o C     17. 11. 2019   : :

ԿԱՐՃ ԼՈՒՐԵՐ

ԶԱՐՄԱՆՔ

25.05.2016 14:05 ԶԱՐՄԱՆՔ
ԶԱՐՄԱՆՔ

Երեւանում մեկնարկել է ամենազարմանալի դատավարությունը, որի բոլոր մասնակիցները հազիվ են զսպում ծիծաղը: Խոսքը, այսպես կոչված, «հակահարված» արտխմբի անդամ ԱՐՏԱԿ ԳԵՎՈՐԳՅԱՆԻ մասին է, ով անցյալ տարվա դեկտեմբերին ստվարաթղթե տանկով շրջել էր մայրաքաղաքի կենտրոնում, իսկ վերջում էլ այդ նույն տանկով հարվածել ԱԱԾ-ի շենքին: Այժմ նրան դատում են հասարակական կարգը կոպտորեն խախտելու մեղադրանքով, ու թեեւ ամեն ինչ զվարճալի է (զորօրինակ` տանկի մակնիշի մասին հարցը), սակայն կարող է ոչ զվարճալի ավարտ ունենալ «ընկեր տանկիստի» համար: Ինչեւէ, հաջորդ դատական նիստը կլինի գրեթե մեկ ամիս անց...

ԶԱՐՄԱՆՔ

Գժերի ցավը տանեմ` առանց բուժվելու փողոցներով շրջող բազում հոգեկան խանգարում ունեցողներին զարմանալիորեն գումարվել է իրեն գժի տեղ դնող նոր կատեգորիա: Այսպես, մայիսի 17-ին Հանրապետության հրապարակի շատրվանի մեջ էր մտել ոմն ԱՐՄԻՆԵ ԱՌԱՔԵԼՅԱՆ, ով «Մարդու իրավունքների ժողովրդավարության ինստիտուտ» ՀԿ հիմնադիրն է: Դե, զոռով տեղափոխել էին Նուբարաշեն հոգեբուժական կենտրոն` ստուգելու` իրավացիորեն ենթադրելով, որ նորմալ մարդը նման բան չի անի: Նորմալ մարդը, իսկ ակտիվի՞ստը. երեկ առավոտյան էլ մի աղջիկ կրկնել էր նույն արարքը (պարզվում է, որ ակտիվիստուհի է), ու թեեւ արարքը զարմանալի ու տարօրինակ է, ոստիկանները խորհրդակցելով ղեկավարության հետ, այնուամենայնիվ, այս մեկին գժանոց չտարան, անգամ անուն-ազգանունը պաշտոնապես չարձանագրեցին: Դե ինչ, շառից-փորձանքից հեռու, թե չէ հանկարծ մեղադրանքների տարափ կսկսվի, թե Հայաստանում վերականգնվում է ԽՍՀՄ-ի պատժիչ հոգեբուժության պրակտիկան: Չնայած ձեռքներս սրտին դրած` պետք է խոստովանենք, որ ոմանց նկատմամբ դրա կիրառումը հեչ չէր խանգարի...

Իսկ ՀՀԿ-ն, քանի դեռ ուշ չէ, թող անձնատուր լինի: Աչքներս լույս, իշխող կուսակցության հախից որոշել է գալ հայտնի «կույսակցության» առաջնորդ ԱՆԻ ԶԱԽԱՐՅԱՆԸ: Ինչքան էլ զարմանալի լինի, նա հանդես է գալիս վերջնագրի բառապաշարով. «Հաշվի առնելով երկրում առկա կիսապատերազմական իրավիճակը, ազգային անվտանգությանը սպառնացող վտանգները` ես ՀՀԿ-ին շանս տվեցի արմատապես փոխելու իր քաղաքական գործելաոճը: ՀՀԿ-ն այդ շանսը չօգտագործեց, դե ուրեմն, մեղքը իր վիզը»: Հե՜յ, ո՞ւր եք «ռեժիմը տապալողներ», տարբեր տեսակի հեղափոխականներ: Ինչ է, Անի Զախարյանի տեղը չգիտե՞ք: 

Այդպիսի հեղափոխականներից մեկը` ԺԻՐԱՅՐ ՍԷՖԻԼՅԱՆԸ, ամպագոռգոռ արտահայտություն է արել, թե ստանձնում է Արցախի տարածքային ամբողջականության ապահովությունը, եւ, բնականաբար, ազատամարտիկներից շատերը դա որակեցին որպես ինքնակոչ հայտարարություն: Բայց, զարմանալիորեն, Ժիրոյի բախտը չի բերում` ոչ միայն ազատամարտիկները նրա կարծիքը չեն կիսում, այլեւ քաղաքագետ Սերգեյ Մինասյանը պնդում է, որ նա  ընդդիմադիր էլ չէ. «Իրականում այդ երեւույթն ընդդիմադիր դաշտում չի կատարվում, հակառակը` ավանդական ընդդիմադիր քաղաքական ուժերը բոլորովին այլ պահվածք դրսեւորեցին, նրանք փորձում են այդ հարցը չօգտագործել իրավիճակը սրելու համար: Նորմալ ընդդիմությունը համախմբվեց Արցախի շուրջ, ու հակաիշխանական ելույթներ չեղան: Բայց կան, այսպես կոչված, «ոչ ստանդարտ» քաղաքական ուժեր, ինչպիսիք են սէֆիլյաններն ու այլք, որոնք չեն մտնում Հայաստանի քաղաքական ավանդական համակարգի մեջ: Նման ուժերը փորձելու են օգտվել այս լարված իրավիճակից ու ավելի նպաստավոր դիրքեր զբաղեցնել: Եվ քանի որ «սէֆիլյանները» ֆորմալ քաղաքական համակարգի մաս չեն կազմում, հետեւաբար յուրաքանչյուր «ֆորսմաժորային» իրավիճակում փորձելու են ավելի տեսանելի դառնալ հասարակության համար: Եվ դա այն է, ինչ տեսնում ենք ու լսում նրանց կողմից»: 

Զարմացած է 

ՀՈՎՀԱՆՆԵՍ ԳԱԼԱՋՅԱՆԸ

 

КОМСОМОЛЬСКАЯ ПРАВДА