական հայրենասեր եք. այնպես, ինչպես մենք: Ողջունում եմ «Այբ» համայնքի հետ հանդիպելու եւ մեր սիրելի Հայաստանի կրթական համակարգի բարելավման ուղիները քննարկելու Ձեր առաջարկը: Որպես ՀՀ կրթության նախարար՝ Ձեր ստանձնած աշխատանքը երկրում ամենաբարդերից մեկն է: «Այբ» համայնքի յուրաքանչյուր անդամ ի սրտե ցանկանում է, որ Դուք հաջողեք Հայաստանում կրթական համակարգի բարելավման Ձեր առաքելության ճանապարհին: Խնդրում ենք մեզ տեղեկացնել, թե երբ Ձեզ հարմար կլինի հանդիպել եւ անցնել գործնական քննարկումների»,-նշված է բաց նամակում:

 

КОМСОМОЛЬСКАЯ ПРАВДА