ԿԱՐՃ ԼՈՒՐԵՐ

«ԳՅՈՒՂԱՏՆՏԵՍԱԿԱՆ ՎԱՐԿԵՐԸ ԳՅՈՒՂՆԱԽԱՐԱՐՈՒԹՅԱՆ ԻՐԱՎԱՍՈՒԹՅՈՒՆՆԵՐԻՑ ԴՈՒՐՍ ԵՆ»

22.05.2018 21:30 ՀԱՆՐՈՒԹՅՈՒՆ
«ԳՅՈՒՂԱՏՆՏԵՍԱԿԱՆ ՎԱՐԿԵՐԸ ԳՅՈՒՂՆԱԽԱՐԱՐՈՒԹՅԱՆ ԻՐԱՎԱՍՈՒԹՅՈՒՆՆԵՐԻՑ ԴՈՒՐՍ ԵՆ»

Վերջին օրերին շրջանառվում է այն հարցը, որ ՀՀ գյուղատնտեսության նորանշանակ նախարար ԱՐԹՈՒՐ ԽԱՉԱՏՐՅԱՆԸ, մասնագիտությամբ լինելով ֆիզիկոս, ինչպե՞ս է ղեկավարելու գյուղատնտեսության այդչափ բարդ ոլորտը: Դրանից զատ, այս օրերին հանրությանը ամենաշատ հուզող հարցերից մեկն էլ այն է, որ ի՞նչ եղանակով եւ ի՞նչ փողերով են ներվելու գյուղացիների վարկային տույժ-տուգանքները, ինչպես որ խոստացել էր Նիկոլ Փաշինյանը: Այս եւ այլ հարցերի պատասխանները փորձեցինք ստանալ անձամբ նախարարից:

ՀՀ պաշտպանության նախարար Դավիթ Տոնոյանն աշխատանքային այցով մեկնել է Արցախ

 

- Պարոն Խաչատրյան, ամենեւին չնսեմացնելով Ձեր մարդկային եւ մասնագիտական արժեքները, այնուամենայնիվ՝ խնդրում ենք բացատրել. լինելով ֆիզիկոս, ինչպե՞ս եք պատրաստվում ղեկավարել գյուղոլորտը:

- Փաստորեն այդ հարցը իրոք բոլորին է հուզում: Այսպես պատասխանեմ, մինչ Շիրակի մարզպետի պաշտոնը ստանձնելը, ես եղել եմ տարածքային զարգացման նախարարի տեղակալ: Այդ ընթացքում, հավատացեք, բավականաչափ տեղեկություն եմ հասցրել ստանալ Հայաստանի բոլոր մարզերում առկա խնդիրների վերաբերյալ: Իսկ մեր մարզերի զարգացման հիմնական ճյուղը գյուղատնտեսությունն է: Այնպես որ, իմ փոխնախարար աշխատած տարիներին ես էական տեղեկություններ ու գիտելիքներ հասցրել եմ քաղել մեր մարզերում առկա, մասնավորապես՝ գյուղատնտեսության ոլորտին առնչվող խնդիրների վերաբերյալ: Էլ չեմ խոսում շուրջ մեկ տարի Շիրակի մարզպետ եղած տարիների մասին, երբ կարելի է ասել` մեծամասամբ զբաղվել եմ մարզի գյուղատնտեսական խնդիրները լուծելու ուղղությամբ: Գիտեք, որ Շիրակի մարզում առավելապես իրականացվում են գյուղատնտեսական ծրագրեր, եւ հիմնական աշխատանքներն ուղղված են եղել հենց գյուղատնտեսության զարգացմանը: Պարզ է, եթե աշխատանքային գործունեությանս ընթացքում խիստ մասնագիտական խնդիրներ առաջանան, ոլորտի նեղ մասնագետների հետ եմ քննարկելու: Այս ամենով հանդերձ, ուզում եմ հիշեք, որ նախարարը քաղաքականություն մշակողն ու իրականացնողն է, կազմակերպիչը:

- Մենք դա հիշում ենք, պարոն Խաչատրյան, բայց... (Բայց չէ՞ որ քաղաքականություն մշակելու համար ոլորտը պետք է ծայրից ծայր իմանալ, որի համար, ի դեպ, սահմանված է բուհական կրթություն):

- Ձեր հարցի պատասխանը արդեն տվեցի, եթե լինեն նեղ մասնագիտական խնդիրներ, առաջին հերթին կքննարկեմ նեղ մասնագետների հետ, ապա նոր որոշում կկայացվի: Այդ առումով ժողովուրդը կարող է վստահ լինել:

 

«ՊԵՏՔ Է ԿԱՐՈՂԱՆԱՆՔ ԱՋԱԿՑԵԼ ՓՈՔՐ ՏՆԱՅԻՆ ՏՆՏԵՍՈՒԹՅՈՒՆՆԵՐԻՆ»

- Լավ, իսկ որո՞նք են լինելու նախարարության առաջնային լուծման խնդիրները:

- Նախ՝ պետք է տարանջատել կարճաժամկետ եւ երկարաժամկետ խնդիրները: Երկարաժամկետ խնդիրներից առաջնայինը` գյուղատնտեսության արդյունավետ գոտիականության սահմանումն է: Այսինքն` պետք է նախ հասկանանք, թե Հայաստանի մարզերից կոնկրետ որտեղ գյուղատնտեսության որ ճյուղը պետք է զարգացնել` անասնապահություն, թե բուսաբուծութան, թե այլ բնագավառ (մենք էլ կարծում էինք, թե այդ հարցի պատասխանը դեռ ԽՍՀՄ-ի ժամանակներում էր գիտականորեն տրվել- Հեղ.): Մեր մյուս հիմնական խնդիրը էլի երկարաժամկետ ծրագրերի մասով գյուղատնտեսական աջակցության թիրախավորումն է: Վերջին մի քանի տարիների ընթացքում հիմնական օժանդակություն ստացել են խոշոր բիզնեսով զբաղվողները, որոնց օժանդակությունը եղել է սուբսիդավորումը: Ասենք, եթե խոշոր բիզնեսմենը ցանկացել է կառուցել սպանդանոց (իսկ սպանդանոց կառուցելու համար մեծ գումար էր պահանջվում), ապա նա օգտվում էր սուբսիդավորումից: Բայց մոռանում ենք, որ գյուղատնտեսական աշխատանքի բացարձակ մեծամասնությունը` 95 տոկոսը փոքր տնային տնտեսություններն են: Ա՛յ, փոքր տնային տնտեսությունների թիրախավորումը, աջակցության մեխանիզմներ մշակելը պետք է լինի մեր հիմնական խնդիրը: Եվ, այո, այն խնդիրները, որոնք մեր գյուղացիները հիմա ունեն, վերը նշածիս ածանցյալն է: Գյուղացուն թողել ենք հողի հետ՝ ասելով՝ ոնց ուզում ես, գլխիդ ճարը տես: Բայց գյուղատնտեսությունը կենսակերպ է, սովորական բիզնես չէ: Մենք պետք է օգնենք, որպեսզի գյուղացիների արտադրանքը սպառվի, շատանա: Այսօր մեր հողերի քառասուն տոկոսը չի մշակվում, ինչն իր հետ բերում է բազում խնդիրներ: Տեսեք, եթե գյուղացին չի կարողանում իր տունը պահել, ինքը երեք տարբերակ ունի. կա՛մ գալիս է քաղաք, կա՛մ արտագաղթում է, կա՛մ ոչ օրինական ճանապարհ է բռնում: Պետք է կարողանանք աջակցել փոքր տնային տնտեսություններին, որպեսզի գյուղացու հոգսը թեթեւանա, եւ աշխատանքն էլ իր արդյունքը տա:

ՀՀ ԿԳ նախարարն ընդունել է Հայաստանում Սիրիայի Արաբական Հանրապետության արտակարգ և լիազոր դեսպանին

 

ԳՅՈՒՂՆԱԽԱՐԱՐՈՒԹՅՈՒՆԸ ԳՈՐԾ ՉՈՒՆԻ՞ ՎԱՐԿԱՅԻՆ ՀԱՄԱՆԵՐՄԱՆ ՀԵՏ

- Պարոն Խաչատրյան, անդրադառնալով գյուղացու հոգսը թեթեւացնելուն, խնդրում ենք պարզաբանել, թե ի՞նչ եղանակով եք պատրաստվում, օրինակ, վարկերի տույժ-տուգանքները ներել: Եվ, առհասարակ, ի՞նչ ընթացքի մեջ է այդ գործընթացը: Պետության հաշվի՞ն եք դա իրականացնելու, թե՝ բանկերի:

- Այո, գյուղացիների  վարկային բեռը շատ մեծ է: Եվ մենք շահագրգռված ենք, որ գյուղացիական վարկերի տույժ-տուգանքների համաներում լինի, եւ այդ գումարները ներդրվեն գյուղատնտեսության մեջ: Կառավարության վերջին նիստի ժամանակ անդրադարձել եմ այդ խնդրին: Բայց ուզում եմ փաստել, որ գյուղատնտեսական վարկերը, տոկոսադրույքները, չվճարված վարկային պարտավորությունների դիմաց հաշվարկված տույժ-տուգանքները անմիջականորեն Գյուղատնտեսության նախարարության իրավասություններից դուրս են: Մենք անմիջական շահառու ենք, բայց այդ պրոցեսն ավելի շատ կառավարություն-Կենտրոնական բանկ-բանկեր-վարկային կազմակերպությունների տիրույթում է գտնվում: Մենք խիստ շահագրգռված ենք, որ գյուղացիների համար, որոնց հողից ստացած եկամուտը մինիմալ է, գոնե տույժ-տուգանքների համաներում լինի, եւ այդ գումարները, որոնք գյուղացիները պետք է տային տույժ ու տուգանքների տեսքով, դա ներդնեն գյուղատնտեսության մեջ, որպեսզի գյուղատնտեսական արտադրանքի մակարդակը բարձրանա:

- Պարոն Խաչատրյան, Դուք չասացիք, թե բյուջեի հաշվի՞ն է ներվելու փոքր տնային տնտեսությունների վարկային տույժ-տուգանքները, թե՞ բանկերի:

- Անկեղծ ասած, այդ հարցը կոնկրետ իմ ոլորտին չի վերաբերում, այդ հարցերով առաջիկայում պարզաբանումներ, հստակեցումներ կլինեն երեւի ԿԲ-ի կողմից:

Զրույցը` ԻԼՈՆԱ ԱԶԱՐՅԱՆԻ

 

КОМСОМОЛЬСКАЯ ПРАВДА